ನವದೆಹಲಿ: ಭಾರತೀಯರು ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಳ್ಳಲು ವೈಯಕ್ತಿಕ ಆಟವಾಡುತ್ತಾರೆ. ಆದರೆ ಪಾಕಿಸ್ತಾನದ ಬ್ಯಾಟ್ಸ್ಮನ್ಗಳು ತಂಡಕ್ಕಾಗಿ ಆಡುತ್ತಾರೆ ಎಂದು ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ, ಮುಖ್ಯ ಸೆಲೆಕ್ಟರ್ ಇಂಜಮಾಮ್-ಉಲ್-ಹಕ್ ಹೇಳಿದ್ದಾರೆ.
ಪಾಕಿಸ್ತಾನದ ಮಾಜಿ ಕ್ರಿಕೆಟರ್ ರಮೀಜ್ ರಾಜಾ ಅವರೊಂದಿಗೆ ಇಂಜಮಾಮ್ ತಮ್ಮ ಕಾಲದ ಕ್ರಿಕೆಟ್ ತಂಡಗಳ ಬಗ್ಗೆ ಮಾತನಾಡಿದ್ದಾರೆ. ”ಪಾಕ್ ಬ್ಯಾಟ್ಸ್ಮನ್ಗಳು ವೈಯಕ್ತಿಕ ದಾಖಲೆಗಳ ಹಿಂದೆ ಬೀಳದೇ ಯಾವಾಗಲೂ ತಮ್ಮ ನಾಯಕನ ಬೆಂಬಲಕ್ಕೆ ನಿಲ್ಲುತ್ತಿದ್ದರು. ವಿಶೇಷವಾಗಿ ಇಮ್ರಾನ್ ಖಾನ್ ನೇತೃತ್ವದ ತಂಡದಲ್ಲಿ ಇಂತಹ ವಾತಾವರಣ ಇತ್ತು” ಎಂದು ಇಂಜಮಾಮ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಇದನ್ನೂ ಓದಿ: ಸಚಿನ್ರನ್ನ ದೂರಿ, ವಿಶೇಷ ಮನವಿ ಸಲ್ಲಿಸಿದ ಇಂಜಮಾಮ್-ಉಲ್-ಹಕ್
ಪಾಕಿಸ್ತಾನದ ಪ್ರಸ್ತುತ ಆಟಗಾರರು ಪ್ರತಿಭೆಯನ್ನು ಹೊಂದಿದ್ದಾರೆ. ಆದರೆ ಕೆಲವೊಮ್ಮೆ ವೈಫಲ್ಯದ ಬಗ್ಗೆ ತುಂಬಾ ಭಯಪಡುತ್ತಾರೆ ಎಂದು ರಮೀಜ್ ರಾಜಾ ಹೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಇಂಜಮಾಮ್, ಆಟಗಾರರು ಸರಣಿ ಆಧಾರದ ಮೇಲೆ ಯೋಚಿಸುತ್ತಿದ್ದರೆ ಒಂದು ಸರಣಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದರೆ ಅವರಿಗೆ ಸ್ಥಾನ ಸಿಗುತ್ತದೆ. ಒಂದು ವೇಳೆ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾದರೆ ಅವರನ್ನು ತಂಡದಿಂದ ಕೈಬಿಡಲಾಗುತ್ತದೆ. ಆದರೆ ಅವರಿಗೆ ವೈಕ್ತಿಕ ಆಟವಾಡಲು ಸಾಧ್ಯವಾಗುವುದಿಲ್ಲ ಎಂದು ತಿಳಿಸಿದ್ದಾರೆ.
”ನಮ್ಮ ಸಮಯದಲ್ಲಿ ಭಾರತವು ನಮಗಿಂತ ಬಲಿಷ್ಠ ಬ್ಯಾಟಿಂಗ್ ತಂಡವನ್ನು ಹೊಂದಿತ್ತು. ಹೀಗಾಗಿ ಅವರಿಗಿಂತ ನಮ್ಮ ದಾಖಲೆ ಉತ್ತಮವಾಗಿಲ್ಲ. ಆದರೆ ನಮ್ಮಲ್ಲಿ ಪ್ರತಿಯೊಬ್ಬರು 30ರಿಂದ 40 ರನ್ ಗಳಿಸಿ, ತಂಡಕ್ಕೆ ಕೊಡುಗೆ ನೀಡುತ್ತಿದ್ದೆವು. ಒಂದು ವೇಳೆ ಪಂದ್ಯದಲ್ಲಿ ಭಾರತೀಯ ಬ್ಯಾಟ್ಸ್ಮನ್ ಶತಕ ಬಾರಿಸಿದರೆ ಅದು ತಂಡಕ್ಕಾಗಿ ನೀಡಿದ ಕೊಡುಗೆ ಆಗುತ್ತಿರಲಿಲ್ಲ. ಬದಲಾಗಿ ವೈಯಕ್ತಿಕ ದಾಖಲೆಗಾಗಿ ಹಾಗೆ ಮಾಡುತ್ತಿದ್ದರು” ಎಂದು ಇಂಜಮಾಮ್ ಹೇಳಿದ್ದಾರೆ.
”ಈಗ ನಮ್ಮ ಆಟಗಾರರು ತಮ್ಮ ಸ್ಥಾನವನ್ನು ಕಳೆದುಕೊಳ್ಳುವ ಭಯದಲ್ಲಿದ್ದಾರೆ. ತಮ್ಮ ಬ್ಯಾಟಿಂಗ್ ಪ್ರದರ್ಶನ ತೋರಿಸಲು ಕೇವಲ ಒಂದು ಅಥವಾ ಎರಡು ಇನ್ನಿಂಗ್ಸ್ ಮಾತ್ರ ಇದೆ ಎಂದು ಅವರು ಭಾವಿಸುತ್ತಾರೆ. ಆದ್ದರಿಂದ ತಂಡಕ್ಕೆ ಏನು ಬೇಕು ಎಂದು ಅವರು ತಿಳಿಯಲು ಸಾಧ್ಯವಾಗುತ್ತಿಲ್ಲ. ತಂಡದ ನಾಯಕ ಮತ್ತು ತರಬೇತುದಾರ ಒಂದೇ ರೀತಿಯ ಆಲೋಚನೆ ಹೊಂದಿದ್ದರೆ ಬ್ಯಾಟ್ಸ್ಮನ್ಗಳು ತಂಡದ ಅಗತ್ಯಕ್ಕೆ ಅನುಗುಣವಾಗಿ ಆಡುತ್ತಾರೆ” ಎಂದು ಇಂಜಮಾಮ್, ರಮೀಜ್ ರಾಜಾ ಅವರಿಗೆ ತಿಳಿಸಿದ್ದಾರೆ.
