ಉಡುಪಿ: ರಾಜ್ಯದಲ್ಲಿ ಹಿಂದೆಂದೂ ಕಂಡರಿಯದ ಭೀಕರ ಬರ ಎದುರಾಗಿದೆ. ಜನ ನೀರಿಲ್ಲದೆ ಪರದಾಡುತ್ತಿದ್ದಾರೆ. ಜಾನುವಾರು ಮೇವಿಲ್ಲದೆ ತತ್ತರಿಸಿ ಹೋಗಿವೆ. ಇದೆಲ್ಲಾ ನಮ್ಮ ಕಣ್ಣಿಗೆ ಕಾಣುವ ಸತ್ಯ. ಗದ್ದೆ- ಹಳ್ಳಕೊಳ್ಳಗಳು ಒಣಗಿ ಹೋಗಿ ಅದೆಷ್ಟೋ ಪಕ್ಷಿಗಳಿಗೆ ಕುಡಿಯಲು ನೀರು, ತಿನ್ನಲು ಆಹಾರವಿಲ್ಲದೆ ಕಂಗಾಲಾಗಿದೆ.
ಉಡುಪಿ ಜಿಲ್ಲೆಯ ಶಿರ್ವ ಗ್ರಾಮದಲ್ಲಿ ಕಂಡು ಬಂದ ದೃಶ್ಯ ಇದು. ಬೆಳ್ಳಕ್ಕಿಯೊಂದು ಬಿಸಿಲ ಬೇಗೆಗೆ ತುತ್ತಾಗಿ ನೀರನ್ನು ಹುಡುಕುತ್ತಿರುವ ಫೋಟೋ ಇದು. ಸ್ಥಳೀಯರಾದ ಫ್ಲಾಯ್ಡ್ ಡಿಸೋಜಾ ಈ ಚಿತ್ರಗಳನ್ನು ಕ್ಲಿಕ್ ಮಾಡಿದ್ದಾರೆ. ಆಹಾರ ಸಿಗದೇ ಸಪ್ಪೆ ಮೋರೆ ಹಾಕಿ ನಿಂತಿರುವ ಬೆಳ್ಳಕ್ಕಿ ನೀರಿಗಾಗಿ, ಹುಳು ಹುಪ್ಪಟೆಗಾಗಿ ಅರಸುತ್ತಿರುವ ಫೋಟೋ ಇದು.
ಕರಾವಳಿ ಭಾಗದ ಗದ್ದೆಗಳಲ್ಲಿ ಸಾವಿರಾರು ಬೆಳ್ಳಕ್ಕಿಗಳು ಇರುತ್ತವೆ. ಮಳೆಗಾಲದಲ್ಲಿ ಗದ್ದೆ ಕೆರೆ-ತೊರೆ ತುಂಬಿ ಸಂಭ್ರಮದಲ್ಲಿರುತ್ತವೆ. ಆದ್ರೆ ಬೇಸಿಗೆ ಬಂದೊಡನೆ ಬೇರೆಡೆ ಹಾರಿ ಹೋಗುತ್ತವೆ.
ನಿಮ್ಮ ಮನೆ- ಕಚೇರಿ ಅಕ್ಕಪಕ್ಕದಲ್ಲಿ ಬಾಯಾರಿದ ಪಕ್ಷಿಗಳಿಗಾಗಿ ನೀರಿಡಿ. ಮಾತು ಬಾರದ, ಕಷ್ಟ ಹೇಳಿಕೊಳ್ಳಲಾಗದ ಬಾನಾಡಿಗಳಿಗೆ ಸಹಾಯ ಮಾಡಿ ಅನ್ನೊದು ಪಬ್ಲಿಕ್ ಟಿವಿಯ ವಿನಂತಿ.
ಇದನ್ನೂ ಓದಿ: ನೀರನ್ನು ಅರಸಿ ನಾಡಿಗೆ ಬಂದ ಕಾಳಿಂಗ: ವಿಡಿಯೋ ನೋಡಿ
