– ಅರ್ಜುನ್ ಕಪೂರ್ ಜತೆಗಿನ ಸಂಬಂಧ ರಿವೀಲ್ ಮಾಡಿದ ನಟಿ
ಮುಂಬೈ: ಪ್ರೀತಿಯಲ್ಲಿ ಎಲ್ಲರೂ ಎರಡನೇ ಅವಕಾಶಕ್ಕೆ ಅರ್ಹರು ಎಂದು ಹೇಳುವ ಮೂಲಕ ಬಾಲಿವುಡ್ ನಟಿ ಮಲೈಕಾ ಅರೋರಾ, ನಟ ಅರ್ಜುನ್ ಕಪೂರ್ ಜತೆಗಿನ ಸಂಬಂಧವನ್ನು ರಿವೀಲ್ ಮಾಡಿದ್ದಾರೆ.
ಮಾಧ್ಯಮವೊಂದು ನಡೆಸಿದ ಸಂದರ್ಶನದಲ್ಲಿ ಮಾತನಾಡಿದ ನಟಿ ಮಲೈಕಾ, ಪ್ರೀತಿಯಲ್ಲಿ ಪ್ರತಿಯೊಬ್ಬರಿಗೂ ಸೆಕೆಂಡ್ ಚಾನ್ಸ್ ಇರುತ್ತೆ ಹಾಗೂ ಅದಕ್ಕೆ ಎಲ್ಲರೂ ಅರ್ಹರು. ಪ್ರೀತಿಯಲ್ಲಿ ಮಹಿಳೆಗೆ ಎರಡನೇ ಚಾನ್ಸ್ ಕೊಡಬೇಕು. ಹಾಗೇ ನಾನು ಎರಡನೇ ಅವಕಾಶವನ್ನು ಹೆಚ್ಚು ಬಳಸಿಕೊಳ್ಳಬೇಕು ಎಂಬ ಅಭಿಪ್ರಾಯ ಹೊಂದಿರುವೆ ಎಂದು ಹೇಳಿದ್ದಾರೆ.
ಎರಡನೇ ಅವಕಾಶದ ವಿಚಾರವಾಗಿ ನಮ್ಮ ದೇಶದಲ್ಲಿ ಸಾಕಷ್ಟು ಸಮಸ್ಯೆ ಹಾಗೂ ಸನ್ನಿವೇಶವನ್ನು ನಿಭಾಯಿಸಬೇಕಾಗುತ್ತದೆ. ಹೀಗಾಗಿ ಕೆಲವು ಸಂಗತಿಗಳಿಗೆ ನಿಷೇಧ ಹೇರಲಾಗಿದೆ. ಅವೆಲ್ಲವನ್ನೂ ಕೈ ಚೆಲ್ಲಿ ನಾವು ತೆರೆದ ಮನಸ್ಸಿನಿಂದ ನೋಡಬೇಕು. ಆಗಲೇ ಜೀವನ ಸುಂದರವಾಗಿರಲು ಸಾಧ್ಯ ಎಂದು ಮಲೈಕಾ ಹೇಳಿದ್ದಾರೆ.
ಒಬ್ಬರ ಅಭಿಪ್ರಾಯಕ್ಕೆ ಇನ್ನೊಬ್ಬರು ಬೆಲೆ ಕೊಡಬೇಕು. ಒಬ್ಬರ ಪರಿಸ್ಥಿತಿಯನ್ನು ಮತ್ತೊಬ್ಬರು ಅರ್ಥಮಾಡಿಕೊಳ್ಳಬೇಕು ಎಂದು ತಿಳಿಸಿದ್ದಾರೆ. ಈ ಮೂಲಕ ನಟಿ ಮಲೈಕಾ ತಮ್ಮ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳುವಂತೆ ಪರೋಕ್ಷವಾಗಿ ಹೇಳಿದ್ದಾರೆ.
ಮಲೈಕಾ ಅರೋರಾ ಅವರು 1998ರಲ್ಲಿ ಸಲ್ಮಾನ್ ಖಾನ್ ಸಹೋದರ ಅರ್ಬಾಜ್ ಖಾನ್ ಅವರನ್ನು ಮದುವೆಯಾಗಿದ್ದರು. ಈ ಜೊಡಿಗೆ ಒಂದು ಮಗುವಿದೆ. ಆದರೆ 2017ರಲ್ಲಿ ಮಲೈಕಾ ಹಾಗೂ ಅರ್ಬಾಜ್ ಖಾನ್ ವಿಚ್ಛೇದನ ಪಡೆದು, ಬೇರೆಯಾಗಿದ್ದಾರೆ. ಈಗ ತಮಗಿಂತ 10 ವರ್ಷ ಚಿಕ್ಕವರಾಗಿರುವ ಅರ್ಜುನ್ ಕಪೂರ್ ಅವರ ಜೊತೆಗೆ ಸುತ್ತಾಡುತ್ತಿದ್ದು, ಪರಸ್ಪರ ಪ್ರೇಮ ಬಂಧನದಲ್ಲಿ ಬಂಧಿಯಾಗಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಇತ್ತೀಚೆಗಷ್ಟೇ ಸಾಮಾಜಿಕ ಜಾಲತಾಣದಲ್ಲಿ ನೆಟ್ಟಿಗರ ವಿರುದ್ಧ ಕಿಡಿಕಾರಿದ್ದ ಮಲೈಕಾ ಅವರು, ನಾನು ವಿಚ್ಛೇದನ ಪಡೆದ ಮೇಲೆ ಯಾರೊಂದಿಗಾದರೂ ಇರಬೇಕಾ ಎನ್ನುವ ಪ್ರಶ್ನೆಗೆ ನನಗೆ ಸ್ಪಷ್ಟತೆ ಇಲ್ಲ. ಏಕೆಂದರೆ ಮತ್ತೆ ಹಾರ್ಟ್ ಬ್ರೇಕ್ ಆಗಬಹುದೆಂಬ ಭಯದಿಂದ. ಆದರೆ ನನಗೆ ಮತ್ತೆ ಪ್ರೀತಿ ಬೇಕಿತ್ತು, ಸಂಬಂಧ ಬೇಕಿತ್ತು. ಇದರಿಂದ ನನಗೆ ಆತ್ಮ ವಿಶ್ವಾಸ ಬಂದಿದೆ. ಎರಡು ಮನಸ್ಸು ಹಾಗೂ ಹೃದಯ ಕನೆಕ್ಟ್ ಆದಾಗ ವಯಸ್ಸಿನ ವಿಷಯ ಸುಳಿಯೋದೇ ಇಲ್ಲ ಎಂದು ಹೇಳಿಕೊಂಡಿದ್ದರು.
ನನಗೆ ಡೈವೋರ್ಸ್ ಆದರೂ ನಿಮಗೆ ಸಮಸ್ಯೆ, ನಾನು ಮತ್ತೆ ಪ್ರೀತಿಯಲ್ಲಿದ್ದೇನೆ ಅಂದರೂ ಪ್ರಾಬ್ಲಂ. ನನ್ನ ಸಂಗಾತಿ ನನಗಿಂತ ಚಿಕ್ಕವನು ಎನ್ನವುದು ನಿಮಗೆ ಪ್ರಾಬ್ಲಂ. ಇದೆಲ್ಲಾ ನಿಮಗೆ ಅನ್ನಿಸಿರಬಹುದು. ಆದರೆ ನಿಮ್ಮ ಸಮಸ್ಯೆಗಳನ್ನು ನಾನು ಕೇರ್ ಮಾಡಲ್ಲ. ಎಲ್ಲರನ್ನೂ ಖುಷಿ ಪಡಿಸುವುದಕ್ಕೆ ನಾನಿಲ್ಲಿ ಇಲ್ಲ, ಅದರಲ್ಲೂ ಸಾಮಾಜಿಕ ಜಾಲತಾಣದಲ್ಲಿ ಗುರುತು-ಹೆಸರು ಇಲ್ಲದವರಿಗಾಗಿಯಂತೂ ಅಲ್ಲ ಎಂದು ಕಿಡಿಕಾರಿದ್ದರು.
