ಅಂಧ ಮಗನಿಗೆ ಲೈವ್ ಫುಟ್‍ಬಾಲ್ ಪಂದ್ಯವನ್ನು ನಿರೂಪಣೆ ಮಾಡಿದ ತಂದೆ

– ತಂದೆಯ ಪ್ರೇಮಕ್ಕೆ ನೆಟ್ಟಿಗರು ಫಿದಾ

ಕೊಲಂಬಿಯಾ: ತನ್ನ ಕಣ್ಣು ಕಾಣದ ಮಗನಿಗೆ ತಂದೆಯೋರ್ವ ಲೈವ್ ಫುಟ್‍ಬಾಲ್ ಪಂದ್ಯವನ್ನು ನಿರೂಪಣೆ ಮಾಡಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ.

ಕೊಲಂಬಿಯಾದ ಬ್ಯಾರನ್ಕ್ವಿಲ್ಲಾದ ಎಸ್ಟಾಡಿಯೊ ಮೆಟ್ರೊಪಾಲಿಟಾನೊ ರಾಬರ್ಟೊ ಮೆಲೆಂಡೆಜ್‍ನಲ್ಲಿ ಆಡಿದ ಫುಟ್‍ಬಾಲ್ ಪಂದ್ಯದ ಸಂದರ್ಭದಲ್ಲಿ ಈ ವಿಡಿಯೋವನ್ನು ಸ್ಥಳೀಯರೊಬ್ಬರು ಶೂಟ್ ಮಾಡಿದ್ದಾರೆ. ಈ ವಿಡಿಯೋದಲ್ಲಿ ತಂದೆಯ ಪ್ರೀತಿಯನ್ನು ನೋಡಿದ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

https://www.instagram.com/p/B8q8uwgJDXX/

ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಈ ವಿಡಿಯೋವನ್ನು ಜೂನಿಯರ್ ಡೆ ಬ್ಯಾರನ್ಕ್ವಿಲ್ಲಾ ಎಫ್‍ಸಿ ಫುಟ್‍ಬಾಲ್ ತಂಡದ ಫ್ಯಾನ್ ಪೇಜ್‍ವೊಂದು ಶೇರ್ ಮಾಡಿದ್ದು, ಈ ವಿಡಿಯೋದಲ್ಲಿ ಬ್ಯಾರನ್ಕ್ವಿಲ್ಲಾ ತಂಡದ ಜೆರ್ಸಿ ತೊಟ್ಟು ಬಂದಿರುವ ಅಪ್ಪ ಮತ್ತು ಮಗ ಕಾಣಿಸಿಕೊಂಡಿದ್ದಾರೆ. ಜೊತೆಗೆ ಕಣ್ಣು ಕಾಣದ ಮಗನಿಗೆ ತಂದೆ ಪಕ್ಕದಲ್ಲಿ ಕುಳಿತುಕೊಂಡು, ಪಂದ್ಯದ ಸಂಪೂರ್ಣ ವಿವರಣೆಯನ್ನು ನೀಡುತ್ತಿರುವುದನ್ನು ನಾವು ಕಾಣಬಹುದು.

ಈ ವಿಡಿಯೋವನ್ನು ಶೇರ್ ಮಾಡಿರುವ ಬ್ಯಾರನ್ಕ್ವಿಲ್ಲಾ ಫ್ಯಾನ್ ಪೇಜ್, ನಿನ್ನೆ ಮೆಟ್ರೋಪಾಲಿಟನ್ ಸ್ಟೇಡಿಯಂನಲ್ಲಿ ನಾನು ಒಂದು ಸುಂದರ ದೃಶ್ಯವನ್ನು ನೋಡಿದೆ. ಅದನ್ನು ನಾನು ನಿಮ್ಮ ಜೊತೆ ಹಂಚಿಕೊಳ್ಳಲು ಇಷ್ಟಪಡುತ್ತೇನೆ. ಈ ವಿಡಿಯೋದಲ್ಲಿ ಆ ತಂದೆಗೆ ಮಗನ ಮೇಲೆ ಇರುವ ಪ್ರೀತಿ ನೋಡಿದರೆ ತುಂಬ ಖುಷಿಯಾಗುತ್ತದೆ. ಅವರು ಮಗನ ಮೇಲೆ ಇಟ್ಟಿರುವ ಪ್ರೀತಿಯನ್ನು ನಮ್ಮ ತಂಡದ ಮೇಲೂ ಇಟ್ಟಿರುವುದಕ್ಕೆ ಬಹಳ ಸಂತೋಷವಾಗಿದೆ ಎಂದು ಬರೆದುಕೊಂಡಿದ್ದಾರೆ.

ತಂದೆಯ ಈ ಪ್ರೀತಿಗೆ ಮೆಚ್ಚಿ ಕಮೆಂಟ್ ಮಾಡಿರುವ ಕೆಲ ನೆಟ್ಟಿಗರು, ಈ ರೀತಿಯ ವಿಡಿಯೋವನ್ನು ಶೇರ್ ಮಾಡಿದ್ದಕ್ಕೆ ಧನ್ಯವಾದಗಳು. ಈ ವಿಡಿಯೋವನ್ನು ನೋಡಿ ನನ್ನ ಮನಸ್ಸು ಕರಗಿ ಹೋಯ್ತು ಎಂದು ಕಮೆಂಟ್ ಮಾಡಿದ್ದಾರೆ. ಇನ್ನೂ ಕೆಲವರು ತಂದೆಗೆ ಮಗನ ಮೇಲೆ ಇರುವ ಫ್ಯಾಶನ್ ನೋಡಿದರೆ ಬಹಳ ಖುಷಿಯಾಗುತ್ತದೆ. ಅದಕ್ಕೆ ಫುಟ್‍ಬಾಲ್ ಅನ್ನು ಒಂದು ಸುಂದರ ಆಟ ಎಂದು ಕರೆಯುವುದು ಎಂದು ಕಮೆಂಟ್ ಮಾಡಿದ್ದಾರೆ.