ಬ್ರೆಸಿಲಿಯಾ: ಆಡವಾಟ್ತಿದ್ದ ಪುಟ್ಟ ಬಾಲಕನ ಮೇಲೆ ಆತನ ಅಂಕಲ್ ಕಾರ್ ಹರಿಸಿದ್ದು, ಅಚ್ಚರಿಯ ರೀತಿಯಲ್ಲಿ ಬಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಘಟನೆಯ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಇದರ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡ್ತಿದೆ.
ಬ್ರೆಜಿಲ್‍ನ ಸಾಂತಾ ಕ್ಯಾಟರೀನಾದ ಪಾಲ್‍ಹೋಕಾದಲ್ಲಿ ಈ ಘಟನೆ ನಡೆದಿದೆ. ಕಾರ್ ಹರಿದ ಕೆಲವೇ ಸಮಯದಲ್ಲಿ ಬಾಲಕ ಮೇಲೆದ್ದು ಓಡಿಹೋಗೋದನ್ನ ವಿಡಿಯೋದಲ್ಲಿ ಕಾಣಬಹುದು.
ಬಾಲಕನ ಸಂಬಂಧಿ ಪಾರ್ಕ್ ಮಾಡಲಾಗಿದ್ದ ವೋಕ್ಸ್ ವೇಗನ್ ಕಾರಿನ ಬಳಿ ಬಂದಿದ್ದಾರೆ. ಅವರ ಹಿಂದೆಯೇ ಒಬ್ಬ ಹುಡುಗ ಹಾಗು ಮಗು ಕಲೀಬ್ ಬರೋದನ್ನ ಕಾಣಬಹುದು. ವ್ಯಕ್ತಿ ಹಾಗೂ ಆ ಹುಡುಗ ಕಾರಿನ ಡಿಕ್ಕಿಯಲ್ಲಿ ಏನನ್ನೋ ಹುಡುಕುತ್ತಾ ನಿಂತಿದ್ದಾರೆ. ಈ ವೇಳೆ ಮಗು ಕಲೀಬ್ ಕಾರಿನ ಮುಂದೆ ಹೋಗಿ ತನ್ನ ಪಾಡಿಗೆ ಆಟವಾಡೋದ್ರಲ್ಲಿ ಮಗ್ನವಾಗಿತ್ತು.
ಅತ್ತ ಕಲೀಬ್ ತಂದೆ ಕೂಡ ಕಾರಿನ ಡಿಕ್ಕಿಯ ಬಳಿ ಬಂದಿದ್ದು, ಎಲ್ಲರೂ ಕೆಲ ಕಾಲ ಅಲ್ಲೇ ನಿಂತು ಮಾತನಾಡಿದ್ದಾರೆ. ಕೊನೆಗೆ ಹುಡುಗ ಏನನ್ನೋ ಹಿಡಿದು ಒಳಗೆ ಹೋಗಿದ್ದಾನೆ. ಮೂವರೂ ಮಾತಿನಲ್ಲಿ ಮಗ್ನರಾಗಿ, ಮಗು ಕಾರಿನ ಮುಂದೆ ಬಂದಿರೋದನ್ನ ನೋಡಿಯೇ ಇರಲಿಲ್ಲ.
ಕೊನೆಗೆ ಕಲೀಬ್ ನ ಅಂಕಲ್ ಡಿಕ್ಕಿಯನ್ನ ಮುಚ್ಚಿ ಕಾರನ್ನ ಏರಿದ್ದಾರೆ. ಕಾರಿನ ಮುಂದೆ ಕಲೀಬ್ ಆಟವಾಡ್ತಿರೋದನ್ನ ಗಮನಿಸದೇ ಆತನ ಮೇಲೆಯೇ ಕಾರ್ ಹರಿಸಿಕೊಂಡು ಹೋಗಿದ್ದಾರೆ. ಕಾರ್ ಹೋದ ತಕ್ಷಣ ಕಲೀಬ್ ಮೇಲೆದ್ದು ಅಲ್ಲೇ ನಿಂತಿದ್ದ ತನ್ನ ತಂದೆಯ ಕಡೆಗೆ ಓಡಿದ್ದಾನೆ.
ಮನೆಯ ಮುಂದಿನ ಸಿಸಿಟಿವಿ ದೃಶ್ಯಾವಳಿ ಪರಿಶೀಲಿಸಿದಾಗ ಕಲೀಬ್ ನ ಅಂಕಲ್ ಆತನ ಮೇಲೆ ಕಾರ್ ಹರಿಸಿರುವುದು ಗೊತ್ತಾಯಿತು. ಆದ್ರೆ ನನ್ನ ಮಗನಿಗೆ ಯಾವುದೇ ಗಾಯಗಳಾಗಿರಲಿಲ್ಲ ಎಂದು ಮಗುವಿನ ತಾಯಿ ಇಲ್ಲಿನ ಪತ್ರಿಕೆಯೊಂದಕ್ಕೆ ತಿಳಿಸಿದ್ದಾರೆ.
