ವಾಷಿಂಗ್ಟನ್: ಭಾರತ, ಪಾಕಿಸ್ತಾನ (India, Pakistan) ಮಧ್ಯೆ ನಡೆದ ಆಪರೇಷನ್ ಸಿಂಧೂರ ಕಾರ್ಯಾಚರಣೆ ವೇಳೆ ಇಲ್ಲಿಯವರೆಗೆ 6,7,8 ವಿಮಾನಗಳು ಹೊಡೆದು ಹಾಕಲಾಗಿದೆ ಎಂದು ಎಂದಿದ್ದ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಈಗ ಈ ಸಂಖ್ಯೆಯನ್ನು ದಿಢೀರ್ 11ಕ್ಕೆ ಏರಿಸಿದ್ದಾರೆ.
ಗಾಜಾ ಶಾಂತಿ ಮಂಡಳಿಯ (Gaza Peace Board) ಉದ್ಘಾಟನಾ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು ಆರಂಭದಲ್ಲೇ ಎಂಟು ಯುದ್ಧಗಳನ್ನು ನಾನು ಕೊನೆಗೊಳಿಸಿದ್ದೇನೆ ಎಂದು ತನ್ನ ಬೆನ್ನನ್ನು ತಾನೇ ತಟ್ಟಿಕೊಂಡರು. ಹಲವು ವಿಚಾರಗಳನ್ನು ಪ್ರಸ್ತಾಪ ಮಾಡಿದ ಬಳಿಕ ಭಾರತ-ಪಾಕಿಸ್ತಾನ ಯುದ್ಧದ ಸಮಯದಲ್ಲಿ 11 ಜೆಟ್ಗಳನ್ನು (11 Jets) ಹೊಡೆದುರುಳಿಸಲಾಗಿದೆ. ಕಾದಾಟ ಮುಂದುವರಿಸಿದ್ದರೆ ಎರಡೂ ದೇಶಗಳ ಮೇಲೆ 200% ರಷ್ಟು ಸುಂಕ ವಿಧಿಸುವ ಬೆದರಿಕೆ ಹಾಕಿದ್ದೆ ಎಂದು ಮತ್ತೆ ಬುರುಡೆ ಬಿಟ್ಟರು.
ಎರಡು ನೂಕ್ಲಿಯರ್ ಪವರ್ ದೇಶಗಳ ಯುದ್ಧವನ್ನು ನಾನು ನಿಲ್ಲಿಸಿದ್ದೇನೆ ಎಂದು ಆಗಾಗ ಹೇಳಿಕೊಂಡು ಬರುತ್ತಿರುವ ಟ್ರಂಪ್ ಹಲವು ಬಾರಿ ಹೊಡೆದು ಹಾಕಿದ ವಿಮಾನಗಳ ಸಂಖ್ಯೆಯನ್ನು ಹೇಳಿಕೊಂಡೇ ಬರುತ್ತಿದ್ದಾರೆ. ಆರಂಭದಲ್ಲಿ 6 ಎಂದಿದ್ದ ಅವರು ಹಂತ ಹಂತವಾಗಿ ಸಂಖ್ಯೆಯನ್ನು ಏರಿಸುತ್ತಿದ್ದಾರೆ. ಜನವರಿಯಲ್ಲಿ 8 ಎಂದಿದ್ದ ಅವರು ಫೆ.11 ರಂದು 10 ಎಂದಿದ್ದರು. ಈಗ ಈ ಸಂಖ್ಯೆಯನ್ನು 11ಕ್ಕೆ ಏರಿಸಿ ಯುದ್ಧ ನಿಲ್ಲಿಸಿದ ಕ್ರೆಡಿಟ್ ಪಡೆದುಕೊಂಡರು.
ಶಾಂತಿ ಮಂಡಳಿಯ ಸದಸ್ಯ ರಾಷ್ಟ್ರಗಳನ್ನು ಸ್ವಾಗತಿಸಿದ ಅವರು, ಕೆಲವು ನ್ಯಾಟೋ ಮಿತ್ರರಾಷ್ಟ್ರಗಳು ಈ ಮಂಡಳಿಯನ್ನು ಸೇರಲು ಹಿಂಜರಿಯುತ್ತಿವೆ. ಆದರೆ ಅಂತಿಮವಾಗಿ ಮಂಡಳಿಯಲ್ಲಿ ಸೇರುತ್ತವೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು. ಇದನ್ನೂ ಓದಿ: ಮಧ್ಯಪ್ರಾಚ್ಯದಲ್ಲಿ ಭಾರೀ ಯುದ್ಧ ವಿಮಾನಗಳ ನಿಯೋಜನೆ – ಇರಾನ್ ಮೇಲೆ ಯಾವುದೇ ಸಮಯದಲ್ಲಿ ಅಮೆರಿಕ ದಾಳಿ ಸಾಧ್ಯತೆ
Rhetoric continues… 6, 7, 8, 9, 10… now 11 jets down 🤣
“11 jets shot down, very expensive jets…,” says Trump on India-Pakistan 4 days conflict. pic.twitter.com/lhHowKNDM8
— OsintTV 📺 (@OsintTV) February 19, 2026
ಉಕ್ರೇನ್-ರಷ್ಯಾ ನಡುವಿನ ಯುದ್ಧ ಬಗೆಹರಿಯದೆ ಉಳಿದಿದೆ ಎಂದು ಒಪ್ಪಿಕೊಂಡ ಅವರು ಎಂಟು ಸಂಘರ್ಷಗಳನ್ನು ನಾನು ಕೊನೆಗೊಳಿಸಿದ್ದೇನೆ. ಒಂಬತ್ತನೆಯದು ಶೀಘ್ರದಲ್ಲೇ ಇತ್ಯರ್ಥವಾಗಬಹುದು ಎಂದರು.
ಇರಾನ್ ಜೊತೆಯ ಸಂಘರ್ಷವನ್ನು ಪ್ರಸ್ತಾಪಿಸಿದ ಅವರು ರಾಯಭಾರಿ ಸ್ಟೀವ್ ವಿಟ್ಕಾಫ್ ಮತ್ತು ಅವರ ಅಳಿಯ ಜೇರೆಡ್ ಕುಶ್ನರ್ ನೇತೃತ್ವದ ರಾಜತಾಂತ್ರಿಕ ಪ್ರಯತ್ನಗಳನ್ನು ಶ್ಲಾಘಿಸಿದರು.
ಯಾವುದೇ ಒಪ್ಪಂದವು ಅರ್ಥಪೂರ್ಣವಾಗಿರಬೇಕು. ಒಪ್ಪಂದವನ್ನು ಒಪ್ಪಿಕೊಳ್ಳದೇ ಗಂಭೀರ ಪರಿಣಾಮಗಳು ಉಂಟಾಗಬಹುದು. ಇರಾನ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ಪಡೆಯಬಾರದು. ಅಣ್ವಸ್ತ್ರ ಪಡೆದರೆ ಮಧ್ಯಪ್ರಾಚ್ಯದಲ್ಲಿ ಶಾಂತಿ ಅಸಾಧ್ಯ ಎಂದರು.
