– ನಗ್ನ ಫೋಟೋ ಕಳಿಸಿದ್ದೆ ತಪ್ಪಾಯ್ತು!
ಬೆಂಗಳೂರು: ವ್ಯಕ್ತಿಯೊಬ್ಬ ತಮ್ಮ ಮಾಜಿ ಪ್ರೇಯಸಿಯ ನಗ್ನ ಫೋಟೋಗಳನ್ನು ಆಕೆಯ ತಾಯಿ ಮತ್ತು ಪತಿಗೆ ತೋರಿಸುವುದಾಗಿ ಬೆದರಿಕೆವೊಡ್ಡುತ್ತಿರುವ ಘಟನೆ ಸಿಲಿಕಾನ್ ಸಿಟಿಯಲ್ಲಿ ನಡೆದಿದೆ.
ಸದ್ಯಕ್ಕೆ ನವದಂಪತಿ ಈ ಕುರಿತು ಕಳೆದ ತಿಂಗಳು ಸೈಬರ್ ಕ್ರೈಂ ಪೊಲೀಸರಿಗೆ ದೂರು ನೀಡಿದ್ದಾರೆ. ನಾವು ಆರೋಪಿಯನ್ನು ಬಂಧಿಸಲು ಚೆನ್ನೈಗೆ ತಂಡವನ್ನು ಕಳುಹಿಸಿದ್ದೇವೆ. ನಾವು ಬರುತ್ತಿರುವ ವಿಚಾರವನ್ನು ತಿಳಿದು ಆತ ಈಗ ತಲೆಮರೆಸಿಕೊಂಡಿದ್ದಾನೆ. ಆದರೆ ಆರೋಪಿಯಿಂದ ಮಹಿಳೆ ಮತ್ತು ಅವರ ಕುಟುಂಬಕ್ಕೆ ಬರುತ್ತಿದ್ದ ಬೆದರಿಕೆ ಕರೆಗಳು ನಿಂತಿವೆ ಎಂದು ಇನ್ಸ್ ಪೆಕ್ಟರ್ ಎಮ್.ಚಂದ್ರಪ್ಪ ತಿಳಿಸಿದ್ದಾರೆ.
ಏನಿದು ಪ್ರಕರಣ?
ಸೀಮಾ(ಹೆಸರು ಬದಲಾಯಿಸಲಾಗಿದೆ) ಬೆಳ್ಳಂದೂರು ಬಳಿಯ ಐಟಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಳು. ಇಲ್ಲಿ ಕೆಲಸ ಮಾಡುವಾಗ ಕಾರ್ತಿಕ್ (ಹೆಸರು ಬದಲಿಸಿದೆ) ಪರಿಚಯವಾಗಿದೆ. ಆತ ಚೆನ್ನೈನಿಂದ ಬೆಂಗಳೂರಿನ ಐಟಿ ಕಂಪನಿಗೆ ತರಬೇತಿಗಾಗಿ ಬಂದಿದ್ದನು. ಕೆಲಸದ ವೇಳೆ ಇಬ್ಬರಿಗೂ ಸ್ನೇಹ ಬೆಳೆದಿದೆ. ಆಗ ಸೀಮಾ ಕೆಲವು ಖಾಸಗಿ ಫೋಟೋಗಳನ್ನು ಕಾರ್ತಿಕ್ಗೆ ಕಳುಹಿಸಿದ್ದಳು. ಆದರೆ ಇವರಿಬ್ಬರ ಸ್ನೇಹದ ಬಗ್ಗೆ ಮನೆಯವರಿಗೆ ತಿಳಿದಿದ್ದು, ಇದಕ್ಕೆ ವಿರೋಧ ವ್ಯಕ್ತಪಡಿಸಿದ್ದಾರೆ. ಜೊತೆಗೆ ಸೀಮಾ ಪೋಷಕರು ಮದುವೆ ಮಾಡಲು ಬೇರೆ ಹುಡುಗನನ್ನು ನೋಡುತ್ತಿದ್ದರು.
ಕೊನೆಗೆ ಪೋಷಕರು ನೋಡಿದ ಹುಡುಗನನ್ನು ಸೀಮಾ ಮದುವೆಯಾಗಿದ್ದಳು. ಆದರೂ ಒಂದು ವರ್ಷಗಳ ಕಾಲ ಕಾರ್ತಿಕ್ ವಾಟ್ಸಪ್ ಮೂಲಕ ಮೆಸೇಜ್ ಮಾಡುತ್ತಿದ್ದನು. ಅಷ್ಟೇ ಅಲ್ಲದೇ ಪತಿಯನ್ನು ಬಿಟ್ಟು ನೀನು ನನ್ನ ಬಳಿ ಬಾ ಎಂದು ಒತ್ತಾಯಿಸಿದ್ದನು. ಇದಕ್ಕೆ ಸೀಮಾ ಒಪ್ಪಿಗೆ ನೀಡಿರಲಿಲ್ಲ. ಇದರಿಂದ ಕೋಪಗೊಂಡ ಕಾರ್ತಿಕ್ ಆಕೆಯ ಖಾಸಗಿ ಫೋಟೋಗಳನ್ನು ಬಹಿರಂಗಪಡಿಸುವುದಾಗಿ ಬೆದರಿಕೆ ಹಾಕಿದ್ದಾನೆ.
ಸೀಮಾಳ ಪತಿಗೂ ಫೋನ್ ಮಾಡಿ, ಸೀಮಾ ನಾನು ಹೇಳಿದ ರೀತಿ ಕೇಳಲಿಲ್ಲ ಎಂದರೆ ಆಕೆಯ ಫೋಟೋಗಳನ್ನು ನಿಮ್ಮ ಕುಟುಂಬದವರಿಗೆ ಕಳುಹಿಸುತ್ತೇನೆ ಎಂದು ಹೇಳಿದ್ದಾನೆ. ಕೊನೆಗೆ ಆತನ ಕಾಟಕ್ಕೆ ಬೇಸತ್ತು ಸೈಬರ್ ಕ್ರೈಂ ಪೊಲೀಸರಿಗೆ ದೂರು ಸಲ್ಲಿಸಿದ್ದಾರೆ.
