ಬೆಂಗಳೂರು: ಈ ವಾರ ಥಿಯೇಟರ್ ಅಖಾಡದಲ್ಲಿ ಗ್ಲಾಮರ್ ಗೊಂಬೆಗಳು ಹಾಗೂ ಕಾಮಿಡಿ ಕಿಂಗ್‍ಗಳದ್ದೇ ದರ್ಬಾರ್. ಹೀರೋಗಳಿಗೆ ನಾವೇನು ಕಮ್ಮಿಯಿಲ್ಲ ಅಂತ ತೋರ್ಸೋದಕ್ಕೆ ಐದು ಜನ ನಟಿಮಣಿಯರು ರೆಡಿಯಾಗಿದ್ದಾರೆ. ಇತ್ತ ಡಬಲ್ ಇಂಜಿನ್ ಮೂಲಕ ಕಾಮಿಡಿ ಟಾನಿಕ್ ನಿಡೋಕೆ ಚಿಕ್ಕಣ್ಣ ಮತ್ತು ಗ್ಯಾಂಗ್ ಸಜ್ಜಾಗಿದೆ.
ಸಿನಿ ಶುಕ್ರವಾರದಂದು ಚಿತ್ರಮಂದಿರಕ್ಕೆ ಭಿನ್ನ-ವಿಭಿನ್ನ ಸಿನಿಮಾಗಳು ಲಗ್ಗೆ ಇಡುತ್ತವೆ. ಶಿಳ್ಳೆ-ಚಪ್ಪಾಳೆಯನ್ನ ಗಿಟ್ಟಿಸಿಕೊಳ್ಳೋಕೆ ಎಂಎಂಸಿಎಚ್ ಹಾಗೂ ಡಬಲ್ ಇಂಜಿನ್ ಸಿನಿಮಾಗಳು ಸಜ್ಜಾಗಿವೆ. `ಎಂಎಂಸಿಎಚ್’ ಟೈಟಲ್‍ನಿಂದಲೇ ಈ ಸಿನಿಮಾ ಕೂತೂಹಲ ಮೂಡಿಸಿದೆ. ಮೇಘನಾ ರಾಜ್, ಸಂಯುಕ್ತಾ ಬೆಳವಾಡಿ, ನಕ್ಷತ್ರಾ, ಪ್ರಥಮಾ ಲೀಡ್ ರೋಲ್‍ನಲ್ಲಿ ಮಿಂಚಿದ್ದು, ಇನ್ವೆಸ್ಟಿಗೇಷನ್ ಆಫೀಸರ್ ಪಾತ್ರದಲ್ಲಿ ರಾಗಿಣಿ ಖದರ್ ತೋರ್ಸೋಕೆ ಹೊರಟಿದ್ದಾರೆ.
ನೈಜ ಘಟನೆ ಆಧಾರಿತ ಸಿನಿಮಾಗಳನ್ನು ತೆರೆ ಮೇಲೆ ಅದ್ಭುತವಾಗಿ ಕಟ್ಟಿಕೊಡುವ ನಿರ್ದೇಶಕ ಮುಸ್ಸಂಜೆ ಮಹೇಶ್, ಮತ್ತೊಮ್ಮೆ ರಿಯಲ್ ಇನ್ಸಿಡೆಂಟ್ ಬೇಸ್ಡ್ ಕಥೆಯನ್ನೊಳಗೊಂಡಿರುವ ಎಂಎಂಸಿಎಚ್ ಚಿತ್ರವನ್ನ ಪ್ರೇಕ್ಷಕರಿಗೆ ಉಣಬಡಿಸಲು ಹೊರಟಿದ್ದಾರೆ. ಕಾಲೇಜ್ ಲವ್‍ಸ್ಟೋರಿ ಜತೆಗೆ ಮರ್ಡರ್ ಮಿಸ್ಟರಿ ಕಥೆಯನ್ನು ಬ್ಲೆಂಡ್ ಮಾಡಿ ಎಂಎಂಸಿಎಚ್ ಚಿತ್ರಕಥೆಯನ್ನ ಹೆಣೆದಿದ್ದಾರೆ. ಯೂಟ್ಯೂಬ್‍ನಲ್ಲಿ ಟ್ರೇಲರ್ ಸೂಪರ್ ಹಿಟ್ಟಾಗಿದ್ದು, ಸಿನಿಮಾ ಬಗ್ಗೆ ಕೂತೂಹಲ ಕಾಯ್ದಿರಿಸಿದೆ.
ಚಂದ್ರಮೋಹನ್ ಆ್ಯಕ್ಷನ್ ಕಟ್ ಹೇಳಿರುವ `ಡಬಲ್ ಇಂಜಿನ್’ ಸಿನಿಮಾ ಕೂಡ ಈ ವಾರ ತೆರೆಗೆ ಬರ್ತಿದೆ. ಕಾಮಿಡಿ ಡ್ರಾಮವನ್ನೊಳಗೊಂಡಿರುವ ಈ ರೊಮ್ಯಾಂಟಿಕ್ ಸಿನಿಮಾದಲ್ಲಿ ಚಿಕ್ಕಣ್ಣ, ಅಶೋಕ್, ಪ್ರಭು, ಸುಮನ್ ರಂಗನಾಥ್, ಪ್ರಿಯಾಂಕಾ ಮಲ್ನಾಡ್, ದತ್ತಣ್ಣ, ಸಾಧು ಕೋಕಿಲ ಸೇರಿದಂತೆ ಹಲವರು ಮುಖ್ಯಪಾತ್ರದಲ್ಲಿ ಮಿಂಚಿದ್ದಾರೆ. ಎಸ್‍ಆರ್‍ಎಸ್ ಎಂಟರ್ ಪ್ರೈಸಸ್ ನಿರ್ಮಾಣದಲ್ಲಿ `ಡಬಲ್ ಇಂಜಿನ್’ ರೆಡಿಯಾಗಿದೆ. ಒಟ್ಟಿನಲ್ಲಿ ಟ್ರೇಲರ್ ಮೂಲಕ ಸೌಂಡ್ ಮಾಡಿದಂತಹ ಈ ಎರಡು ಸಿನಿಮಾಗಳು ಥಿಯೇಟರ್ ಅಖಾಡದಲ್ಲಿ ಯಾವ ರೀತಿ ಸದ್ದು ಮಾಡುತ್ತವೆ ಅನ್ನೋದನ್ನ ಕಾದುನೋಡಬೇಕಿದೆ.
