ಬೆಂಗಳೂರು: ಕಾಂಗ್ರೆಸ್ ಪಕ್ಷದ ಸೋಷಿಯಲ್ ಮೀಡಿಯಾ ಮುಖ್ಯಸ್ಥೆಯಾಗಿದ್ದ ನಟಿ ರಮ್ಯಾ ಸಿನಿಮಾರಂಗದಿಂದ ದೂರ ಸರಿದು ತುಂಬಾ ವರ್ಷಗಳೇ ಕಳೆದಿವೆ. ಇತ್ತ ಲೋಕಸಭೆ ಚುನಾವಣೆ ಬಳಿಕ ಎಲ್ಲಿಯೂ ಕಾಣಿಸಿಕೊಂಡಿಲ್ಲ. ಇದೀಗ ನನ್ನ ‘ದಿಲ್ ಕಾ ರಾಜ’ ಎಂದು ಪದ್ಮಾವತಿ ಸಿನಿರಂಗಕ್ಕೆ ರೀ ಎಂಟ್ರಿ ಕೊಟ್ಟಿದ್ದಾರೆ.
ಹೌದು. ನಟ ಪುನೀತ್ ರಾಜ್ಕುಮಾರ್ ಅಭಿನಯದ ‘ಅಭಿ’ ಸಿನಿಮಾದ ಮೂಲಕ ಚಂದನವನಕ್ಕೆ ಎಂಟ್ರಿ ಕೊಟ್ಟ ಮೋಹಕ ತಾರೆ ರಮ್ಯಾ ಸ್ಯಾಂಡಲ್ವುಡ್ ಕ್ವೀನ್ ಎಂದೇ ಖ್ಯಾತಿ ಪಡೆದಿದ್ದರು. ಆದರೆ ರಮ್ಯಾ ಸಿನಿಮಾರಂಗದಿಂದ ದೂರ ಸರಿದು ವರ್ಷಗಳೇ ಕಳೆದಿತ್ತು. ಕೊನೆಯದಾಗಿ ‘ನಾಗರಹಾವು’ ಸಿನಿಮಾದ ಮೂಲಕ ಅಭಿಮಾನಿಗಳ ಮುಂದೆ ಬಂದಿದ್ದರು. ನಂತರ ಎಲ್ಲೂ ತೆರೆ ಮೇಲೆ ಕಾಣಿಸಿಕೊಂಡಿರಲಿಲ್ಲ. ಇದೀಗ ರಮ್ಯಾ ‘ದಿಲ್ ಕಾ ರಾಜ’ ಸಿನಿಮಾ ಮೂಲಕ ಮತ್ತೆ ತೆರೆ ಮೇಲೆ ಕಾಣಿಸಿಕೊಂಡಿದ್ದಾರೆ.
ಇತ್ತೀಚೆಗಷ್ಟೆ ಈ ಸಿನಿಮಾದ ಟೀಸರ್ ರಿಲೀಸ್ ಆಗಿದೆ. ಟೀಸರಿನಲ್ಲಿ ರಮ್ಯಾ ಅಭಿನಯಿಸಿರುವುದನ್ನು ಕಾಣಬಹುದಾಗಿದೆ. ಈ ಮೂಲಕ ಸುಮಾರು 5 ವರ್ಷಗಳ ಬಳಿಕ ಅಭಿಮಾನಿಗಳ ಮುಂದೆ ಮೋಹಕ ತಾರೆ ಬರಲಿದ್ದಾರೆ. ‘ದಿಲ್ ಕಾ ರಾಜ’ ಸಿನಿಮಾ ಸೆಟ್ಟೇರಿ ಐದಾರು ವರ್ಷಗಳೇ ಕಳೆದಿದೆ. ಚಿತ್ರೀಕರಣ ಕೂಡ ಬೇಗ ಮುಗಿದಿತ್ತು. ಆದರೆ ಇನ್ನೂ ಒಂದಿಷ್ಟು ಶೂಟಿಂಗ್ ಬಾಕಿ ಇರುವಾಗಲೇ ರಮ್ಯಾ ಸಿನಿಮಾದಲ್ಲಿ ದೂರ ಸರಿದಿದ್ದರು. ಹೀಗಾಗಿ ಸಿನಿಮಾ ಬರುವುದು ತಡವಾಗಿದೆ.
ಚಿತ್ರದಲ್ಲಿ ಪ್ರಜ್ವಲ್ ದೇವರಾಜ್ ನಾಯಕನಾಗಿ ಮಿಂಚಿದ್ದು, ರಮ್ಯಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಈ ಮೂಲಕ ರಮ್ಯಾ ರಾಜಕೀಯ ಚಟುವಟಿಕೆಗಳಿಗೆ ಪೂರ್ಣವಿರಾಮ ಹಾಕಿ, ಮತ್ತೆ ಬಣ್ಣದ ಬದುಕಿಗೆ ಎಂಟ್ರಿ ಆಗುತ್ತಿದ್ದಾರಾ ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಮೂಡಿದೆ.
ಸೋಮನಾಥ್ ಪಿ ಪಾಟೀಲ್ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿ ಬರುತ್ತಿದೆ. ಟೀಸರಿನಲ್ಲಿ ಯಾವುದೇ ಡೈಲಾಗ್ ಇಲ್ಲ, ಕಥೆ ಏನೆಂಬುದರ ಸುಳಿವೂ ಕೂಡ ಇಲ್ಲ. ಆದರೆ ನಾಯಕ-ನಾಯಕಿ ನಡುವಿನ ಲವ್ಸ್ಟೋರಿ ಮತ್ತು ಕೊಂಚ ಆ್ಯಕ್ಷನ್ ಝುಲಕ್ ಮಾತ್ರ ಇದೆ.
