ಎಷ್ಟು ಹಣ ಕೂಡಿಟ್ರೂ ಖರೀದಿಸಲಾಗದ ವಸ್ತುವನ್ನು ಅಭಿಮಾನಿಯಿಂದ ಗಿಫ್ಟ್ ಆಗಿ ಪಡೆದ ಅಪ್ಪು!

ಬೆಂಗಳೂರು: ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅವರಿಗೆ ಅಭಿಮಾನಿಯೊಬ್ಬರು ಉಡುಗೊರೆ ನೀಡಿದ್ದು, ಆ ಉಡುಗೊರೆ ಜೊತೆ ಪುನೀತ್ ಫೋಟೋ ತೆಗೆದು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ.

ಅಭಿಮಾನಿಯೊಬ್ಬರು ಪುನೀತ್ ರಾಜ್‍ಕುಮಾರ್ ಅವರಿಗೆ ವಾಲ್ಮೀಕಿ ರಾಮಾಯಣ ಪುಸ್ತಕವನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಆ ಪುಸ್ತಕದ ಜೊತೆ ಪುನೀತ್ ಫೋಟೋ ತೆಗದು ಫೇಸ್‍ಬುಕ್ ಮತ್ತು ಟ್ವಟ್ಟರ್ ನಲ್ಲಿ ಹಾಕಿದ್ದಾರೆ. ಬೆಟ್ಟದ ಹೂವು ಸಿನಿಮಾದಲ್ಲಿ ಎಷ್ಟೇ ದುಡ್ಡು ಸೇವ್ ಮಾಡಿದ್ದರೂ ತಗೊಳ್ಳೋಕೆ ಆಗಿರಲಿಲ್ಲ. ಫೈನಲಿ ಎ ಫ್ಯಾನ್ ಗಿಫ್ಟೆಡ್ ಇಟ್ ಎಂದು ಕ್ಯಾಪ್ಷನ್ ಬರೆದು ಪೋಸ್ಟ್ ಮಾಡಿದ್ದಾರೆ.

ಬೆಟ್ಟದ ಹೂವು ಚಿತ್ರ 1985ರಲ್ಲಿ ಬಿಡುಗಡೆಯಾಗಿತ್ತು. ಈ ಚಿತ್ರದಲ್ಲಿ ಪುನೀತ್ ಅವರಿಗೆ ಪುಸ್ತಕಗಳ ಬಗ್ಗೆ ಆಸಕ್ತಿ ಇರುತ್ತದೆ. ವಾಲ್ಮೀಕಿ ರಾಮಾಯಣ ಪುಸ್ತಕ ಖರೀದಿಸಲು ಹಣವನ್ನು ಕೂಡಿಡುತ್ತಿರುತ್ತಾರೆ. ಆದರೆ ಕೊನೆಯವರೆಗೂ ಪುನೀತ್ ಈ ಚಿತ್ರದಲ್ಲಿ ವಾಲ್ಮೀಕಿ ರಾಮಾಯಣ ಪುಸ್ತಕವನ್ನು ಖರೀದಿಸಲು ಸಾಧ್ಯವಾಗಲ್ಲ. ಈ ಚಿತ್ರಕ್ಕಾಗಿ ಪುನೀತ್ ರಾಜ್‍ಕುಮಾರ್ ಅವರಿಗೆ ರಾಷ್ಟಪ್ರಶಸ್ತಿ ದೊರೆತ್ತಿತ್ತು.

ಸದ್ಯ ಪುನೀತ್ ರಾಜ್ ಕುಮಾರ್ ನಟಿಸಿದ ‘ಅಂಜನಿಪುತ್ರ’ ಸಿನಿಮಾ 50 ದಿನ ಪೂರೈಸುವ ಹೊತ್ತಲ್ಲೇ ಅಭಿಮಾನಿಯಿಂದ ಈ ಉಡುಗೊರೆ ದೊರೆತಿದೆ. ಆದರೆ ಈ ಉಡುಗೊರೆ ಯಾರು ನೀಡಿದ್ದು ಎಂಬ ಗುಟ್ಟನ್ನು ಮಾತ್ರ ಪುನೀತ್ ಬಿಟ್ಟುಕೊಡುತ್ತಿಲ್ಲ.