Connect with us

Districts

ಕಲಾವಿದ ನಾಗರಾಜ ಜಕ್ಕಮ್ಮನವರಿಗೆ ಒಲಿದ ಜಾನಪದ ಅಕಾಡೆಮಿ ಪ್ರಶಸ್ತಿ

Published

on

ಗದಗ: ಬಡತನವನ್ನೇ ಬದುಕಾಗಿಸಿಕೊಂಡು ಕಲೆಗಾಗಿ ನಾಲ್ಕೈದು ದಶಕಗಳಿಂದ ಶ್ರಮಿಸಿದ ಜಿಲ್ಲೆಯ ನೀಲಗುಂದ ಗ್ರಾಮದ ಜಾನಪದ ಕಲಾವಿದ ನಾಗರಾಜ ಜಕ್ಕಮ್ಮನವರಿಗೆ(59) ಕರ್ನಾಟಕ ಜಾನಪದ ಅಕಾಡೆಮಿಯ 2019ನೇ ಸಾಲಿನ ಪ್ರಶಸ್ತಿ ಒಲಿದಿದೆ.

ಬದುಕಿನೂದ್ದಕ್ಕೂ ಸಂಗೀತ ಸಾಧನೆಗೆ ಹೋರಾಟ ನಡೆಸಿದ ಬಡ ಕಲಾವಿದ ನಾಗರಾಜ ಜಕ್ಕಮ್ಮನವರ ಜೀವನ ಕತೆಯೇ ಒಂದು ಸಿನಿಮಾದಂತಿದೆ. ಕಲಿತಿದ್ದು 3ನೇ ತರಗತಿ, ಮೂರು ವರ್ಷ ಚಿಕ್ಕವನಿದ್ದಾಗ ತಾಯಿಯನ್ನು ಕಳೆದುಕೊಂಡು ಕೊರಗುತ್ತಿದ್ದಾಗ ಮತ್ತೊಮ್ಮೆ ತಾಯಿಯ ರೂಪದಲ್ಲಿ ನಾಗರಾಜ ಅವರನ್ನ ಅಪ್ಪಿಕೊಂಡವಳು ಸಂಗೀತ ಸರಸ್ವತಿ. ಚಿಕ್ಕಂದಿನಿಂದಲೇ ಸಂಗೀತದ ಬಗ್ಗೆ ಅಪಾರ ಆಸಕ್ತಿ ಹೊಂದಿದ್ದ ನಾಗರಾಜ ಅವರಿಗೆ ಮೊದಲ ಸಂಗೀತ ಸಾಧನವಾಗಿದ್ದು ಅವರ ಎದೆ. ಹೌದು. ಅವರು ಹಾಡುವಾಗ ತಮ್ಮ ಎದೆಯನ್ನು ಡಗ್ಗವನ್ನಾಗಿ(ಒಂದು ಸಂಗೀತ ಸಾಧನ) ಬಳಸುತ್ತಾ ಹಾಡುತ್ತಿದ್ದರು. 12 ವಯಸ್ಸಿನಲ್ಲಿ ಸಂಗೀತ ಕಲೆಯಲು ಗದುಗಿನ ವೀರೇಶ್ವರ ಪುಣ್ಯಾಶ್ರಮಕ್ಕೆ ಆಗಮಿಸಿದಾಗ ಅಲ್ಲಿ ಅವರಿಗೆ ಅವಕಾಶ ನಿರಾಕರಿಸಲಾಯಿತು.

ಅಂದಿನ ದಿನಗಳಲ್ಲಿ ವೀರೇಶ್ವರ ಪುಣ್ಯಾಶ್ರಮದಲ್ಲಿ ಬರಿ ಅಂಧರಿಗೆ ಮಾತ್ರ ಸಂಗೀತ ಶಿಕ್ಷಣ ನೀಡಲಾಗುತ್ತಿತ್ತು. ನಂತರ ನೀಲಗುಂದ ಗ್ರಾಮದ ದುರ್ಗಾದೇವಿ ಗುಡಿಯಲ್ಲಿ ಹಾರ್ಮೋನಿಯಂ ಕಲಿಯಲು, ಶ್ರಾವಣ ಮಾಸದಲ್ಲಿ ಊರಿನಲ್ಲಿ ಮೆರವಣಿಗೆ ಪ್ರಾರಂಭಿಸಲು ಬೆಳಗಿನ ಜಾವಾ 1 ಗಂಟೆಗೆ ಎದ್ದು ದೇವಸ್ಥಾನದ ಆವರಣವನ್ನು ಕಸಗೂಡಿಸಿ, ನೀರಿನಿಂದ ಸ್ವಚ್ಛಗೊಳಿಸಿ ತಾವೊಬ್ಬರೇ ಹಾರ್ಮೋನಿಯಂ ಹಿಡಿದು ಸಂಗೀತಾಭ್ಯಾಸ ಮಾಡುತ್ತಿದ್ದರು. ಸಂಗಡಿಗರು ಬಂದ ನಂತರ ಊರಿನ ಪ್ರಮುಖ ರಸ್ತೆಗಳಲ್ಲಿ ಮೆರವಣಿಗೆ ಪಾಲ್ಗೊಳ್ಳುತ್ತಿದ್ದರು ಅಲ್ಲದೇ ಮತ್ತೆ ಸಂಜೆ 5ರಿಂದ ರಾತ್ರಿ 11ಗಂಟೆವರೆಗೆ ಹಾರ್ಮೋನಿಯಂ ಬಾರಿಸುತ್ತಾ ಹಾಡುಗಳನ್ನು ಹಾಡುತ್ತಿದ್ದರು.

ಹೀಗೆ ಸಾಧನೆ ಶಿಖರವನ್ನು ಏರುತ್ತಾ ಕಷ್ಟದಲ್ಲಿ ಕಲೆಯನ್ನು ಗುರುತಿಸಿದ ಬಸವರಾಜ ಜಕ್ಕಮ್ಮನವರ ಮಾರ್ಗದರ್ಶನದಲ್ಲಿ ಕಳೆದ 15 ವರ್ಷಗಳಿಂದ ಜೈಭೀಮ ಗೀಗೀ ಜನಪದ ಕಲಾತಂಡವನ್ನು ಕಟ್ಟಿಕೊಂಡು ಗದಗ ಜಿಲ್ಲೆ ಸೇರಿದಂತೆ ರಾಜ್ಯದ ಯಾದಗಿರಿ, ಬಾಗಲಕೋಟೆ, ವಿಜಯಪುರ, ಮಂಡ್ಯ, ಬೀದರ್, ದಾವಣಗೆರೆ, ಹಾವೇರಿ, ಧಾರವಾಡ ಅಷ್ಟೇ ಅಲ್ಲಾ ಗಡಿ ಜಿಲ್ಲೆಗಳಲ್ಲೂ ಸುಮಾರು 4 ಸಾವಿರ ಕಾರ್ಯಕ್ರಮಗಳನ್ನು ನಾಜರಾಜ ಅವರು ನೀಡಿದ್ದಾರೆ.

ಅಲ್ಲದೇ ಈವರೆಗೆ ರಾಜ್ಯಮಟ್ಟದ ಯುವಜನ ಮೇಳದಲ್ಲಿ ಭಾಗವಹಿಸಿ ಮೂರು ಭಾರಿ ಪ್ರಥಮ ಸ್ಥಾನ ಪಡೆದು ಜಿಲ್ಲೆಗೆ ಕೀರ್ತಿ ತಂದುಕೊಟ್ಟಿದ್ದಾರೆ. ನಾಗರಾಜ ಅವರು ಬರೀ ಸಂಗೀತಗಾರನಾಗಿ ಗುರುತಿಸಿಕೊಳ್ಳದೇ ಸುಮಾರು 30 ನಾಟಕಗಳನ್ನು ನಿರ್ದೇಶನ ಮಾಡಿದ್ದಾರೆ. ಅವುಗಳಲ್ಲಿ ತವರು ಮನೆ ಕುಂಕುಮ, ಹುಡಿ ಎಬ್ಬಿಸಿದ ಹುಲಿ, ಭಾರತೀಯ ಬ್ರಿಟಿಷರು, ಪ್ರಾಣ ಹೋದರು ಮಾನಬೇಕು, ಹಳ್ಳಿ ಸುಟ್ಟ ಕೊಳ್ಳಿ, ರೊಚ್ಚಿಗೆದ್ದ ಹುಲಿ, ಹುಲಿ ಹೆಬ್ಬುಲಿ, ಸತ್ಯ ಎಲ್ಲಿದೇ ಕೈ ಎತ್ತಿ ಹೇಳಿ ಎಂಬ ನಾಟಕಗಳು ಜನಮೆಚ್ಚುಗೆ ಪಡೆದಿವೆ.

Click to comment

Leave a Reply

Your email address will not be published. Required fields are marked *