ಬೆಂಗಳೂರು: ಅರಣ್ಯ ನಾಶದಿಂದಾಗಿ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಅಪರೂಪದ ಹಾವುಗಳು ಕಾಣಿಸಿಕೊಳ್ಳುತ್ತಿವೆ. ಸಿಲಿಕಾನ್ ಸಿಟಿ ಬೆಂಗಳೂರು ನಗರವಾಸಿಗಳ ಮನೆಯೊಳಗೆ ಅದೂ ಮಧ್ಯರಾತ್ರಿ ಬೃಹತ್ ಗಾತ್ರದ ಹಾವೊಂದು ಕಂಡ ತಕ್ಷಣ ಮನೆಯವರು ಬೆಚ್ಚಿಬಿದ್ದಿದ್ದಾರೆ.
ಅದೂ ಸಾಮಾನ್ಯ ಹಾವಲ್ಲ ದಟ್ಟಾರಣ್ಯಗಳಲ್ಲಿ ಹೆಚ್ಚಾಗಿ ವಾಸ ಮಾಡುವ ಇಂಡಿಯನ್ ರಾಕ್ ಪೈಥಾನ್ ಜಾತಿಯ ಬೃಹತ್ ಹೆಬ್ಬಾವು. ಹೌದು ಆರ್.ಆರ್ ನಗರ ವಲಯ ವ್ಯಾಪ್ತಿಯ ವಾರ್ಡ್ ನಂ 198 ತಲಘಟ್ಟಪುರದ ಮನೆಯ ಕಂಪೌಂಡ್ ಒಳಗೆ ಈ ಬೃಹತ್ ಹೆಬ್ಬಾವು ಸೇರಿಕೊಂಡಿತ್ತು. ರಾತ್ರಿ ಹನ್ನೆರಡು ಗಂಟೆಗೆ ಹೆಬ್ಬಾವು ಕಂಡ ತಕ್ಷಣ ಭಯಬಿದ್ದು ಪಾಲಿಕೆ ಸಹಾಯವಾಣಿಗೆ ಕರೆ ಮಾಡಿದ್ದಾರೆ.
ತಕ್ಷಣ ಬಿಬಿಎಂಪಿ ಉಪ ಅರಣ್ಯ ಸಂರಕ್ಷಕರ ಅನುಮತಿ ಪಡೆದು, ಪಾಲಿಕೆ ವನ್ಯಜೀವಿ ಸಂರಕ್ಷಕರಾದ ಪ್ರಸನ್ನ ಕುಮಾರ್ ಹೆಬ್ಬಾವನ್ನು ರಕ್ಷಿಸಿದ್ದಾರೆ. ಬಳಿಕ ಪಾಲಿಕೆ ವನ್ಯಜೀವಿ ತುರ್ತು ವಾಹನದ ಮೂಲಕ ಪುನರ್ವಸತಿ ಕೇಂದ್ರಕ್ಕೆ ನೀಡಿ, ಆರೋಗ್ಯ ತಪಾಸಣೆ ನಡೆಸಿ ಆರೋಗ್ಯವಾಗಿದ ಹಿನ್ನೆಲೆಯಲ್ಲಿ ವಾಪಸ್ ಅರಣ್ಯಕ್ಕೆ ಬಿಡಲು ಮುಂದಾಗಿದ್ದಾರೆ.
ಒಟ್ಟಿನಲ್ಲಿ ಈ ಇಂಡಿಯನ್ ರಾಕ್ ಪೈಥಾನ್ ಬಹಳ ದಪ್ಪ ಹಾಗೂ ಉದ್ದ ಬೆಳೆಯುವ ಹೆಬ್ಬಾವು ಜಾತಿಯಾಗಿದ್ದು, ಬಹಳ ಅಪರೂಪದ ಪ್ರಭೇಧವಾಗಿದೆ. ನಗರದಲ್ಲಿ ಸಿಕ್ಕಿರುವುದು ತುಂಬಾ ಅಪರೂಪ ಮತ್ತು ವಿಶೇಷವಾಗಿದೆ.