ನವದೆಹಲಿ: ಭದ್ರತಾ ಕಾರಣ (Security Risks) ನೀಡಿ ಟಿ20 ವಿಶ್ವಕಪ್ (T20 Cricket) ಕ್ರಿಕೆಟ್ ತಂಡವನ್ನು ಕಳುಹಿಸದ ಬಾಂಗ್ಲಾದೇಶ (Bangladesh) ಈಗ ಭಾರತದಲ್ಲಿ ಆಯೋಜನೆಗೊಂಡಿರುವ ಏಷ್ಯನ್ ರೈಫಲ್ ಮತ್ತು ಪಿಸ್ತೂಲ್ ಚಾಂಪಿಯನ್ಶಿಪ್ಗಾಗಿ ಭಾಗವಹಿಸಲು ತನ್ನ ಶೂಟಿಂಗ್ ತಂಡಕ್ಕೆ (Shooting Team) ಅನುಮತಿ ನೀಡಿದೆ.
ಕಾಂಟಿನೆಂಟಲ್ ಶೂಟಿಂಗ್ ಸ್ಪರ್ಧೆಯು ಫೆಬ್ರವರಿ 2 ರಿಂದ 14 ರವರೆಗೆ ನವದೆಹಲಿಯ ಡಾ. ಕರ್ಣಿ ಸಿಂಗ್ ಶೂಟಿಂಗ್ ರೇಂಜ್ನಲ್ಲಿ ನಡೆಯಲಿದೆ. ಹದಿನೇಳು ದೇಶಗಳು ಭಾಗವಹಿಸುವ ನಿರೀಕ್ಷೆಯಿದ್ದು, 300 ಕ್ಕೂ ಹೆಚ್ಚು ಶೂಟರ್ಗಳು ಭಾಗವಹಿಸಲಿದ್ದಾರೆ.
ಬಾಂಗ್ಲಾದೇಶವು ಇಬ್ಬರು ರೈಫಲ್ ಶೂಟರ್ಗಳನ್ನು ಕಳುಹಿಸಲಿದ್ದು, ಅವರು ಮೂರು ಸ್ಪರ್ಧೆಗಳಲ್ಲಿ ಸ್ಪರ್ಧಿಸಲಿದ್ದಾರೆ. ತಂಡದಲ್ಲಿ 21 ವರ್ಷದ ಮಹಿಳಾ ರೈಫಲ್ ಶೂಟರ್ ಅರೆಫಿನ್ ಶೈರಾ ಮತ್ತು 26 ವರ್ಷದ ಒಲಿಂಪಿಯನ್ ಮುಹಮ್ಮದ್ ರೋಬಿಯುಲ್ ಇಸ್ಲಾಂ ಸೇರಿದ್ದಾರೆ. ಮಿಶ್ರ ತಂಡ ಸ್ಪರ್ಧೆಗೆ ಜೊತೆಯಾಗುವ ಮೊದಲು ಇಬ್ಬರೂ 10 ಮೀಟರ್ ಏರ್ ರೈಫಲ್ ವೈಯಕ್ತಿಕ ಸ್ಪರ್ಧೆಗಳಲ್ಲಿ ಭಾಗವಹಿಸುತ್ತಾರೆ. ಇದನ್ನೂ ಓದಿ:ಟಿ20 ವಿಶ್ವಕಪ್ | ಪಾಕ್ ಜಾಗದಲ್ಲಿ ಆಡುತ್ತಾ ಬಾಂಗ್ಲಾದೇಶ?
ಟಿ20 ವಿಶ್ವಕಪ್ನಿಂದ ಬಾಂಗ್ಲಾದೇಶ ಹಿಂದೆ ಸರಿದ ನಂತರ ಶೂಟಿಂಗ್ ಚಾಂಪಿಯನ್ಶಿಪ್ನಲ್ಲಿ ಬಾಂಗ್ಲಾದೇಶ ಭಾಗವಹಿಸುವಿಕೆಯ ಬಗ್ಗೆ ಅನಿಶ್ಚಿತತೆ ಇತ್ತು. ಆದಾಗ್ಯೂ ಬಾಂಗ್ಲಾದೇಶ ಶೂಟರ್ಗಳು ಸ್ಪರ್ಧಿಸಲು ಸಿದ್ಧರಾಗಿದ್ದಾರೆ ಎಂದು ಭಾರತದ ರಾಷ್ಟ್ರೀಯ ರೈಫಲ್ ಅಸೋಸಿಯೇಷನ್ (ಎನ್ಆರ್ಎಐ) ದೃಢಪಡಿಸಿದೆ.
ಎನ್ಆರ್ಎಐ ಕಾರ್ಯದರ್ಶಿ ರಾಜೀವ್ ಭಾಟಿಯಾ ಪ್ರತಿಕ್ರಿಯಿಸಿ, ಇಲ್ಲಿಯವರೆಗೆ ಬಾಂಗ್ಲಾದೇಶ ತಂಡ ಬರುತ್ತಿಲ್ಲ ಎಂಬ ಸುದ್ದಿ ಇಲ್ಲ. ಅವರ ತಂಡ ಬರುತ್ತಿದೆ. ಅದರಲ್ಲಿ ಯಾವುದೇ ಸಂದೇಹವಿಲ್ಲ. ನಾವು ಬಾಂಗ್ಲಾದೇಶ ಫೆಡರೇಶನ್ ಅಧಿಕಾರಿಗಳ ಜೊತೆ ನಿಯಮಿತವಾಗಿ ಸಂಪರ್ಕದಲ್ಲಿದ್ದೇವೆ. ವಿದೇಶಾಂಗ ಸಚಿವಾಲಯವು ತನ್ನ ಅನುಮತಿಯನ್ನು ನೀಡಿದೆ ಮತ್ತು ವೀಸಾ ಪ್ರಕ್ರಿಯೆಗಾಗಿ ನಾವು ಭಾರತೀಯ ರಾಯಭಾರ ಕಚೇರಿಗೆ ಅದನ್ನು ಕಳುಹಿಸಿದ್ದೇವೆ ಎಂದು ಅವರು ಹೇಳಿದರು.
