ಬೆಂಗಳೂರು: ಟಾಕಿಂಗ್ ಸ್ಟಾರ್ ಸೃಜನ್ ಲೋಕೇಶ್ ಅಭಿನಯದ ಎಲ್ಲಿದ್ದೆ ಇಲ್ಲಿತನಕ ಚಿತ್ರ ಈ ವಾರ ಬಿಡುಗಡೆಯಾಗುತ್ತಿದೆ. ಮಜಾ ಟಾಕೀಸ್ ಎಂಬ ಶೋ ಮೂಲಕವೇ ಕಿರುತೆರೆ ಪ್ರೇಕ್ಷಕರ ಮನ ಗೆದ್ದಿರುವವರು ಸೃಜನ್. ಆ ಪ್ರೇಕ್ಷಕರ ಪಾಲಿಗೆ ಪ್ರೀತಿಯ ಸೃಜಾ ಆಗಿರೋ ಅವರ ಈ ಸಿನಿಮಾ ಬಗ್ಗೆ ಈಗ ಎಲ್ಲ ಕೋನಗಳಿಂದಲೂ ಗೆಲುವಿನ ಲಕ್ಷಣಗಳೇ ಮಿರುಗಲಾರಂಭಿಸಿವೆ. ಈ ಸಿನಿಮಾ ಮೇಲೆ ಬಹಳಷ್ಟು ಕನಸಿಟ್ಟುಕೊಂಡೇ ಸೃಜನ್ ತಮ್ಮ ಹೋಂ ಬ್ಯಾನರಿನಲ್ಲಿಯೇ ಇದನ್ನು ನಿರ್ಮಾಣ ಮಾಡಿದ್ದಾರೆ. ಒಂದು ಬೃಹತ್ ತಾರಾಗಣವೇ ಅವರಿಗಿಲ್ಲಿ ಸಾಥ್ ಕೊಟ್ಟಿದೆ.
ವಿಶೇಷವೆಂದರೆ ಈ ಸಿನಿಮಾದಲ್ಲಿ ಗಿರಿಜಾ ಲೋಕೇಶ್ ಕೂಡ ಸೃಜನ್ ಜೊತೆ ನಟಿಸಿದ್ದಾರೆ. ಮಗನ ಈವರೆಗಿನ ಸಾಧನೆಯ ಹಾದಿಯಲ್ಲಿ ನೆರಳಾಗುತ್ತಾ ಬಂದಿರುವವರು ಗಿರಿಜಾ ಲೋಕೇಶ್. ಸದಾ ಮಗನಿಗೆ ಮಾರ್ಗದರ್ಶನ ನೀಡುತ್ತಾ ಬಂದಿರೋ ಗಿರಿಜಮ್ಮ, ಎಲ್ಲಿದ್ದೆ ಇಲ್ಲಿತನಕ ಚಿತ್ರದಲ್ಲಿಯೂ ನಟಿಸಿದ್ದಾರೆ. ಆದರೆ ಇದುವರೆಗೂ ನಿರ್ದೇಶಕರಾಗಲಿ, ಚಿತ್ರತಂಡವಾಗಲೀ ಈ ಪಾತ್ರದ ಬಗ್ಗೆ ತೆಳುವಾಗಿ ಒಂದಷ್ಟು ವಿಚಾರಗಳನ್ನು ಹೇಳಿಕೊಂಡಿದೆಯಷ್ಟೆ. ಈ ಸಿನಿಮಾದಲ್ಲಿ ಒಟ್ಟಾರೆ ವಿಶೇಷತೆಗಳಿವೆಯಲ್ಲಾ? ಅದರಲ್ಲಿ ಗಿರಿಜಾ ಲೋಕೇಶ್ ಅವರ ಪಾತ್ರವೂ ಸೇರಿಕೊಂಡಿದೆ.
ಗಿರಿಜಾ ಲೋಕೇಶ್ ಅವರಿಗಿಲ್ಲಿ ವಿಶಿಷ್ಟವಾದ ಪಾತ್ರವೇ ಸಿಕ್ಕಿದೆ. ಅಷ್ಟಕ್ಕೂ ಗಿರಿಜಮ್ಮನ ಪಾಲಿಗೆ ಈವರೆಗೆ ಎಲ್ಲ ಪಾತ್ರಗಳೂ ಒಲಿದು ಬಂದಿವೆ. ಆದರೆ ಮಗನೇ ನಾಯಕನಾಗಿರೋ ಈ ಚಿತ್ರದಲ್ಲವರ ಪಾತ್ರ ನಿಜಕ್ಕೂ ಸ್ಪೆಷಲ್ ಆಗಿದೆಯಂತೆ. ಆದರೆ ಅದು ಬಿಡುಗಡೆಯ ದಿನವಷ್ಟೇ ಗೊತ್ತಾಗಬೇಕಿದೆ. ಅದಕ್ಕಾಗಿ ಈಗ ಕ್ಷಣಗಣನೆ ಶುರುವಾಗಿದೆ. ಅಂತೂ ಈ ಸಿನಿಮಾ ಕೇವಲ ಸೃಜನ್ ಅವರಿಗೆ ಮಾತ್ರವಲ್ಲದೇ ಗಿರಿಜಾ ಲೋಕೇಶ್ ಪಾಲಿಗೂ ವಿಶೇಷವೇ. ಅಮ್ಮ ಗಿರಿಜಮ್ಮ ಮಾತ್ರವಲ್ಲದೇ ಅನೇಕಾನೇಕ ಕಲಾವಿದರಿಲ್ಲಿ ಸೃಜನ್‍ಗೆ ಸಾಥ್ ನೀಡಿದ್ದಾರೆ. ಅವರೆಲ್ಲರ ಪಾತ್ರಗಳ ಮಜಾ ಜಾಹೀರಾಗೋದಕ್ಕೆ ದಿನಗಳಷ್ಟೇ ಬಾಕಿ ಉಳಿದುಕೊಂಡಿವೆ.
