ರೈಲು ಹತ್ತಲು ನೂಕು ನುಗ್ಗಲು – ಫುಟ್ ಬೋರ್ಡ್ ಗೆ ಬಿದ್ದು ನಾಲ್ವರು ಸಾವು

ಚೆನ್ನೈ: ರೈಲು ಹತ್ತುವ ವೇಳೆ ನೂಕುನುಗ್ಗಲು ಉಂಟಾಗಿ ಫುಟ್‍ಬೋರ್ಡ್ ಗೆ ಬಿದ್ದ ಪರಿಣಾಮ 4 ಮಂದಿ ಮೃತಪಟ್ಟಿರುವ ಘಟನೆ ಚೆನ್ನೈ ಸೆಂಟ್ ಥಾಮಸ್ ಮೌಂಟ್ ನಿಲ್ದಾಣದಲ್ಲಿ ಮಂಗಳವಾರ ಬೆಳಗ್ಗೆ ನಡೆದಿದೆ.

ರೈಲು ಚೆನ್ನೈ ನ ಬೀಚ್ ನಿಂದ ತಿರುಮಲ್ಪುರ್ ಗೆ ತೆರಳುತ್ತಿದ್ದ ವೇಳೆ ಸೆಂಟ್ ಥಾಮಸ್ ಮೌಂಟ್ ನಿಲ್ದಾಣದ ಬಳಿ ಬೆಳಗ್ಗೆ 8.25 ಗಂಟೆಗೆ ಈ ಅವಘಡ ಸಂಭವಿಸಿದೆ. ರೈಲು ಚಲಿಸುವ ವೇಳೆ ಬ್ಯಾಲೆನ್ಸ್ ತಪ್ಪಿ ಫುಟ್‍ಬೋರ್ಡ್‍ಗೆ ಬಿದ್ದಿದ್ದಾರೆ.

ಈ ಅವಘಡದಿಂದ ಮೂವರು ಸ್ಥಳದಲ್ಲೇ ಮೃತಪಟ್ಟಿದ್ದರೆ ಆಸ್ಪತ್ರೆಗೆ ಸಾಗಿಸುವಾಗ ಓರ್ವ ವ್ಯಕ್ತಿ ಸಾವನ್ನಪ್ಪಿದ್ದಾನೆ. 7 ಮಂದಿಗೆ ಗಂಭೀರ ಗಾಯಗಳಾಗಿದ್ದು, ಅವರನ್ನು ರಾಜೀವ್ ಗಾಂಧಿ ಸರ್ಕಾರಿ ಜನರಲ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಬಹುತೇಕ ವಿದ್ಯುತ್ ಆಧಾರಿತ ರೈಲುಗಳು ಪ್ಲಾಟ್‍ಫಾರಂ ಸಂಖ್ಯೆ 2 ರಲ್ಲಿ ಹೋಗುತ್ತವೆ. ಆದರೆ ಈ ಸೆಂಟ್ ಥಾಮಸ್ ಮೌಂಟ್ ನಿಲ್ದಾಣದಲ್ಲಿ ರೈಲು ಪ್ಲಾಟ್‍ಫಾರಂ ಸಂಖ್ಯೆ 4 ರಲ್ಲಿ ಬಂದು ನಿಲ್ಲುತ್ತದೆ. ರೈಲು ನಿಲ್ದಾಣಕ್ಕೆ ಬರುತ್ತಿದ್ದಂತೆ ಪ್ರಯಾಣಿಕರಲ್ಲಿ ನೂಕುನುಗ್ಗಲು ಉಂಟಾಗಿ ಈ ಘಟನೆ ಸಂಭವಿಸಿದೆ.

ಸ್ಥಳದಲ್ಲೇ ಮೃತಪಟ್ಟವರನ್ನು ಜೆ ನವೀನ್ ಕುಮಾರ್(23), ಶಿವಕುಮಾರ್(22) ಮತ್ತು ಭರತ್(16) ಎಂದು ಗುರುತಿಸಲಾಗಿದ್ದು, ಮೃತದೇಹವನ್ನು ರೈಲ್ವೇ ಪೊಲೀಸರು ಮರಣೋತ್ತರ ಪರೀಕ್ಷೆಗೆಂದು ಆಸ್ಪತ್ರೆಗೆ ಕಳುಹಿಸಿದ್ದಾರೆ. ಸೋಮವಾರ ಇಲ್ಲೇ ಅವಘಡ ಸಂಭವಿಸಿದ್ದು, ಸ್ಥಳದಲ್ಲೇ ಇಬ್ಬರು ಸಾವನ್ನಪ್ಪಿದ್ದರು.