ವಾಷಿಂಗ್ಟನ್: ಫೇಸ್‍ಬುಕ್‍ನಲ್ಲಿ ಅನ್‍ಫ್ರೆಂಡ್ ಮಾಡಿದ್ದಕ್ಕೆ ಸಹೋದರನೊಬ್ಬ ತನ್ನ ತಂಗಿಯನ್ನೇ ಗುಂಡಿಕ್ಕಿ ಕೊಲೆ ಮಾಡಿದ ಘಟನೆ ಅಮೆರಿಕದ ಅಲಾಸ್ಕಾದಲ್ಲಿ ನಡೆದಿದೆ.
ಮೋಸೆಸ್ ಕ್ರೋವ್ ಗುಂಡಿಕ್ಕಿ ಕೊಲೆ ಮಾಡಿದ ಸಹೋದರ. ನವೆಂಬರ್ 28ರಂದು ಈ ಘಟನೆ ನಡೆದಿದ್ದು, ಅಂದು ಥ್ಯಾಂಕ್ಸ್ ಗಿವಿಂಗ್ ಇತ್ತು. ಅಮೆರಿಕದಲ್ಲಿ ವರ್ಷದ ಕೊನೆಯಲ್ಲಿ ತಮ್ಮ ಪ್ರೀತಿ ಪಾತ್ರರಿಗೆ ಉಡುಗೊರೆ ನೀಡುವ ಮೂಲಕ ಧನ್ಯವಾದ ತಿಳಿಸುತ್ತಾರೆ. ಈ ದಿನಕ್ಕೆ ಥ್ಯಾಂಕ್ಸ್ ಗಿವಿಂಗ್ ಎಂದು ಕರೆಯುತ್ತಾರೆ.
ಈ ಘಟನೆ ಬಗ್ಗೆ ಮೋಸೆಸ್ ಅಜ್ಜಿ ಪ್ರತಿಕ್ರಿಯೆ ನೀಡಿ, ಬೆಳಗ್ಗೆ 10 ಗಂಟೆಗೆ ಮೋಸೆಸ್ ಮನೆಗೆ ಬಂದನು. ಮೊದಲು ಆತ ತನ್ನ ನಾಯಿಯ ಜೊತೆ ಆಟವಾಡುತ್ತಿದ್ದನು. ಬಳಿಕ ತನ್ನ ಸಹೋದರಿ ಅಮಂಡಾ ಓವನ್ ಜೊತೆ ಜಗಳವಾಡಲು ಶುರು ಮಾಡಿದ್ದನು ಎಂದು ಹೇಳಿದ್ದಾರೆ.
ಮೋಸೆಸ್ ಹಾಗೂ ಓವನ್ ನಡುವೆ ವಾಗ್ವಾದ ಹೆಚ್ಚಾಯಿತು. ಜಗಳವಾಡುವ ವೇಳೆ ಮೋಸೆಸ್ ಫೇಸ್‍ಬುಕ್‍ನಲ್ಲಿ ನನ್ನನ್ನು ಏಕೆ ಅನ್‍ಫ್ರೆಂಡ್ ಮಾಡಿದೆ ಎಂದು ಓವನ್‍ಗೆ ಪ್ರಶ್ನಿಸುತ್ತಿದ್ದನು. ಜಗಳ ಜೋರಾಗುತ್ತಿದ್ದಂತೆ ಮೋಸೆಸ್ ಪಿಸ್ತೂಲ್ ತೆಗೆದು ತನ್ನ ಸಹೋದರಿಯ ತಲೆಗೆ ಗುಂಡಿಕ್ಕಿ ಕೊಲೆ ಮಾಡಿದ್ದಾನೆ. ಈ ವೇಳೆ ಓವನ್ ಕೈಯಲ್ಲಿ ಮಗುವಿತ್ತು ಎಂದರು.
ನಾನು ನನ್ನ ತಂಗಿಯನ್ನು ಕೊಲೆ ಮಾಡಬೇಕು ಎಂದುಕೊಂಡಿರಲಿಲ್ಲ. ನಾನು ಕೇವಲ ನನ್ನ ಕೈಯಲ್ಲಿ ಪಿಸ್ತೂಲ್ ಹಿಡಿದುಕೊಂಡು ಓಡಾಡುತ್ತಿದೆ. ಈ ವೇಳೆ ಬುಲೆಟ್ ಹಾರಿತು ಎಂದು ಮೋಸೆಸ್ ವಿಚಾರಣೆ ವೇಳೆ ಪೊಲೀಸರ ಬಳಿ ತಿಳಿಸಿದ್ದಾನೆ. ಪೊಲೀಸರು ಮೋಸೆಸ್ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
