ಮದ್ವೆಯಾಗಿ ಮೋಸ ಮಾಡಿದ್ದಾನೆ ಎಂದ ಯುವತಿ- ಮನನೊಂದು ಎಫ್‍ಬಿ ಲೈವ್ ಮಾಡಿ ಯುವಕ ಆತ್ಮಹತ್ಯೆಗೆ ಯತ್ನ

ಚೆನ್ನೈ: ಫೇಸ್‍ಬುಕ್ ಲೈವ್ ಮಾಡಿ ಯುವಕನೊಬ್ಬ ವಿಷ ಕುಡಿದು ಆತ್ಮಹತ್ಯೆಗೆ ಯತ್ನಿಸಿದ ಘಟನೆಯೊಂದು ತಮಿಳುನಾಡಿನ ಚೆನ್ನೈನಲ್ಲಿ ನಡೆದಿದೆ.

ಸಜಿನ್(25) ಆತ್ಮಹತ್ಯೆಗೆ ಯತ್ನಿಸಿದ ಯುವಕ. ಸಜಿನ್ ನಾಗೇರ್ ಕೊಯ್ಲಿಯ ಎಂಜಿನಿಯರಿಂಗ್ ವಿದ್ಯಾರ್ಥಿಯನ್ನು ಪ್ರೀತಿಸುತ್ತಿದ್ದನು. ಅಲ್ಲದೇ ಇಬ್ಬರ ಪೋಷಕರಿಗೆ ಮಾಹಿತಿ ನೀಡದೇ ಮದುವೆ ಆಗಿದ್ದರು. ಮದುವೆಯಾದ ಬಳಿಕ ಇಬ್ಬರು ತಮ್ಮ ತಮ್ಮ ಪೋಷಕರ ಜೊತೆಯಲ್ಲೇ ವಾಸಿಸುತ್ತಿದ್ದರು.

ಒಂದು ದಿನ ಸಜಿನ್ ತನ್ನ ಪತ್ನಿಗೆ ಪ್ರೀತಿಯ ಮೆಸೇಜ್‍ಗಳನ್ನು ಮಾಡಿದ್ದಾನೆ. ಇದನ್ನು ನೋಡಿದ ಯುವತಿಯ ಪೋಷಕರು ಆಕೆಗೆ ಸಜಿನ್‍ರನ್ನು ಭೇಟಿ ಮಾಡಲು ಬಿಡದೇ ಮನೆಯಲ್ಲಿ ಕೂಡಿ ಹಾಕಿದ್ದರು. ಈ ವೇಳೆ ಸಜಿನ್ ಮಧುರೈ ಹೈಕೋರ್ಟ್‍ಗೆ ತನ್ನ ಪತ್ನಿಯನ್ನು ಆಕೆಯ ಪೋಷಕರಿಂದ ರಕ್ಷಿಸುವಂತೆ ಅರ್ಜಿಯನ್ನು ಸಲ್ಲಿಸಿದ್ದನು.

ನೋಟಿಸ್ ಬಂದ ಕಾರಣ ಯುವತಿ ತನ್ನ ಪೋಷಕರೊಂದಿಗೆ ಹೈಕೋರ್ಟ್‍ಗೆ ಬಂದಿದ್ದಳು. ಈ ವೇಳೆ ಆಕೆ ಸಜಿನ್ ನನ್ನನ್ನು ಮೋಸ ಮಾಡಿದ್ದಾನೆ. ನಾನು ನನ್ನ ಪೋಷಕರೊಂದಿಗೆ ವಾಸಿಸಲು ಇಷ್ಟಪಡುತ್ತೇನೆ ಎಂದು ಕೋರ್ಟ್‍ನಲ್ಲಿ ಯುವತಿ ಹೇಳಿದ್ದಾಳೆ. ಯುವತಿ ಮಾತುಗಳನ್ನು ಕೇಳಿದ ಕೋರ್ಟ್ ಆಕೆ ತನ್ನ ಪೋಷಕರ ಜೊತೆ ಹೋಗಲಿ ಎಂದು ಆದೇಶಿಸಿದೆ.

ಈ ಬಗ್ಗೆ ಸಜಿನ್ ಹಾಗೂ ಆತನ ಪೋಷಕರು ಯುವತಿ ಬಳಿ ಮಾತನಾಡಲು ಪ್ರಯತ್ನಿಸಿದ್ದಾರೆ. ಆದರೆ ಯುವತಿ ಅವರ ಜೊತೆ ಮಾತನಾಡಲು ನಿರಾಕರಿಸಿದ್ದಾಳೆ. ಕೋರ್ಟ್ ಆದೇಶದ ಬಳಿಕ ತನ್ನ ಮಗಳಿಗೆ ಜೀವ ಬೆದರಿಕೆ ಹಾಕಿದ್ದಾನೆ ಎಂದು ಆತನ ವಿರುದ್ಧ ಯುವತಿಯ ಪೋಷಕರು ದೂರು ದಾಖಲಿಸಿದ್ದಾರೆ. ಈ ಕಾರಣದಿಂದ ಸಜಿನ್ ಫೇಸ್‍ಬುಕ್ ಲೈವ್‍ಗೆ ಬಂದು ವಿಷ ಕುಡಿದಿದ್ದಾನೆ. ಲೈವ್‍ನಲ್ಲಿ ವಿಷ ಕುಡಿಯುತ್ತಿರುವುದನ್ನು ಗಮನಿಸಿದ ಆತನ ಸ್ನೇಹಿತ ಸಜಿನ್‍ನನ್ನು ಕನ್ಯಾಕುಮಾರಿಯ ಆಸರಿಪಲ್ಲಮ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ವಿಡಿಯೋದಲ್ಲಿ ಹೇಳಿದ್ದೇನು?
ನಾನು ಹಾಗೂ ಆಕೆ ಶಾಲೆ ದಿನಗಳಿಂದ ಒಬ್ಬರನೊಬ್ಬರು ಪ್ರೀತಿಸುತ್ತಿದ್ದೇವೆ. ಆಕೆ ತನ್ನ ಪೋಷಕರ ಒತ್ತಾಯದಿಂದ ನನ್ನ ಮೇಲೆ ಸುಳ್ಳು ದೂರು ನೀಡಿದ್ದಾಳೆ. ನಾನು ಈಗ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇನೆ. ನಾನು ಮೃತಪಟ್ಟ ಬಳಿಕ ಆಕೆಗೆ ನನ್ನ ಮುಖವನ್ನು ತೋರಿಸಲು ಅವಕಾಶ ಕೊಡಬೇಕು ಎಂದು ಸಜಿನ್ ವಿಡಿಯೋದಲ್ಲಿ ಹೇಳಿದ್ದಾನೆ. ಈ ವಿಡಿಯೋದಲ್ಲಿ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv