ಲಂಡನ್: ಟ್ರೈನಿನಲ್ಲಿ ಸೀಟ್ ಸಿಗದಿದ್ದಕ್ಕೆ ಅರ್ಧಗಂಟೆ ನಿಂತು ಮಹಿಳೆ ತನ್ನ ಮಗುವಿಗೆ ಸ್ತನ್ಯಪಾನ ಮಾಡಿಸಿರುವ ಹೃದಯಾವಿದ್ರಾವಕ ಘಟನೆ ಲಂಡನ್‍ನಲ್ಲಿ ನಡೆದಿದೆ.
ಕೇಟ್ ಹಿಚ್ಚೆನ್ಸ್ ನಿಂತುಕೊಂಡು ಮಗುವಿಗೆ ಸ್ತನ್ಯಪಾನ ಮಾಡಿಸಿದ ಮಹಿಳೆ. ಮಂಗಳವಾರ ಕೇಟ್ ತನ್ನ ಮನೆಯಿಂದ ವಿಕ್‍ಫೋರ್ಡ್‍ಗೆ ರಶ್ ಇದ್ದ ಟ್ರೈನಿನಲ್ಲಿ ತನ್ನ ಆರು ತಿಂಗಳ ಮಗ ಚಾರ್ಲಿಯನ್ನು ಎತ್ತಿಕೊಂಡು ಪ್ರಯಾಣಿಸುತ್ತಿದ್ದರು.
ಕೇಟ್ ಟ್ರೈನಿನಲ್ಲಿ ಪ್ರಯಾಣಿಸುತ್ತಿರುವಾಗ ಆಕೆಯನ್ನು ನೋಡಿ ಯಾರೂ ಕೂಡ ತಮ್ಮ ಸೀಟ್ ಬಿಟ್ಟುಕೊಡಲಿಲ್ಲ. ಯಾರು ಸೀಟ್ ನೀಡದ ಕಾರಣ ಕೇಟ್ ಅರ್ಧ ಗಂಟೆ ನಿಂತುಕೊಂಡೇ ಮಗುವಿಗೆ ಸ್ತನ್ಯಪಾನ ಮಾಡಿಸಲು ಪರದಾಡಿದ್ದಾರೆ.
ಸದ್ಯ ಜನರ ಈ ವರ್ತನೆಯನ್ನು ಕಂಡು ಕೇಟ್ ತನ್ನ ಇನ್‍ಸ್ಟಾಗ್ರಾಂನಲ್ಲಿ ಮಗುವಿಗೆ ಸ್ತನ್ಯಪಾನ ಮಾಡಿಸುತ್ತಿರುವ ಫೋಟೋ ಹಾಕಿ ತಮಗೆ ಆದ ಅನುಭವವನ್ನು ಹೇಳುತ್ತಾ ತಮ್ಮ ಆಕ್ರೋಶವನ್ನು ಹೊರಹಾಕಿದ್ದಾರೆ.
ಈ ಪ್ರಪಂಚ ಯಾವ ಮಟ್ಟಿಗೆ ಬಂದಿದೆ ಎಂದರೆ ಚಲಿಸುತ್ತಿರುವ ಟ್ರೈನಿನಲ್ಲಿ ತಾಯಿ ತನ್ನ 6 ತಿಂಗಳ ಮಗುವಿಗೆ ನಿಂತುಕೊಂಡು ಸ್ತನ್ಯಪಾನ ಮಾಡಿಸುವ ಪರಿಸ್ಥಿತಿ ಬಂದಿದೆ ಎಂದು ಕೇಟ್ ತನ್ನ ಇನ್‍ಸ್ಟಾಗ್ರಾಂ ಪೋಸ್ಟ್ ನಲ್ಲಿ ಬರೆದುಕೊಂಡಿದ್ದರು.
ನಾನು ನಿಂತುಕೊಂಡು ಸ್ತನ್ಯಪಾನ ಮಾಡಿಸುತ್ತಿರುವುದು ಕೆಲವರು ಗಮನಿಸಲಿಲ್ಲ. ಆದರೆ ಇನ್ನೂ ಕೆಲವರು ನನ್ನನ್ನು ಗಮನಿಸಿ ನನ್ನ ನೋಡಿ ಸ್ಮೈಲ್ ಮಾಡಿದರು. ಆಗ ನಾನು ನನ್ನನ್ನು ನೋಡಿ ಸ್ಮೈಲ್ ಮಾಡುವುದು ನಿಲ್ಲಿಸಿ ನನಗೆ ಸೀಟ್ ಬಿಟ್ಟು ಕೊಡಿ ಎಂದು ಕೇಳಿದೆ. ಆಗ ಮಹಿಳೆಯೊಬ್ಬರು ಸೀಟ್ ಬಿಟ್ಟುಕೊಟ್ಟರು ನಾನು ಆ ಸೀಟ್‍ನಲ್ಲಿ ಕುಳಿತುಕೊಳ್ಳುವಷ್ಟರಲ್ಲಿ ಮತ್ತೊಬ್ಬ ಮಹಿಳೆ ಆ ಸೀಟ್‍ನಲ್ಲಿ ಕುಳಿತುಕೊಂಡರು ಎಂದು ಕೇಟ್ ಪೋಸ್ಟ್ ನಲ್ಲಿ ಬರೆದುಕೊಂಡಿದ್ದಾರೆ.
ಸದ್ಯ ಕೇಟ್ ಪೋಸ್ಟ್ ಗೆ ಹಲವಾರು ಮಂದಿ ಕಮೆಂಟ್ ಮಾಡುವ ಮೂಲಕ ತಮ್ಮ ಆಕ್ರೋಶವನ್ನು ಹೊರಹಾಕಿದ್ದಾರೆ.
