ದೇವಿರಮ್ಮನ ದರ್ಶನದಿಂದ ದೀಪಾವಳಿಗೆ ಚಾಲನೆ – ಏನಿದು ಮಲೆನಾಡಿಗರ ಹಬ್ಬದ ವಿಶೇಷ?

Public TV
1 Min Read
DEVIRAMMA

ರ್ಷಕ್ಕೆ ಒಂದು ಬಾರಿ ದರ್ಶನ ನೀಡುವ ದೇವಿರಮ್ಮನ (Deviramma Temple) ದರ್ಶನದ ಮೂಲಕ ಕಾಫಿನಾಡಿನ ಜನರ ದೀಪಾವಳಿ (Deepavali) ಹಬ್ಬಕ್ಕೆ ಅಧಿಕೃತ ಚಾಲನೆ ಸಿಗುತ್ತದೆ. ಸುಮಾರು 3,000 ಅಡಿ ಎತ್ತರ ಇರುವ ಬೆಟ್ಟವನ್ನು ನರಕಚತುರ್ದಶಿಯಂದು ಹತ್ತಿ ಭಕ್ತರು ವಿಶೇಷ ಪೂಜೆಯಲ್ಲಿ ಭಾಗಿಯಾಗುತ್ತಾರೆ.

3800 ಅಡಿ ಎತ್ತರದ ಬೆಟ್ಟದ ಮೇಲಿರುವ ದೇವಿರಮ್ಮ ವರ್ಷಕ್ಕೊಮ್ಮೆ ದರ್ಶನ ನೀಡುತ್ತಾಳೆ. ಲಕ್ಷಾಂತರ ಭಕ್ತರು ಬರಿಗಾಲಿನಲ್ಲಿ ಬೆಟ್ಟ ಏರಿ ದೇವಿಯ ದರ್ಶನ ಪಡೆಯುತ್ತಾರೆ. ಮೈಸೂರು ಅರಮನೆಯಿಂದಲೂ ಪೂಜಾ ಸಾಮಗ್ರಿಗಳು ಈ ದೇವಾಲಯಕ್ಕೆ ಬರುತ್ತವೆ.

ಹರಕೆ ಹೊತ್ತ ಭಕ್ತರು ಬಳೆ, ತುಪ್ಪದ ಬಟ್ಟೆ, ಕಟ್ಟಿಗೆಯನ್ನು ಹೊತ್ತು ಸಾಗಿ ದೇವಿಗೆ ಸಮರ್ಪಿಸಿದ್ದಾರೆ. ದೇವಿರಮ್ಮ ಬೆಟ್ಟ ಏರಲು ನಿರ್ದಿಷ್ಟ ದಾರಿಯಿಲ್ಲ ಕಲ್ಲು-ಮಳ್ಳಿನ ಕಡಿದಾದ ಹಾದಿಯಲ್ಲೇ ಸಾಗಬೇಕು. ಬೆಟ್ಟದ ತುದಿಯಲ್ಲಿ ಪ್ರತಿಷ್ಠಾಪಿಸುವ ದೇವಿಯ ದರ್ಶನವಾದ ಬಳಿಕ ಕುಳಿತುಕೊಳ್ಳದೇ ಬೆಟ್ಟದಿಂದ ಇಳಿಯಬೇಕು ಎಂಬುದು ವಿಶೇಷ ನಿಯಮ!

Chikkamagaluru Bindiga Deviramma

ಈ ರೀತಿ ಆರಂಭಗೊಳ್ಳುವ ದೀಪಾವಳಿ, ಮೂರು ದಿನಗಳ ಕಾಲ ವಿಶೇಷ ಆಚರಣೆಗಳೊಂದಿಗೆ ಕಾಫಿನಾಡಿನೆಲ್ಲೆಡೆ ಮುಂದುವರಿಯುತ್ತದೆ. ಇದೇ ರೀತಿ ದೀಪಾವಳಿಯ ಕೊನೆಯ ದಿನ ರೈತರು ಆಚರಿಸುವ ದೀಪದ ಕೋಲು ಸಂಪ್ರದಾಯ ಬಹಳ ವಿಭಿನ್ನವಾಗಿದೆ. ಈ ಆಚರಣೆ ಮಲೆನಾಡಿನ ಭಾಗದಲ್ಲಿ ಮಾತ್ರ ಆಚರಣೆ ಮಾಡುತ್ತಾರೆ.

ಏನಿದು ದೀಪದ ಕೋಲು?
ದೀಪದ ಕೋಲು ಎಂದರೆ ಮಲೆನಾಡ ಭಾಗದಲ್ಲಿ ಸಿಗುವ ದೂಪದ ಮರದಿಂದ ಸಿಕ್ಕ ದ್ರವವನ್ನು ತೆಗೆದು ಗಟ್ಟಿಯಾಗಿಸಿ ಬಳಿಕ ಪುಡಿ ಮಾಡಿ ಬೇಯಿಸಿಕೊಂಡು ಕೋಲುಗಳಿಗೆ ಸುತ್ತಿ ಅದನ್ನು ಭೂಮಿ ಪೂಜೆಗೆ ಬಳಸುತ್ತಾರೆ.

ಈ ದೀಪದ ಕೋಲನ್ನು ಹಾಡು ಹೇಳುವ ಮೂಲಕ ಜಮೀನಿನಲ್ಲಿ ಹಚ್ಚಿ ಪೂಜೆ ಮಾಡಲಾಗುತ್ತದೆ. ಈ ದೀಪದ ಕೋಲನ್ನು ಹಚ್ಚುವುದರಿಂದ ಮನೆ, ಹೊಲ, ಗದ್ದೆಗಳಿಗೆ ಯಾವುದೇ ದುಷ್ಟಶಕ್ತಿಯ ಸಮಸ್ಯೆ ಎದುರಾಗುವುದಿಲ್ಲ ಎಂಬ ನಂಬಿಕೆ ಇದೆ.

ಈ ದೀಪದ ಕೋಲನ್ನು ಇಟ್ಟು ಪೂಜಿಸಿದ ಬಳಿಕ ಮನೆಯಲ್ಲಿ ಮಾಡಿದ ಅಡುಗೆಗಳನ್ನು ಎಡೆಯಾಗಿ ಇಡಲಾಗುತ್ತದೆ. ಈ ದೀಪದ ಬೆಳಕಲ್ಲಿ ಅಗಲಿದ ಕುಟುಂಬದ ಹಿರಿಯರು ಬಂದು ಊಟ ಮಾಡುತ್ತಾರೆ ಎನ್ನುವ ನಂಬಿಕೆ ಸಹ ಮಲೆನಾಡಿಗರದ್ದು.

Share This Article