ತಿನ್ತಾ ಇರೋವಾಗ ಡ್ಯಾಡಿ ಕಾದ ಕಬ್ಬಿಣದ ಸೌಟಿನಿಂದ ಹೊಡೆದ್ರು- 4ರ ಹೆಣ್ಣು ಮಗು ಕಣ್ಣೀರು!

ಹೈದರಾಬಾದ್: ತಾಯಿ ಹಾಗೂ ಆಕೆಯ ಲವ್ವರ್ ಸೇರಿಕೊಂಡು 4 ವರ್ಷದ ಪುಟ್ಟ ಕಂದಮ್ಮನಿಗೆ ಬಿಸಿಯಾದ ಕಬ್ಬಿಣದ ಸೌಟಿನಿಂದ ಹೊಡೆದು ಗಾಯಗೊಳಿಸಿದ ಘಟನೆ ಹೈದರಾಬಾದ್ ನಲ್ಲಿ ನಡೆದಿದೆ.

ಘಟನೆಯ ಬಳಿಕ ಇದೀಗ ಕಂದಮ್ಮನನ್ನು ಎನ್‍ಜಿಒ ಕಾರ್ಯಕರ್ತರು ರಕ್ಷಿಸಿದ್ದಾರೆ. ಬಳಿಕ ಪುಟ್ಟ ಕಂದಮ್ಮ ನಡೆದ ಘಟನೆಯನ್ನು ವಿವರಿಸಿದ್ದಾಳೆ. `ನಾನು ತಿನ್ನುತ್ತಾ ಇರೋವಾಗ ಡ್ಯಾಡಿ ಬಂದು ನಂಗೆ ಹೊಡೆದ್ರು. ಅಲ್ಲದೇ ನಂತರ ಕಾದ ಕಬ್ಬಿಣದ ಸೌಟಿನಿಂದ ನನ್ನ ಹಿಂಬದಿಗೆ ಒತ್ತಿ ಇಟ್ಟರು. ಅಲ್ಲದೇ ಅಮ್ಮನೂ ಚುಚ್ಚಿದ್ದಾಳೆ ಅಂತ ಜೋರಾಗಿ ಅಳುತ್ತಾ ಕಾರ್ಯಕರ್ತರಲ್ಲಿ ತನ್ನ ದುಃಖ ತೋಡಿಕೊಂಡಿದ್ದಾಳೆ.

ತಂದೆಯ ಕೃತ್ಯದಿಂದ ಕಂದಮ್ಮ ಜೋರಾಗಿ ಕಿರುಚಾಡಿಕೊಂಡಿದ್ದನ್ನು ಕೇಳಿದ ಸ್ಥಳೀಯರು ಕೂಡಲೇ ಸ್ಥಳೀಯ ರಾಜಕಾರಣಿಗಳಿಗೆ ವಿಷಯ ಮುಟ್ಟಿಸಿದ್ದಾರೆ. ಅವರು ತಕ್ಷಣವೇ ಎನ್‍ಜಿಓಗೆ ಮಾಹಿತಿ ರವಾನಿಸಿದ್ದು, ಸದ್ಯ ಹೆಣ್ಣು ಮಗುವನ್ನು ರಕ್ಷಿಸಲಾಗಿದೆ ಅಂತ ಕಾರ್ಯಕರ್ತ ಅಚ್ಯುತ್ ರಾವ್ ತಿಳಿಸಿದ್ದಾರೆ. ಸದ್ಯ ಘಟನೆ ಸಂಬಂಧ ತಾಯಿ ಹಾಗೂ ಆಕೆಯ ಲವ್ವರ್ ವಿರುದ್ಧ ದೂರು ದಾಖಲಿಸಿಕೊಳ್ಳಲಾಗಿದೆ.

ಘಟನೆಗೆ ಸಂಬಂಧಿಸಿದಂತೆ ತನಿಖೆ ನಡೆಸಿದಾಗ, 25 ವರ್ಷದ ತಾಯಿ ಈಗಾಗಲೇ ಗಂಡನನ್ನು ತೊರೆದು ಲವ್ವರ್ ಜೊತೆ ವಾಸವಾಗಿದ್ದಾಳೆ. ಆದ್ರೆ ಇತ್ತೀಚೆಗೆ ಇವರಿಬ್ಬರ ಮಧ್ಯೆ ಕ್ಷುಲ್ಲಕ ವಿಚಾರಕ್ಕೆ ಸಂಬಂಧಿಸಿದಂತೆ ಗಲಾಟೆ ನಡೆದಿದೆ. ಹೀಗಾಗಿ ತಮ್ಮ ಮೇಲಿನ ಸಿಟ್ಟನ್ನು ಮಗುವಿನ ಮೇಲೆ ತೋರಿರುವುದಾಗಿ ಬಾಯ್ಬಿಟ್ಟಿದ್ದಾಳೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv