ಮುಂಬೈ: ಲೀವ್ ಇನ್ ರಿಲೇಷನ್‍ಶಿಪ್‍ನಲ್ಲಿದ್ದ ಬಾಲಿವುಡ್ ನಟನೊಬ್ಬ ತನ್ನ ಸಂಗಾತಿ ಮೇಲೆ ಮಾರಣಾಂತಿಕವಾಗಿ ಹಲ್ಲೆ ಮಾಡಿರುವ ಘಟನೆ ಮಹಾರಾಷ್ಟ್ರದ ಮುಂಬೈನ ಸಂತಾಕ್ರೂಜ್‍ನಲ್ಲಿ ನಡೆದಿದೆ.
ಬಾಲಿವುಡ್‍ನ ನಟ ಅರ್ಮಾನ್ ಕೊಹ್ಲಿ ಮೇಲೆ ಹಲ್ಲೆಯ ಆರೋಪಗಳು ಕೇಳಿ ಬಂದಿವೆ. ಫ್ಯಾಶನ್ ಡಿಸೈನರ್ ಆಗಿರೋ ನಿರು ರಂಧ್ವಾನಿ ಹಲ್ಲೆಗೊಳಗಾದ ಸಂಗಾತಿ.
ಏನಿದು ಪ್ರಕರಣ?
ನಟ ಅರ್ಮಾನ್ ಮತ್ತು ನಿರು ಒಳ್ಳೆಯ ಸ್ನೇಹಿತರಾಗಿದ್ದು, 2015ರಿಂದ ಲೀವ್ ಇನ್ ರಿಲೇಷನ್ ಶಿಪ್‍ನಲ್ಲಿದ್ದರು. ಭಾನುವಾರ ಹಣದ ವಿಚಾರಕ್ಕೆ ಇಬ್ಬರ ನಡುವೆ ಗಲಾಟೆ ನಡೆದಿದೆ. ಗಲಾಟೆ ವಿಕೋಪಕ್ಕೆ ತಿರುಗಿ, ಅರ್ಮಾನ್ ಗೆಳತಿ ನಿರುರನ್ನು ಮೆಟ್ಟಿಲಿನಿಂದ ತಳ್ಳಿ, ಕೂದಲನ್ನು ಹಿಡಿದು ಗೋಡೆಗೆ ಗುದ್ದಿ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ ಎಂದು ದೂರು ದಾಖಲಾಗಿದೆ.
ಘಟನೆಯಿಂದಾಗಿ ತಲೆಗೆ ಗಾಯಗಳಾಗಿದ್ದರಿಂದ ನಿರು ಮುಂಬೈನ ಕೋಕಿನಬೇನ್‍ನ ಧೀರುಬಾಯಿ ಅಂಬಾನಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಈ ಸಂಬಂಧ ನಿರು ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಗೆಳೆಯ ಅರ್ಮಾನ್ ವಿರುದ್ಧ ದೂರು ದಾಖಲಿಸಿದ್ದಾರೆ. ಪೊಲೀಸರು ಅರ್ಮಾನ್ ಮೇಲೆ ಐಪಿಸಿ ಸೆಕ್ಷನ್ 323, 326, 504 ಮತ್ತು 506ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಸದ್ಯ ಪೊಲೀಸರು ನಟ ಅರ್ಮಾನ್ ಅವರನ್ನು ವಶಕ್ಕೆ ಪಡೆದು ಹೆಚ್ಚಿನ ವಿಚಾರಣೆಗೆ ಒಳಪಡಿಸಿದ್ದಾರೆ.
ಅರ್ಮಾನ್ ಈ ಮೊದಲು ಬಿಗ್‍ಬಾಸ್ ಖ್ಯಾತಿಯ ನಟಿ ತನೀಷಾ ಮುಖರ್ಜಿ ಜೊತೆಗೂ ಡೇಟಿಂಗ್ ನಡೆಸುತ್ತಿದ್ದರಂತೆ. ಇವರ ನಡುವೆ ಭಿನ್ನಾಭಿಪ್ರಾಯ ಬಂದ ಹಿನ್ನೆಲೆಯಲ್ಲಿ ಇಬ್ಬರು ಬೇರ್ಪಟ್ಟಿದ್ದರು ಎಂದು ತಿಳಿದು ಬಂದಿದೆ.
ಯಾರು ಈ ನಟ?:
ಅರ್ಮಾನ್ ಕೊಹ್ಲಿಯವರು ಬಾಲಿವುಡ್‍ನ ಖ್ಯಾತ ಚಿತ್ರ ನಿರ್ಮಾಪಕ ರಾಜಕುಮಾರ್ ಕೊಹ್ಲಿಯವರ ಮಗ. ರಾಜಕುಮಾರ್‍ರವರು 1992ರಲ್ಲಿ ನಿರ್ಮಿಸಿದ `ವಿರೋಧಿ’ ಚಿತ್ರದ ಮೂಲಕ ಅರ್ಮಾನ್‍ರನ್ನು ಚಿತ್ರರಂಗಕ್ಕೆ ಪರಿಚಯಿಸಿದ್ದರು. ಜಾನಿ ದುಶ್ಮನ್ (2002), ಎಲ್‍ಓಸಿ: ಕಾರ್ಗಿಲ್ (2003) ಚಿತ್ರಗಳು ಚಿತ್ರರಂಗ ಮರೆಯದಂತಹ ಚಿತ್ರಗಳಾಗಿವೆ. ಅರ್ಮಾನ್ ಕೊನೆಯದಾಗಿ ಸಲ್ಮಾನ್ ಖಾನ್ ನಡೆಸಿಕೊಡುವ ಬಿಗ್‍ಬಾಸ್ ಆವೃತ್ತಿಯಲ್ಲಿ ಕಾಣಿಸಿಕೊಂಡಿದ್ದರು.
