ಡ್ರೈವಿಂಗ್ ಮಾಡ್ತಾ ಕಾರಿನಲ್ಲೇ ಪಾರ್ಟಿ ಮಾಡ್ತಿದ್ದ ಯುವತಿ- ಬೈಕಿಗೆ ಕಾರ್ ಡಿಕ್ಕಿಯಾಗಿ 20ರ ಯುವಕ ಸಾವು

ಹೈದರಾಬಾದ್: ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡ್ತಿದ್ದ ಯುವತಿಯೊಬ್ಬಳು ತನ್ನ ಕಾರಿನಿಂದ ಬೈಕ್‍ಗೆ ಡಿಕ್ಕಿ ಹೊಡೆದ ಪರಿಣಾಮ 20 ವರ್ಷದ ಯುವಕ ಸಾವನ್ನಪ್ಪಿದ ಘಟನೆ ರಾಯದುರ್ಗಂ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಶನಿವಾರ ರಾತ್ರಿ ನಡೆದಿದೆ.

ಬೋರಬಂದಾ ನಿವಾಸಿಯಾದ ಚಿರಂಜೀವಿ(20) ಮೃತ ದುರ್ದೈವಿ. ಘಟನೆಯಲ್ಲಿ ರಮಾನಾತಿ ಸಾಯಿ ಕುಮಾರ್ ಎಂಬವರು ಗಾಯಗೊಂಡಿದ್ದಾರೆ. ಜೆನ್ನಿ ಜೇಕಬ್(26) ವಾಹನ ಚಾಲನೆ ಮಾಡುತ್ತಲೇ ಕಾರಿನೊಳಗೆ ತನ್ನ ಸ್ನೇಹಿತೆ ಲೀಸಾ ಜೊತೆ ಪಾರ್ಟಿ ಮಾಡಿದ್ದು, ಈ ವೇಳೆ ಬೈಕ್‍ಗೆ ಡಿಕ್ಕಿ ಹೊಡೆದಿದ್ದಾಳೆ. ಜೆನ್ನಿ ಹಾಗೂ ಲೀಸಾ ದೆಹಲಿ ಮೂಲದವರಾಗಿದ್ದು, ಮಾಧಾಪುರ ಬಳಿಯ ಐಟಿ ಸಂಸ್ಥೆಯೊಂದರಲ್ಲಿ ಉದ್ಯೋಗಿಗಳಾಗಿದ್ದಾರೆ. ಕೊಕಪೇಟ್ ನ ಬ್ಲಾಸಮ್ ಅಪಾರ್ಟ್‍ಮೆಂಟ್ ನಲ್ಲಿ ವಾಸವಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಇಬ್ಬರೂ ನಗರದಲ್ಲಿ ಝೂಮ್ ಕಾರ್ ನಿಂದ ಹೂಂಡೈ ಕ್ರೇಟಾ ಕಾರ್ ಬಾಡಿಗೆಗೆ ಪಡೆದಿದ್ದರು. ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡಿದ್ದು, ಜೆನ್ನಿ ಮಾಧಾಪುರ ದಿಂದ ರಾಯದುರ್ಗಂ ಕಡೆಗೆ ಹೊರಟಿದ್ದಳು. ಅತೀ ವೇಗವಾಗಿ ಕಾರ್ ಚಾಲನೆ ಮಾಡ್ತಿದ್ದ ಜೆನ್ನಿ, ಹೊಂಡಾ ಆ್ಯಕ್ಟೀವಾದಲ್ಲಿ ಬರ್ತಿದ್ದ ಚಿರಂಜೀವಿ ಹಾಗೂ ಸಾಯಿ ಕುಮಾರ್‍ಗೆ ಡಿಕ್ಕಿ ಹೊಡೆದಿದ್ದಾಳೆ.

ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ಚಿರಂಜೀವಿ ಹಾಗೂ ಸಾಯಿ ಕುಮಾರ್ ಅವರನ್ನ ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದ್ರೆ ಚಿಕಿತ್ಸೆ ವೇಳೆ ಚಿರಂಜೀವಿ ಸಾವನ್ನಪ್ಪಿದ್ದು, ಸಾಯಿ ಕುಮಾರ್ ಸ್ಥಿತಿ ಗಂಭೀರವಾಗಿದೆ ಎಂದು ವರದಿಯಾಗಿದೆ. ಬೈಕಿಗೆ ಡಿಕ್ಕಿ ಹೊಡೆದ ಬಳಿಕ ಕಾರ್ ಮೂರು ಬಾರಿ ಪಲ್ಟಿಯಾಗಿದೆ. ಆದ್ರೆ ಕಾರಿನ ಏರ್‍ಬ್ಯಾಗ್ಸ್‍ನಿಂದ ಜೆನ್ನಿ ಹಾಗೂ ಲೀಸಾಳ ಪ್ರಾಣ ಉಳಿದಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಪೊಲೀಸರು ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದು ತನಿಖೆ ನಡೆಸುತ್ತಿದ್ದಾರೆ.