ಬೆಂಗಳೂರು: ಕಳ್ಳರಿಬ್ಬರು ಕುಡಿದ ಮತ್ತಿನಲ್ಲಿ ಬುಲೆಟ್ ಬೈಕ್ ಕದಿಯಲು ಹೋಗಿ ತಾವಾಗಿಯೇ ಪೊಲೀಸರಿಗೆ ಸಿಕ್ಕಿಬಿದ್ದ ಘಟನೆ ನಗರದ ಚಾಮರಾಜಪೇಟೆಯಲ್ಲಿ ನಡೆದಿದೆ.
ಕುಡುಕರ ಕಷ್ಟಗಳು ಒಂದಲ್ಲ ಎರಡಲ್ಲ, ಕುಡಿದ ಮತ್ತಿನಲ್ಲಿ ಏನೇನೂ ಮಾಡುತ್ತಾರೆ ಎಂಬುದು ಸ್ವತಃ ಅವರಿಗೆ ತಿಳಿದಿರುವುದಿಲ್ಲ. ಅಂತೆಯೇ ಇಲ್ಲಿ ಇಬ್ಬರು ಕುಡುಕ ಮಹಾಶಯರು ಕೈಯಲ್ಲಿ ಕಾಸಿಲ್ಲ ಅಂತ ಕಳ್ಳತನಕ್ಕೆ ಹೋಗಿ ರೆಡ್ ಹ್ಯಾಂಡಾಗಿ ಪೊಲೀಸರ ಕೈಗೆ ಸಿಕ್ಕಿಬಿದ್ದಾರೆ.
ಮಂಗಳವಾರ ರಾತ್ರಿ ಚಾಮರಾಜಪೇಟೆಯ ರಾಕೇಶ್ ಎಂಬವರ ಮನೆ ಮುಂದೆ ನಿಂತಿದ್ದ ಬುಲೆಟ್ ಕದಿಯಲು ಕುಡುಕ ಕಳ್ಳರಿಬ್ಬರು ಯತ್ನಿಸಿ, ಬೈಕಿನ ಲಾಕ್ ಕೂಡ ಮುರಿದು ಹತ್ತಿಕೊಳ್ಳುವ ಭರದಲ್ಲಿ ಬೈಕನ್ನು ಬೀಳಿಸಿಕೊಂಡಿದ್ದಾರೆ. ಬೈಕನ್ನು ಎತ್ತಲು ಹರಸಾಹಸ ಪಡುತ್ತಿರುವಾಗ ಗಸ್ತಿನಲ್ಲಿದ್ದ ಪೊಲೀಸರಿಗೆ ಇಬ್ಬರೂ ಸಿಕ್ಕಿಬಿದ್ದಿದ್ದಾರೆ.
ಮೊದಲೇ ಕುಡಿದ ಮತ್ತಿನಲ್ಲಿದ್ದ ಕಳ್ಳರಿಗೆ ಪೊಲೀಸರು ಬಂದ ಅರಿವಿಲ್ಲದೆ ಬೈಕ್ ಎತ್ತಿಕೊಳ್ಳುವ ಭರದಲ್ಲೇ ನಿರತರಾಗಿದ್ದರು. ಈ ವೇಳೆ ಪೊಲೀಸರು ಬಂದು ಇಬ್ಬರನ್ನು ವಶಕ್ಕೆ ಪಡೆದಿದ್ದಾರೆ. ಕಳ್ಳರ ಇಡೀ ದೃಶ್ಯಾವಳಿಗಳು ಹತ್ತಿರದ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
