ನರ್ಸ್ ಮಾಡಿದ ಎಡವಟ್ಟಿಗೆ 10 ತಿಂಗಳ ಮಗುವಿನ ಮುಖದಲ್ಲಿ ಗಾಯ

ಧಾರವಾಡ: ಆಸ್ಪತ್ರೆಯ ನರ್ಸ್ ಮಾಡಿದ ಎಡವಟ್ಟಿಗೆ 10 ತಿಂಗಳ ಮಗುವಿನ ಮುಖ ಸುಟ್ಟ ಘಟನೆ ಜಿಲ್ಲೆಯಲ್ಲಿ ನಡೆದಿದೆ.

ಧಾರವಾಡ ನಗರದ ತಾವರಗೇರಿ ನರ್ಸಿಂಗ್ ಹೋಂ ನಲ್ಲಿ ಈ ಘಟನೆ ನಡೆದಿದೆ. ಉಸಿರಾಟದ ತೊಂದರೆಯಿಂದ ಬಳಲುತಿದ್ದ ಮಗು ಲಾವಣ್ಯಳನ್ನ ಪೋಷಕರು ನಗರದ ತಾವರಗೇರೆ ಆಸ್ಪತ್ರೆಯಲ್ಲಿ ದಾಖಲಿಸಿದ್ದರು. ಈ ವೇಳೆ ಆಸ್ಪತೆಯ ನರ್ಸ್ ಮಗುವಿಗೆ ನೆಬ್ಯುಲೈಸರ್ ಮಾಡುವಾಗ ಬಾಯಿಯ ಅಕ್ಕಪಕ್ಕದಲ್ಲೆಲ್ಲ ಸುಟ್ಟುಹೋಗಿದೆ.

ನಗರದ ಗೊಲ್ಲರ ಕಾಲೋನಿಯ ನಾಗೇಶ ಹಾಗೂ ಅಂಜಲಿ ಎಂಬವರ ಮಗುವಿನ ಮುಖ ಸುಟ್ಟು ಗಾಯಗೊಂಡಿದ್ದು, ಈ ಘಟನೆ ನಡೆದು ಮೂರು ದಿನಗಳ ನಂತರ ಬೆಳಕಿಗೆ ಬಂದಿದೆ. ಸದ್ಯ ಅದೇ ಆಸ್ಪತ್ರೆಯಲ್ಲಿ ಮಗುವಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಹಾಲು ಕೂಡಾ ಉಣಿಸಿಲು ಆಗದಂತೆ ಮುಖಕ್ಕೆ ಗಾಯವಾಗಿರೋದ್ರಿಂದ ಮಗುವಿಗೆ ಸಲೈನ್ ಮೇಲೆ ಮಾತ್ರ ಇಡಲಾಗಿದೆ.

ಈ ಘಟನೆ ನಡೆದಿರುವ ಬಗ್ಗೆ ಆಸ್ಪತೆಯ ವೈದ್ಯರಿಗೆ ಕೇಳಿದರೆ, ನಿಮ್ಮ ಕೈಯಲ್ಲೇ ನೆಬ್ಯುಲೈಸರ್ ಕೊಡಲಾಗಿತ್ತು. ನೀವೇ ಇದಕ್ಕೆ ಜವಾಬ್ದಾರಿ ಎಂದು ಉತ್ತರ ನೀಡುತ್ತಿದ್ದಾರೆ ಎಂದು ಮಗುವಿನ ಪೋಷಕರು ಆರೋಪಿಸಿದ್ದಾರೆ.