ಈಗ ಎಲ್ಲಿ ನೋಡಿದರೂ ಹಫ್ತಾರೇ ಹಫ್ತಾ!

ಬೆಂಗಳೂರು: ಮೈತ್ರಿ ಮಂಜುನಾಥ್ ನಿರ್ಮಾಣದ ಹಫ್ತಾ ಚಿತ್ರದ ಹಾಡುಗಳೀಗ ಎಲ್ಲೆಡೆ ರಾರಾಜಿಸುತ್ತಿವೆ. ಅದರಲ್ಲಿಯೂ ವಿಶೇಷವಾಗಿ ಇದರ ಟೈಟಲ್ ಸಾಂಗ್ ಅಂತೂ ಟ್ರೆಂಡ್ ಸೆಟ್ ಮಾಡಿದೆ. ಯೂಟ್ಯೂಬ್‍ನಲ್ಲಿಯೂ ಟ್ರೆಂಡಿಂಗ್‍ನಲ್ಲಿರೋ ಈ ಹಾಡಿಗೆ ದಿನದಿಂದ ದಿನಕ್ಕೆ ವೀಕ್ಷಣೆಯ ಸಂಖ್ಯೆ ಹೆಚ್ಚಾಗುತ್ತಲೇ ಇದೆ.

ಪ್ರಕಾಶ್ ಹೆಬ್ಬಾಳ ನಿರ್ದೇಶನದ ಹಫ್ತಾದ ಈ ಟೈಟಲ್ ಸಾಂಗಿಗೆ ಗೌತಮ್ ಶ್ರೀವತ್ಸ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಕವಿರಾಜ್ ಎಲ್ಲರನ್ನೂ ಸೆಳೆಯುವಂಥಾ ಸಾಲುಗಳ ಈ ಹಾಡನ್ನು ಬರೆದಿದ್ದಾರೆ. ಈ ಹಾಡು ಲಹರಿ ಆಡಿಯೋ ಸಂಸ್ಥೆಯ ಮೂಲಕ ಇತ್ತೀಚೆಗಷ್ಟೇ ಬಿಡುಗಡೆಯಾಗಿತ್ತು. ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಹೆಚ್ಚಿನ ವೀಕ್ಷಣೆ ಪಡೆದುಕೊಂಡಿದ್ದ ಹಫ್ತಾರೇ ಹಫ್ತಾ ಎಂಬ ಈ ಹಾಡೀಗ ಎಲ್ಲರನ್ನೂ ಗುನುಗುನಿಸುತ್ತಿದೆ.

ಗೌತಮ್ ಶ್ರೀವತ್ಸ ಈ ಮೂಲಕ ಮತ್ತೆ ಸದ್ದು ಮಾಡಿದ್ದಾರೆ. ರವಿಚಂದ್ರನ್, ಹಂಸಲೇಖಾ ಮುಂತಾದವರ ಗರಡಿಯಲ್ಲಿ ಪಳಗಿಕೊಂಡಿರೋ ಗೌತಮ್ ಈ ಸಿನಿಮಾಗೆ ಹಿನ್ನೆಲೆ ಸಂಗೀತವನ್ನೂ ಒದಗಿಸಿದ್ದಾರೆ. ಹಫ್ತಾ ರೇ ಹಫ್ತಾ ಎಂಬುದು ಇಡೀ ಚಿತ್ರದ ಫೋರ್ಸ್ ಧ್ವನಿಸುವಂಥಾ ಹಾಡು. ಇದಕ್ಕೆ ಪೂರಕವಾದ ಆವೇಗದಲ್ಲಿಯೇ ಇಡೀ ಚಿತ್ರ ಮೂಡಿ ಬಂದಿದೆಯಂತೆ.

ಕರಾವಳಿ ಕಿನಾರೆಯ ಭೂಗತ ಜಗತ್ತಿನ ಕಥೆ ಹೊಂದಿರೋ ಈ ಚಿತ್ರ ಈಗಾಗಲೇ ಡಿಫರೆಂಟಾದ ಪೋಸ್ಟರ್, ಟೀಸರ್‍ಗಳಿಂದಲೇ ವ್ಯಾಪಕ ಮನ್ನಣೆ ಪಡೆದುಕೊಂಡಿದೆ. ಹಾಡುಗಳು ಹೊರ ಬಂದ ಮೇಲಂತೂ ಹಫ್ತಾದ ಖದರ್ ಎಲ್ಲ ದಿಕ್ಕುಗಳತ್ತಲೂ ಹರಡಿಕೊಳ್ಳುತ್ತಿದೆ. ಮೈತ್ರಿ ಪ್ರೊಡಕ್ಷನ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿರೋ ಹಫ್ತಾದ ಖದರ್ ಇಷ್ಟರಲ್ಲಿಯೇ ಪ್ರೇಕ್ಷಕರ ಮುಂದೆ ಪ್ರದರ್ಶನಗೊಳ್ಳಲಿದೆ.