ಬೆಂಗಳೂರು: ದುನಿಯಾ ಚಿತ್ರದ ಸಾದಾ ಸೀದಾ ಹುಡುಗಿಯಾಗಿ ಚಿತ್ರರಂಗಕ್ಕೆ ಪರಿಚಯವಾದವರು ರಶ್ಮಿ. ಈ ಚಿತ್ರದ ಮೂಲಕ ಗ್ರ್ಯಾಂಡ್ ಓಪನಿಂಗ್ ಪಡೆದುಕೊಂಡಿದ್ದ ರಶ್ಮಿ ಆ ಬಳಿಕವೂ ಒಂದಷ್ಟು ಚಿತ್ರಗಳಲ್ಲಿ ನಟಿಸಿ ಪ್ರೇಕ್ಷಕರಿಗೆ ಹತ್ತಿರಾಗಿದ್ದರು. ಆದರೆ ಅದ್ಯಾಕೋ ಸುದೀರ್ಘ ಅವಧಿಯಲ್ಲಿ ಚಿತ್ರರಂಗದಿಂದ ದೂರವೇ ಉಳಿದಿದ್ದ ರಶ್ಮಿ ಇದೀಗ ಕಾರ್ನಿ ಚಿತ್ರದ ಮೂಲಕ ಪಕ್ಕಾ ಡಿಫರೆಂಟ್ ಲುಕ್ಕಿನಲ್ಲಿ ಪ್ರೇಕ್ಷಕರ ಮುಂದೆ ಬರಲು ಅಣಿಯಾಗಿದ್ದಾರೆ. ಈ ಚಿತ್ರ ಇದೇ ಶುಕ್ರವಾರ ರಾಜ್ಯಾದ್ಯಂತ ತೆರೆ ಕಾಣಲಿದೆ.
ಗೋವಿಂದರಾಜ್ ನಿರ್ಮಾಣದ ಕಾರ್ನಿ ಚಿತ್ರ ಈಗಾಗಲೇ ಪ್ರೇಕ್ಷಕರನ್ನು ಸೆಳೆದುಕೊಡಿದೆ. ವಿನೋದ್ ಕುಮಾರ್ ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಕಾರ್ನಿ ಎಂಬ ಹೆಸರೇ ನಿಗೂಢವಾದುದೇನನ್ನೋ ಧ್ವನಿಸುವಂತಿದೆ. ದುರ್ಗಾ ಮಾತೆಯ ಕೈಲಿರುವ ದುಷ್ಟ ಸಂಹಾರ ಮಾಡೋ ಅಸ್ತ್ರಕ್ಕೆ ಕಾರ್ನಿ ಎಂಬ ಹೆಸರಿದೆ. ಈ ಪದ ಈ ಚಿತ್ರದ ಕಥೆಗೆ ಪಕ್ಕಾ ಸೂಟ್ ಆಗೋದರಿಂದ ಶೀರ್ಷಿಕೆಯಾಗಿಡಲಾಗಿದೆಯಂತೆ.
ಇದುವರೆಗೂ ದುನಿಯಾ ರಶ್ಮಿ ಪಕ್ಕದ ಮನೆ ಹುಡುಗಿಯಂಥಾ ಪಾತ್ರಗಳಲ್ಲಿಯೇ ಕಾಣಿಸಿಕೊಂಡಿದ್ದಾರೆ. ಆದರೆ ಈ ಚಿತ್ರದಲ್ಲವರು ಸಂಪೂರ್ಣ ಭಿನ್ನವಾದ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿದ್ದಾರೆಂಬುದು ಚಿತ್ರ ತಂಡದ ಭರವಸೆ. ನಿರ್ದೇಶಕರು ಈ ಚಿತ್ರದಲ್ಲಿನ ಮುಖ್ಯ ಪಾತ್ರಕ್ಕೆ ಆರಂಭದಲ್ಲಿಯೇ ರಶ್ಮಿಯವರನ್ನು ಆಯ್ಕೆ ಮಾಡಿದ್ದರಂತೆ, ಈ ಪಾತ್ರದ ಬಗ್ಗೆ ತಿಳಿದುಕೊಂಡ ರಶ್ಮಿ ಕಷ್ಟಪಟ್ಟು ಸ್ಲಿಂ ಆಗಿ ಇಡೀ ಪಾತ್ರವನ್ನು ನಿರ್ವಹಿಸಿದ್ದಾರಂತೆ.
ಕಾರ್ನಿ ಮಹಿಳಾ ಪ್ರಧಾನ ಚಿತ್ರ, ಹಾರರ್ ಚಿತ್ರ ಅಂತೆಲ್ಲ ಸುದ್ದಿ ಹರಿದಾಡುತ್ತಿದೆ. ಅಸಲಿಗೆ ಇದು ಪಕ್ಕಾ ಸೈಕಾಲಾಜಿಕಲ್ ಥ್ರಿಲ್ಲರ್ ಚಿತ್ರ. ಖಂಡಿತಾ ಇದು ಹಾರರ್ ವೆರೈಟಿಯ ಚಿತ್ರವಲ್ಲವಂತೆ. ಆದರೆ ಇಡೀ ಕಥೆ ಮಲೆನಾಡು ವಾತಾವರಣದ ಕಾಡೊಳಗೆ ನಡೆಯುತ್ತೆ. ಐವರು ಹುಡುಗೀರು ನಾಪತ್ತೆಯಾಗಿ ಅದರ ಸುತ್ತಾ ಬಿಚ್ಚಿಕೊಳ್ಳೋ ರೋಚಕ ಕಥಾ ಹಂದರವನ್ನು ಈ ಚಿತ್ರ ಹೊಂದಿದೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv