ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ (Deepika Padukone) ಇದೇ ತಿಂಗಳು ಚೊಚ್ಚಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಸಪ್ಟೆಂಬರ್ ೨೮ ಕ್ಕೆ ಪ್ರಸವದ ಡೇಟ್ ಕೊಟ್ಟಿದ್ದಾರೆ ಎನ್ನಲಾಗುತ್ತೆ. ಇದೇ ವೇಳೆ ದೀಪಿಕಾ ಗಣೇಶ ಹಬ್ಬದ ವಿಶೇಷವಾಗಿ ಸಿದ್ಧಿವಿನಾಯಕನ ದರ್ಶನ ಪಡೆದಿದ್ದಾರೆ. ಪತಿ ರಣ್ವೀರ್ ಸಿಂಗ್ ಜೊತೆ ದೀಪಿಕಾ ದೇವಸ್ಥಾನಕ್ಕೆ ಭೇಟಿ ಕೊಟ್ಟಿದ್ದಾರೆ.
ಹಸಿರುಬಣ್ಣದ ಕಾಂಚೀವರಂ ಸೀರೆ ಧರಿಸಿದ್ದ ದೀಪಿಕಾ ಮುಖದಲ್ಲಿ ಹಬ್ಬದ ಕಳೆ ಜೊತೆ ಗರ್ಭಿಣಿ ಕಳೆಯೂ ಕಂಡುಬಂತು. ದೇವಸ್ಥಾನದ ಆವರಣ ಆಗಿರೋದ್ರಿಂದ ಬರಿಕಾಲಲ್ಲೇ ಹೆಜ್ಜೆ ಹಾಕಿದ್ರು. ತುಂಬು ಗರ್ಭಿಣಿ ದೀಪಿಕಾಳ ಕೈ ಹಿಡಿದು ಹೆಜ್ಜೆ ಹಾಕಿದ್ದಾರೆ ಪತಿ ರಣ್ವೀರ್ ಸಿಂಗ್. ಪ್ರತಿ ವರ್ಷವೂ ಗಣೇಶ ಹಬ್ಬಕ್ಕೆ ದೀಪಿಕಾ ಇಲ್ಲಿಗೆ ಭೇಟಿ ಕೊಡುವ ರೂಢಿ ಪಾಲಿಸಿಕೊಂಡು ಬಂದಿರುವ ದೀಪಿಕಾ ರಣ್ವೀರ್ ದಂಪತಿ ಈ ಬಾರಿಯೂ ತಪ್ಪದೆ ಆಗಮಿಸಿದ್ದು ವಿಶೇಷ.
ಮುಂಬೈನಲ್ಲಿರುವ ಸುಪ್ರಸಿದ್ಧ ಸಿದ್ಧಿವಿನಾಯಕ ದೇವಸ್ಥಾನಕ್ಕೆ ಗಣೇಶ ಹಬ್ಬದ ವೇಳೆ ಹಲವು ಸೆಲೆಬ್ರಿಟಿಗಳು ಆಗಮಿಸೋದುಂಟು. ಹಾಗೆಯೇ ಈ ಬಾರಿ ಗಣೇಶ ಹಬ್ಬಕ್ಕೆ ದೀಪಿಕಾ ರಣ್ವೀರ್ ದಂಪತಿ ಕುಟುಂಬ ಸಮೇತ ಆಗಮಿಸಿ ವಿನಾಯಕನ ದರ್ಶನ ಪಡೆದಿದ್ದಾರೆ. ಹೆರಿಗೆ ಸಮಯ ಹತ್ತಿರ ಬಂದಂತೆ ಸಾಮಾನ್ಯವಾಗಿ ಸೆಲೆಬ್ರಿಟಿಗಳು ಮನೆಯೊಳಗೆ ಇದ್ದು ರೆಸ್ಟ್ ಮಾಡ್ತಾರೆ, ಆದರೆ ದೀಪಿಕಾ ಭಕ್ತಿಯಿಂದ ದೇವಸ್ಥಾನಕ್ಕೆ ಆಗಮಿಸಿದ್ದು ಗಮನ ಸೆಳೆದಿದೆ.
