ಬಿಗ್ ಬಾಸ್ ಕನ್ನಡ ಸೀಸನ್ 12ರಲ್ಲಿ ರಿಯಲ್ ಎಂಟರ್ಟೇನರ್ ಅಂದ್ರೆ ಅದು ಗಿಲ್ಲಿ ನಟ (Gilli Nata). ಸಖತ್ ಕಾಮಿಡಿ ಟೈಮಿಂಗ್ ಹೊಂದಿರುವ ಗಿಲ್ಲಿ ಪಂಚಿಂಗ್ ಡೈಲಾಗ್ಸ್ಗೆ ದೊಡ್ಡ ಫ್ಯಾನ್ ಬೇಸ್ ಇದೆ. ವ್ಯಂಗ್ಯವಾಗಿ ಕಾಲೆಳೆಯುವ ಗಿಲ್ಲಿ ನಟ ಮಾತುಗಳಿಗೆ ದೊಡ್ಡ ಅಭಿಮಾನಿ ಬಳಗವೇ ಇದೆ. ಯಾವುದೇ ತಯಾರಿ ಇಲ್ಲದೆ ಸ್ಪಾಟ್ನಲ್ಲೇ ಕಾಮಿಡಿ ಮಾಡುವ ಗಿಲ್ಲಿ ಪ್ರತಿಭೆಗೆ ಅನೇಕರು ಭೇಷ್ ಎಂದಿದ್ದಾರೆ. ಹೀಗಿರುವಾಗಲೇ, ಗಿಲ್ಲಿ ನಟ ವಿರುದ್ಧ ರಾಜ್ಯ ಮಹಿಳಾ ಆಯೋಗಕ್ಕೆ (Women’s Commission) ದೂರು ಹೋಗಿದೆ.
ಹೌದು. ಬಿಗ್ ಬಾಸ್ನ ಮಹಿಳಾ ಸ್ಪರ್ಧಿ ರಿಷಾ (Risha Gowda) ಬಟ್ಟೆಯನ್ನ ಮುಟ್ಟಿ ವಾಶ್ರೂಮ್ನಲ್ಲಿ ಹಾಕಿದ್ದಕ್ಕೆ ಗಿಲ್ಲಿ ವಿರುದ್ಧ ಮಹಿಳಾ ಆಯೋಗಕ್ಕೆ ದೂರು ನೀಡಲಾಗಿದೆ.
ಮಹಿಳೆಯರಿಗೆ ಅವಮಾನ ಮಾಡಿದ್ರಾ ಗಿಲ್ಲ?
ಮಹಿಳಾ ಸ್ಪರ್ಧಿಯ ಬಟ್ಟೆ ಮುಟ್ಟಿ ವಾಶ್ ರೂಮಲ್ಲಿ ಹಾಕಿದ್ದಕ್ಕೆ ಕುಶಲ ಎಂಬ ಮಹಿಳೆ ಮಹಿಳಾ ಆಯೋಗಕ್ಕೆ ದೂರು ನೀಡಿದ್ದಾರೆ. ಮಹಿಳೆಯರ ವಿರುದ್ಧ ಅವಮಾನಕಾರಿಯಾಗಿ ಗಿಲ್ಲಿ ನಡೆದುಕೊಂಡಿದ್ದಾರೆ ಅಂತ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ. ಸದ್ಯ ಮಹಿಳಾ ಆಯೋಗದಿಂದ ಈ ಪ್ರಕರಣ ಪೊಲೀಸ್ ನಗರ ಕಮಿಷನರ್ಗೆ ಹಾಗೂ ರಾಮನಗರ ಪೊಲೀಸರಿಗೆ ವರ್ಗಾವಣೆ ಮಾಡಲಾಗಿದೆ. ಪ್ರಕರಣದ ಕುರಿತು ಪರಿಶೀಲನೆ ನಡೆಸಿ, ಕ್ರಮ ಕೈಗೊಂಡ ಬಗ್ಗೆ ಶೀಘ್ರದಲ್ಲೇ ಆಯೋಗಕ್ಕೆ ವರದಿ ನೀಡುವಂತೆ ಮಹಿಳಾ ಆಯೋಗ ಪತ್ರ ಬರೆದಿದೆ.
ಗಿಲ್ಲಿ ರಿಷಾ ಬಟ್ಟೆ ಮುಟ್ಟಿದ್ದೇಕೆ?
ಗಿಲ್ಲಿ ನಟ ಬಿಸಿ ನೀರು ಬಕೆಟ್ ಕೇಳಿದಾಗ ರಿಷಾ ಕೊಡಲಿಲ್ಲ. ಬಿಸಿ ನೀರು ಬಕೆಟ್ ತುಂಬಿದ ಕೂಡಲೆ ರಿಷಾ ಬಾಗಿಲು ಹಾಕಿಕೊಂಡರು. ಬಕೆಟ್ ಕೊಡಲಿಲ್ಲ ಅಂದ್ರೆ ಏನು ಮಾಡ್ತೀನಿ ನೋಡು ಗಿಲ್ಲಿ ನಟ ಎಚ್ಚರಿಕೆ ಕೊಟ್ಟಿದ್ದರು. ತಮ್ಮ ಸ್ನಾನ ಮುಗಿಯುವವರೆಗೂ ರಿಷಾ ಬಕೆಟ್ ಕೊಡಲೇ ಇಲ್ಲ. ಹೀಗಾಗಿ, ರಿಷಾ ಬಟ್ಟೆಗಳನ್ನೆಲ್ಲಾ ಬಾತ್ರೂಮ್ ಏರಿಯಾಗೆ ತಂದು ಗಿಲ್ಲಿ ನಟ ಹಾಕಿದ್ದರು. ಅದನ್ನ ಕಂಡು ಕೋಪಗೊಂಡ ರಿಷಾ.. ಗಿಲ್ಲಿ ನಟನಿಗೆ ಹೊಡೆದಿದ್ದರು. ಸಾಲದಕ್ಕೆ ಎರಡು ಬಾರಿ ತಳ್ಳಿದ್ದರು. ಆ ಮೂಲಕ ‘ಬಿಗ್ ಬಾಸ್’ ಮನೆಯ ಮುಖ್ಯ ನಿಯಮವನ್ನ ರಿಷಾ ಉಲ್ಲಂಘಿಸಿದ್ದರು. ಈಗ ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಗಿಲ್ಲಿ ನಟ ವಿರುದ್ಧ ದೂರು ಕೊಡಲಾಗಿದೆ!
ಈ ಕುರಿತು ಮಾತನಾಡಿರುವ ದೂರುದಾರೆ ಕುಶಲ, ಗಿಲ್ಲಿ ನಟ ಮಹಿಳಾ ಸಹಸ್ಪರ್ಧಿಯ ಬಟ್ಟೆ ಮುಟ್ಟಿರೋದು ತಪ್ಪು. ಅಲ್ಲದೇ ಪದೇ ಪದೇ ಹೆಣ್ಣುಮಕ್ಕಳಿಗೆ ಕೀಟಲೆ ಮಾಡೋದು, ಕೆಲವೊಮ್ಮೆ ಅವಮಾನ ಮಾಡುವ ಮಾತಾನಾಡೋದು ಮಾಡುತ್ತಿದ್ದಾರೆ, ಇದು ಸರಿಯಲ್ಲ. ಹಾಗಂತ ಗಿಲ್ಲಿ ನಟನ ಹೊರಗೆ ಹಾಕಿ ಅಥವಾ ಬಂಧನ ಮಾಡಿ ಅಂತ ಅಲ್ಲ. ಬಿಗ್ ಬಾಸ್ ಗಿಲ್ಲಿಗೆ ಸಲಹೆ ಕೊಡಬೇಕು. ನಂಗೇನು ಗಿಲ್ಲಿ ಬಗ್ಗೆ ವೈಯಕ್ತಿಕ ದ್ವೇಷ ಇಲ್ಲ. ಆದ್ರೆ ಗಿಲ್ಲಿಗೆ ಸಲಹೆ ಕೊಡಬೇಕು. ಈಗ ಆಯೋಗದವರು ಪೊಲೀಸ್ ಕಮೀಷನರ್ಗೆ ಪ್ರಕರಣ ವರ್ಗಾಯಿಸೋದು ಸ್ವಾಗತಾರ್ಹ ಎಂದು ಹೇಳಿದ್ದಾರೆ.
