ಸಕಲಕಲಾ ವಲ್ಲಭನ ಫೇಸ್ ಟು ಫೇಸ್

ಸಂದೀಪ್ ಜನಾರ್ಧನ್ ನಿರ್ದೇಶನದ ಫೇಸ್ ಟು ಫೇಸ್ ಚಿತ್ರ ಇದೇ ಮಾರ್ಚ್ 15ರಂದು ರಾಜ್ಯಾದ್ಯಂತ ತೆರೆ ಕಾಣುತ್ತಿದೆ. ಹೊಸ ಥರದ ಕಥೆ, ಸ್ಕ್ರೀನ್ ಪ್ಲೇ ಮುಂತಾದ ವಿಶೇಷತೆಗಳನ್ನು ಹೊಂದಿರೋ ಈ ಚಿತ್ರದ ಮೂಲಕ ರೋಹಿತ್ ಭಾನು ಪ್ರಕಾಶ್ ಎಂಬ ಸಕಲಕಲಾ ವಲ್ಲಭ ನಾಯಕನಾಗಿ ಗ್ರ್ಯಾಂಡ್ ಎಂಟ್ರಿ ಕೊಡಲು ರೆಡಿಯಾಗಿದ್ದಾರೆ.

ರೋಹಿತ್ ಈ ಹಿಂದೆ ರವಿಚಂದ್ರನ್ ಅಭಿನಯದ ದೃಶ್ಯ ಚಿತ್ರದಲ್ಲಿ ಖಳನಾಗಿ ಅಬ್ಬರಿಸಿದ್ದವರು. ಆ ನಂತರವೂ ಹಲವಾರು ಚಿತ್ರಗಳಲ್ಲಿ ನಟಿಸಿ ಗುರುತಾಗಿದ್ದರು. ಪ್ರೋ ಕಬಡ್ಡಿ ಪಂದ್ಯಾಟದ ಕಾಮೆಂಟರಿಗೂ ಧ್ವನಿಯಾಗುತ್ತಾ ಮತ್ತೊಂದೆಡೆ ಹೋಟೆಲ್ ವ್ಯವಹಾರವನ್ನೂ ನಡೆಸುತ್ತಿರೋ ಅವರ ಪಾಲಿಗೆ ನಟನೆ ಪ್ರಧಾನ ಗುರಿ. ಹಲವಾರು ವರ್ಷಗಳಿಂದ ನಾಯಕ ನಟನಾಗಬೇಕೆಂಬ ಹಂಬಲ ಹೊಂದಿ, ಹಂತ ಹಂತವಾಗಿ ಬೆಳೆದು ಬಂದಿರೋ ಅವರೀಗ ಫೇಸ್ ಟು ಫೇಸ್ ಮೂಲಕ ನಾಯಕನಾಗೋ ಕನಸನ್ನು ನನಸು ಮಾಡಿಕೊಂಡಿದ್ದಾರೆ.

ಈ ಚಿತ್ರದಲ್ಲಿ ಪೂರ್ವಿ ಜೋಷಿ ಮತ್ತು ಹುಲಿರಾಯ ಖ್ಯಾತಿಯ ದಿವ್ಯಾ ಉರುಡಗ ನಾಯಕಿಯರಾಗಿ ಸಾಥ್ ಕೊಟ್ಟಿದ್ದಾರೆ. ಇವರೆಲ್ಲರ ಪಾತ್ರಗಳನ್ನೂ ಕೂಡಾ ಭಿನ್ನವಾಗಿಯೇ ಸಂದೀಪ್ ಕಟ್ಟಿ ಕೊಟ್ಟಿದ್ದಾರಂತೆ. ಈಗಾಗಲೇ ಇದರ ಒಂದಷ್ಟು ಹಾಡುಗಳು ಟ್ರೆಂಡಿಂಗ್‍ನಲ್ಲಿವೆ. ಟ್ರೈಲರ್ ಕೂಡಾ ಜನಮನ ಸೆಳೆದಿದೆ. ಈ ಮೂಲಕವೇ ಎಲ್ಲ ವರ್ಗದ ಪ್ರೇಕ್ಷಕರ ಆಸಕ್ತಿಯ ಕೇಂದ್ರಬಿಂದುವಾಗಿರೋ ಈ ಚಿತ್ರ ಥೇಟರಿಗೆ ಬರಲು ದಿನಗಣನೆ ಶುರುವಾಗಿದೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv