ವಾಷಿಂಗ್ಟನ್: ಊಟ ತಿನ್ನಲ್ಲ ಎಂದ 2 ವರ್ಷದ ಕಂದಮ್ಮನನ್ನು ತಾಯಿ ಆಕೆಯ ಗೆಳೆಯನ ಜೊತೆ ಸೇರಿಕೊಂಡು ಹೊಡೆದು ಸಾಯಿಸಿರುವ ಘಟನೆ ಅಮೆರಿಕಾದ ಕಾನ್ಸಾನ್ನಲ್ಲಿ ನಡೆದಿದೆ.
ಎಲಿಜೆಬೆತ್ ವೊಲ್ಹೀಟರ್ ತನ್ನ ಎರಡು ವರ್ಷದ ಗಂಡು ಮಗನನ್ನು ಊಟ ತಿನ್ನಲ್ಲ ಎಂದು ತನ್ನ ಗೆಳಯ ಕ್ಯೂಕಾಸ್ ಡೀಲ್ ಜೊತೆ ಸೇರಿಕೊಂಡು ಕ್ರೂರವಾಗಿ ಥಳಿಸಿದ್ದಾಳೆ. ಎರಡು ದಿನದ ನಂತರ ಆ ಮಗು ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದೆ.
ಮಗು ಊಟ ತಿನ್ನಲ್ಲ ಎಂದು ಎಲಿಜೆಬೆತ್ ಮತ್ತು ಲ್ಯೂಕಾಸ್ ಸೇರಿಕೊಂಡು ಮಗುವಿಗೆ ಮನಬಂದಂತೆ ಥಳಿಸಿದ್ದಾರೆ. ಈ ಘಟನೆಯಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ಮಗುವನ್ನು ಹತ್ತಿರದ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಎರಡು ದಿನಗಳ ಕಾಲ ಐಸಿಯುನಲ್ಲಿದ್ದ ಮಗು ಮೃತಪಟ್ಟಿದೆ. ಮಗುವಿನ ತಲೆಗೆ ಮತ್ತು ಮುಖಕ್ಕೆ ಗಂಭೀರವಾಗಿ ಗಾಯವಾಗಿದ್ದು, ಕೆಲ ಮೂಳೆಗಳು ಮುರಿದು ಹೋಗಿವೆ ಎಂದು ಮರಣೋತ್ತರ ಪರೀಕ್ಷೆ ತಿಳಿಸಿದೆ.
ಈ ವಿಚಾರದ ಬಗ್ಗೆ ಮಾತನಾಡಿರುವ ಮಗುವಿನ ಅಜ್ಜ ವೊಲ್ಹೀಟರ್, ಮಗು ಹುಟ್ಟಿದ ವರ್ಷವೇ ಅಂದರೆ 2017 ರಲ್ಲೇ ಎಲಿಜೆಬೆತ್ ಮಗುವಿನ ಮೇಲೆ ಹಲ್ಲೆ ಮಾಡಿದ್ದಳು. ಆದರೆ ಆಕೆಯ ಮೇಲೆ ಆರೋಪ ಹೊರಿಸಲು ಯಾವುದೇ ಸಾಕ್ಷಿ ಇಲ್ಲದ ಕಾರಣ ನಾನು ಸುಮ್ಮನಾಗಿದ್ದೆ ಎಂದು ಹೇಳಿದ್ದಾರೆ.
ಈಗ ಎಲಿಜೆಬೆತ್ ಮತ್ತು ಲ್ಯೂಕಾಸ್ ನನ್ನು ಪೊಲೀಸರು ಅರೆಸ್ಟ್ ಮಾಡಿದ್ದು, ಸ್ಥಳೀಯ ನ್ಯಾಯಾಲಯವು ಎಲಿಜೆಬೆತ್ 19 ವರ್ಷ ಐದು ತಿಂಗಳು ಜೈಲು ಶಿಕ್ಷೆ ವಿಧಿಸಿದೆ ಮತ್ತು ಈ ಪ್ರಕರಣದಲ್ಲಿ ಎರಡನೇ ಆರೋಪಿಯದ ಲ್ಯೂಕಾಸ್ ಗೆ 49 ವರ್ಷ ಜೈಲು ಶಿಕ್ಷೆಯನ್ನು ವಿಧಿಸಿದೆ.
