ಮಂಡ್ಯ: ಇಂದು ರೆಬೆಲ್ ಸ್ಟಾರ್ ಅಂಬರೀಶ್ ಅವರ 67ನೇ ಹುಟ್ಟುಹಬ್ಬ. ಹೀಗಾಗಿ ಇದೇ ದಿನದಂದು ಮಂಡ್ಯದಲ್ಲಿ ಸುಮಲತಾ ಅಂಬರೀಶ್ ಅವರು ವಿಜಯೋತ್ಸವದ ಕಾರ್ಯಕ್ರಮ ನಡೆಸುತ್ತಿದ್ದಾರೆ. ಈ ವೇಳೆ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ಅಭಿಮಾನಿಯೊಬ್ಬರು ಅಂಬಿ ಭಾವಚಿತ್ರವುಳ್ಳ ಬರೋಬ್ಬರಿ 750 ಗ್ರಾಂ ತೂಕ ಇರುವ ಚಿನ್ನದ ಹಾರ ಧರಿಸಿ ಎಲ್ಲರ ಗಮನ ಸೆಳೆದಿದ್ದಾರೆ.
ಮಂಡ್ಯದ ಕೀಲಾರದ ರುದ್ರಗೌಡ ಅವರೇ ಈ ಚಿನ್ನದ ಅಭಿಮಾನಿ. ಕಳೆದ 35 ವರ್ಷದಿಂದ ಅಂಬರೀಶ್ ಅಭಿಮಾನಿಯಾಗಿರುವ ರುದ್ರೆಗೌಡರು, ಅಂಬರೀಶ್ ಭಾವಚಿತ್ರವುಳ್ಳ ಚಿನ್ನದ ಪದಕದ ಜೊತೆ ಬೃಹತ್ ಚಿನ್ನದ ಹಾರ ಹಾಕಿಕೊಂಡಿದ್ದಾರೆ. 7-8 ವರ್ಷಗಳಿಂದ ಅಭಿಮಾನಿ ಈ ಚಿನ್ನದ ಪದಕ ಇರುವ ಹಾರ ಮಾಡಿಸಿಕೊಂಡು, ಅದನ್ನು ಧರಿಸಿ ಅಭಿಮಾನ ಮೆರೆಯುತ್ತಿದ್ದಾರೆ.
ಈ ಬಗ್ಗೆ ಮಾಧ್ಯಮಗಳ ಜೊತೆ ಮಾತನಾಡಿದ ಅವರು, ನಾನು 35 ವರ್ಷದಿಂದ ಅಣ್ಣನ ಅಭಿಮಾನಿ. ಅವರ ಚಿತ್ರ ಅವರ ಜೀವನ ನಮಗೆ ಪ್ರೇರಣೆ. ನಾವು ಯಾವಾಗಲೂ ಅವರ ಜೊತೆ ಇರುತ್ತಿದ್ದೇವು. ಇಂದು ಅವರು ನಮ್ಮ ಜೊತೆ ಇಲ್ಲ. ಈ ವಿಜಯೋತ್ಸವವನ್ನ ಅವರು ನೋಡಬೇಕಿತ್ತು ಎಂದರು.
ಈ ಚಿನ್ನದ ಪದಕಕ್ಕೆ ಯಾವುದೇ ತೆರಿಗೆ ಸಮಸ್ಯೆ ಇಲ್ಲ. ಅಣ್ಣನ ಫೋಟೋ ಇದ್ದ ಮೇಲೆ ಸಮಸ್ಯೆ ಬರುವುದಿಲ್ಲ ಎಂದು ಹೇಳಿದರು.
