– ಮತ್ತೆ ಬಂದಳು ಮೈಸೂರು ಹುಡುಗಿ!
ಬೆಂಗಳೂರು: ಈ ಹಿಂದೆ ಗೆಲುವು ಕಂಡಿದ್ದ ವಿಕ್ಟರಿ ಹೆಸರಿನಲ್ಲೇ ಶರಣ್ ನಟಿಸುತ್ತಿರೋ ಮತ್ತೊಂದು ಚಿತ್ರ ವಿಕ್ಟರಿ 2. ಮೊದಲ ಚಿತ್ರದಂಥಾದ್ದೇ ಗೆಲುವೊಂದನ್ನು ಮರಳಿ ಪಡೆಯ ಬೇಕೆಂಬ ಹಂಬಲದಿಂದ ಚಿತ್ರತಂಡ ಶ್ರಮ ವಹಿಸಿ ಚಿತ್ರೀಕರಣ ಮುಗಿಸಿಕೊಂಡಿದೆ. ಅಂದಹಾಗೆ ಇಂಥಾದ್ದೇ ಒಂದು ಗೆಲುವಿನ ತುಡಿತದೊಂದಿಗೆ ಅಪೂರ್ವ ಈ ಚಿತ್ರದ ನಾಯಕಿಯಾಗಿ ರೀ ಎಂಟ್ರಿ ಕೊಟ್ಟಿದ್ದಾಳೆ.
ವರ್ಷಾಂತರಗಳ ಹಿಂದೆ ಕ್ರೇಜಿಸ್ಟಾರ್ ರವಿಚಂದ್ರನ್ ನಟಿಸಿ ನಿರ್ದೇಶನ ಮಾಡಿದ್ದ ಅಪೂರ್ವ ಚಿತ್ರ ತೆರೆ ಕಂಡಿತ್ತಲ್ಲಾ? ಆ ಚಿತ್ರದ ನಾಯಕಿಯಾಗಿ ಸ್ಯಾಂಡಲ್ವುಡ್ಗೆ ಪರಿಚಯವಾಗಿದ್ದವಳು ಈ ಅಪೂರ್ವ. ಈ ಚಿತ್ರದ ಬಗ್ಗೆ ರವಿಚಂದ್ರನ್ ಭಾರೀ ನಿರೀಕ್ಷೆ ಇಟ್ಟುಕೊಂಡಿದ್ದರು. ತಾಂತ್ರಿಕವಾಗಿಯೂ ಹೊಸ ಪ್ರಯೋಗಗಳ ಮೂಲಕ ಈ ಚಿತ್ರವನ್ನು ರೂಪಿಸಿದ್ದರು. ಆದರೂ ಕೂಡಾ ಅದೇಕೋ ನಿರೀಕ್ಷೆ ಮಾಡಿದ್ದಂಥಾ ಗೆಲುವು ಸಿಕ್ಕಲೇ ಇಲ್ಲ!
ಒಂದು ವೇಳೆ ಅಪೂರ್ವ ಚಿತ್ರವೇನಾದರೂ ಗೆದ್ದಿದ್ದರೆ ನಾಯಕಿ ಅಪೂರ್ವಾಳ ಲಕ್ಕೂ ಬದಲಾಗುತ್ತಿತ್ತು. ಆದರೆ ಅವಕಾಶಗಳಿಲ್ಲದೆ ಸೊರಗಿದ್ದ ಮೈಸೂರು ಹುಡುಗಿ ಅಪೂರ್ವಾಗೆ ವಿಕ್ಟರಿ 2 ಚಿತ್ರದ ಮೂಲಕ ಎರಡನೇ ಅವಕಾಶ ಸಿಕ್ಕಿದೆ. ಮತ್ತೆ ರವಿಚಂದ್ರನ್ ಅವರ ಜೊತೆಗೇ ನಟಿಸೋ ಅವಕಾಶವೂ ಸಿಕ್ಕಿದೆ. ಅವರ ಮುಂದಿನ ಚಿತ್ರ ರಾಜೇಂದ್ರ ಪೊನ್ನಪ್ಪದಲ್ಲಿಯೂ ಈಕೆಯೇ ನಾಯಕಿ. ಅಂತೂ ವಿಕ್ಟರಿ 2 ಮೂಲಕ ಅಪೂರ್ವಾಗೂ ಒಂದು ಗೆಲುವು ಸಿಗೋ ನಿರೀಕ್ಷೆಗಳಿವೆ!
