ನಯನತಾರಾ ಬಗ್ಗೆ ಕನ್ನಡದ ‘ಗೂಳಿ’ ನಟಿ ಶಾಕಿಂಗ್ ಹೇಳಿಕೆ

ಕನ್ನಡದ ‘ಗೂಳಿ’ (Gooli) ಸಿನಿಮಾ ಸೇರಿದಂತೆ ಬಹುಭಾಷೆಗಳಲ್ಲಿ ನಟಿಸಿರುವ ಮಮತಾ ಮೋಹನ್‌ದಾಸ್ (Mamatha Mohandas) ಅವರ ಆರೋಗ್ಯದಲ್ಲಿ ಚೇತರಿಕೆ ಕಂಡಿದೆ. ಈ ಬೆನ್ನಲ್ಲೇ ತಮಿಳು ಸಿನಿಮಾರಂಗದಲ್ಲಿ (Kollywood) ಅನುಭವಿಸಿದ ಕೆಟ್ಟ ಘಟನೆಯೊಂದನ್ನ ನಟಿ ಮಮತಾ ಬಿಚ್ಚಿಟ್ಟಿದ್ದಾರೆ.

ನಟ ಸುದೀಪ್ (Kiccha Sudeep) ಜೊತೆ ಗೂಳಿ, ಜನ ಗಣ ಮನ, ಎನಿಮಿ, ಕೆಡಿ ಸಿನಿಮಾ ಸೇರಿದಂತೆ ಬಹುಭಾಷಾಗಳಲ್ಲಿ ನಟಿಸುವ ಮೂಲಕ ಮಮತಾ ಮೋಹನ್‌ದಾಸ್ ಗಮನ ಸೆಳೆದಿದ್ದರು. ಇದೀಗ  ರಜನಿಕಾಂತ್ ಸಿನಿಮಾದಿಂದ ದೂರ ಇಡುವಂತೆ ನಯನತಾರಾ(Nayanatara) ಬೆದರಿಕೆ ಹಾಕಿದ್ರು ಎಂದು ‘ಗೂಳಿ’ ನಟಿ ಮಮತಾ ಶಾಕಿಂಗ್ ಹೇಳಿಕೆ ನೀಡಿದ್ದಾರೆ.

ಸ್ಟಾರ್ ನಟ ರಜನಿಕಾಂತ್ (Rajanikanth) ಜೊತೆ ನಟಿಸುವ ನನಗೆ ಅವಕಾಶ ಸಿಕ್ಕಿತ್ತು. ಕೆಲವು ದೃಶ್ಯಗಳ ಚಿತ್ರೀಕರಣ ಸಹ ಆಗಿತ್ತು. ಆದರೆ ನಯನತಾರಾ ಕಾರಣ ಆ ಸಿನಿಮಾದ ದೃಶ್ಯಗಳನ್ನು ಹೇಳದೆ ಕೇಳದೆ ಕಿತ್ತೆಸೆಯಲಾಗಿದೆ. ಅಲ್ಲದೇ ತನ್ನನ್ನೂ ಆ ಸಿನಿಮಾದಿಂದ ದೂರ ಇಡಲಾಯಿತು ಎಂದು ಇತ್ತೀಚಿನ ಸಂದರ್ಶನದಲ್ಲಿ ಮಮತಾ ಹೇಳಿರುವ ಈ ಮಾತುಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಇದನ್ನೂ ಓದಿ:ಐಟಂ ಸಾಂಗ್‌ಗೆ ಸೊಂಟ ಬಳುಕಿಸಲು ದುಬಾರಿ ಸಂಭಾವನೆ ಬೇಡಿಕೆಯಿಟ್ಟ ‘ಕಬ್ಜ’ ಸುಂದರಿ

ರಜನೀಕಾಂತ್ ನಟನೆಯ ‘ಕುಸೇಲನ್’ (Kuselan Film)ಸಿನಿಮಾದ ಹಾಡೊಂದರಲ್ಲಿ ನಾನು ಅವರೊಟ್ಟಿಗೆ ನಟಿಸಿದ್ದೆ. ಕೆಲವು ದಿನಗಳ ಶೂಟಿಂಗ್ ಸಹ ಮಾಡಲಾಗಿತ್ತು. ಆದರೆ ಆ ಸಿನಿಮಾದ ನಾಯಕಿ (ನಯನತಾರಾ) ಸಿನಿಮಾದ ನಿರ್ದೇಶಕರ ಮೇಲೆ ಒತ್ತಡ ಹೇರಿ ನನ್ನನ್ನು ಹಾಡಿನಿಂದ ದೂರ ಇಡುವಂತೆ ಮಾಡಿದ್ದರು. ಸಿನಿಮಾ ರಿಲೀಸ್ ಬಳಿಕ ಇದು ನನಗೆ ಗೊತ್ತಾಗಿ ತುಂಬಾ ಅಚ್ಚರಿಯಾಯ್ತು ಎಂದು ನಟಿ ಮಮತಾ ಹೇಳಿದ್ದಾರೆ.

ಬೇರೆ ಯಾರನ್ನೋ ಕರೆಸಿ ರಜನೀಕಾಂತ್ ಅವರೊಟ್ಟಿಗೆ ಡ್ಯಾನ್ಸ್ ಮಾಡಿಸುವುದಾದರೆ ನಾನು ಏಕೆ ಬೇಕು? ನಾನು ಚಿತ್ರೀಕರಣಕ್ಕೆ ಬರುವುದಿಲ್ಲ ಎಂದು ನಾಯಕಿ (ನಯನತಾರಾ) ಆ ಸಿನಿಮಾದ ನಿರ್ದೇಶಕರಿಗೆ ಹೇಳಿದ್ದರಂತೆ, ಈ ವಿಚಾರ ಸಿನಿಮಾ ರಿಲೀಸ್ ಬಳಿಕ ನನಗೆ ಗೊತ್ತಾಯಿತು. ಆಗ ಅದು ನನಗೆ ಬೆದರಿಕೆ ಎನಿಸಿತು. ನಾನು ಅದನ್ನು ಸಮಾಧಾನದಿಂದಲೇ ಸ್ವೀಕರಿಸಿದೆ ಎಂದು ಮಮತಾ ಹೇಳಿದ್ದಾರೆ. ತಲೈವಾ ಅವರ ‘ಕುಸೇಲನ್’ ಸಿನಿಮಾದ ಹಾಡೊಂದರಲ್ಲಿ ಮಮತಾ ಮೋಹನ್ ದಾಸ್ ಕೆಲವೇ ಸೆಕೆಂಡ್ ಅಷ್ಟೆ ಕಾಣಿಸುತ್ತಾರೆ. ಅಲ್ಲಿಯೂ ಅವರ ಮುಖ ಸರಿಯಾಗಿ ಕಾಣುವುದಿಲ್ಲ. ಸಂದರ್ಶನದಲ್ಲಿ ನಯನತಾರಾ ಹೆಸರು ಹೇಳದೇ ಈ ಘಟನೆ ಬಗ್ಗೆ ನಟಿ ಮಮತಾ ಮಾತನಾಡಿದ್ದಾರೆ.