ಅರುಣ್ ನಿರ್ದೇಶನದ ಅಥರ್ವ ಚಿತ್ರದ ಮೂಲಕ ಚಿರಂಜೀವಿ ಸರ್ಜಾರ ಅಳಿಯ ಪವನ್ ತೇಜಾ ನಾಯಕನಾಗಿರುವ ಅಥರ್ವ ಇಂದು ತೆರೆಗೆ ಬಂದಿದೆ. ಹುಟ್ಟು ಸಾವುಗಳ ನಡುವೆ ಘಟಿಸೋ ಸೂಕ್ಷ್ಮ ಕಥಾ ಹಂದರ ಹೊಂದಿರೋ ಈ ಚಿತ್ರದ ಮೂಲಕ ಪವನ್ ತೇಜಾ ಮಾಸ್ ಲುಕ್ಕಿನಲ್ಲಿಯೇ ಎಂಟ್ರಿ ಕೊಟ್ಟಿದ್ದಾರೆ. ಇದರೊಂದಿಗೆ ಪವನ್ ಮತ್ತು ಯುವ ಖಳನಟ ಯಶವಂತ್ ಶೆಟ್ಟಿ ನಡುವೆ ಈ ಚಿತ್ರದಲ್ಲಿ ಭೀಕರ ಕಾಳಗ ಕೂಡಾ ಅನಾವರಣಗೊಂಡಿದೆ! ಅಥರ್ವ ಚಿತ್ರದಲ್ಲಿ ಪವನ್ ತೇಜಾ ಪಕ್ಕಾ ಮಾಸ್ ಲುಕ್ಕಿನಲ್ಲಿ ದಿಗ್ದರ್ಶನ ನೀಡಿದ್ದಾರೆ.
ಅದಕ್ಕೆ ಸರಿಯಾಗಿ ಇತ್ತೀಚೆಗೆ ಕನ್ನಡ ಚಿತ್ರರಂಗದಲ್ಲಿ ಖಳನಟನಾಗಿ ನೆಲೆಯೂರುತ್ತಿರುವ ಯಶವಂತ್ ಶೆಟ್ಟಿ ಕೂಡಾ ಈ ಚಿತ್ರದಲ್ಲಿ ಅಬ್ಬರಿಸಿದ್ದಾರೆ.
ಅಥರ್ವ ಎಂದರೆ ನರಸಿಂಹಸ್ವಾಮಿಯಂತೆ. ಹೀರೋ ಕೂಡಾ ನರಸಿಂಹದೇವರ ಪರಮಭಕ್ತ. ಆದರೆ ನಾಯಕಿಯ ದೃಷ್ಟಿಯಲ್ಲೇ ಹೀರೋನೇ ವಿಲನ್ನು. ಆಕೆ ಹಾಗೆ ತಿಳಿದುಕೊಳ್ಳಲು ಕಾರಣ ಸಂದರ್ಭ. ತಾಯಿಯಲ್ಲದ ಆಕೆಗೆ ತಂದೆಯೇ ಸರ್ವಸ್ವ. ಆಕೆ ಜೀವಕ್ಕೆ ಜೀವವಾಗಿ ಪ್ರೀತಿಸೋ ತಂದೆಯೇ ಇಲ್ಲವಾಗುತ್ತಾನೆ. ಯಾರೋ ಮಾಡಿದ ತಪ್ಪು ಮತ್ತೊಬ್ಬನ ಹೆಗಲಿಗೆ ನೇತುಬೀಳುತ್ತದೆ. ತನ್ನದಲ್ಲದ ತಪ್ಪನ್ನು ಸಾಬೀತು ಮಾಡಲು ನಾಯಕ ನಟ ನಾಯಕಿಯ ತಂದೆಯನ್ನು ಕೊಂದವರ ಮೇಲೆ ಸೇಡು ತೀರಿಸಿಕೊಳ್ಳಬೇಕಾಗುತ್ತದೆ. ಈ ನಡುವೆ ತನ್ನಪ್ಪನಿಗೆ ಕೊಟ್ಟ ಭಾಷೆಯ ಕಾರಣಕ್ಕೆ ಆಕೆ ಮತ್ತೊಬ್ಬನನ್ನು ಮದುವೆಯಾಗಬೇಕಾದ ಸಂದಿಗ್ಧ ಎದುರಾಗುತ್ತದೆ. ಕಡೆಗೂ ಪ್ರೀತಿಸಿದವನನ್ನೇ ಕೈ ಹಿಡಿಯುತ್ತಾಳಾ ಅಥವಾ ತಂದೆಗೆ ಕೊಟ್ಟ ಮಾತಿಗೆ ಒಪ್ಪಿ ಬೇರೊಬ್ಬನ ಜೊತೆಗಾತಿಯಾಗುತ್ತಾಳಾ ಅನ್ನೋದು ಕುತೂಹಲ ಹುಟ್ಟಿಸುವ ವಿಚಾರ.
ನಿರ್ದೇಶಕ ಅರುಣ್ ಸಿನಿಮಾವನ್ನು ಸುಂದರವಾಗಿಸುವ ಭರದಲ್ಲಿ ಚಿತ್ರಕತೆಯ ಬಗ್ಗೆ ತಲೆಕೆಡಿಸಿಕೊಳ್ಳೋದನ್ನು ಮರೆತಂತೆ ಕಾಣುತ್ತದೆ. ರಂಗಭೂಮಿಯಲ್ಲಿ ಪಳಗಿರುವ ಪವನ್ ತೇಜ ಸಿನಿಮಾಗೆ ಬೇಕಿರುವ ಗ್ರಾಮರನ್ನು ಒಂಚೂರು ಒಗ್ಗಿಸಿಕೊಂಡರೂ ಕನ್ನಡ ಚಿತ್ರತಂಗದಲ್ಲಿ ಸಮರ್ಥ ನಾಯಕನಟನಾಗಿ ನೆಲೆ ನಿಲ್ಲಬಹುದು. ರಾಘವೇಂದ್ರ ನೀಡಿರುವ ಸಂಗೀತ ಹಿತವಾಗಿದೆ. ರಂಗಾಯಣ ರಘು, ಸುಚೇಂದ್ರ ಪ್ರಸಾದ್ ಎಂದಿನಂತೆ ಲೀಲಾಜಾಲವಾಗಿ ನಟಿಸಿದ್ದಾರೆ. ಶಿವಸೇನ ಅವರ ಛಾಯಾಗ್ರಹಣ ಸಿನಿಮಾದ ದೊಡ್ಡ ಶಕ್ತಿಯಾಗಿದೆ. ಒಟ್ಟಾರೆ ಅಥರ್ವ ಖಡಕ್ಕಾದ ಕಮರ್ಷಿಲ್ ಚಿತ್ರವಾಗಿದೆ.
