ನಡುವೆ ಅಂತರವಿಲ್ಲದ ದೃಶ್ಯಗಳಲ್ಲಿ ಐಶಾನಿ ಶೆಟ್ಟಿ!

ಬೆಂಗಳೂರು: ಐಶಾನಿ ಶೆಟ್ಟಿ ಗೊತ್ತಲ್ಲ? ನೀನಾಸಂ ಸತೀಶ್ ಅವರ ರಾಕೆಟ್ ಮೂಲಕ ಮುಖ್ಯ ನಾಯಕ ನಟಿಯಾಗಿ ಕನ್ನಡ ಚಿತ್ರರಂಗದಲ್ಲಿ ನೆಲೆ ನಿಂತವರು. ಅದಾದ ನಂತರವೂ ಸಾಕಷ್ಟು ಸಿನಿಮಾಗಳಲ್ಲಿ ಹೀರೋಯಿನ್ ಆಗಿ ಕಾಣಿಸಿಕೊಳ್ಳುತ್ತಿರುವ ಐಶಾನಿ ಇತ್ತೀಚೆಗಷ್ಟೇ `ಕಾಜಿ’ ಎನ್ನುವ ಕಿರುಚಿತ್ರವನ್ನು ನಿರ್ದೇಶಿಸಿ ರಾಷ್ಟ್ರ ಮಟ್ಟದಲ್ಲಿ ಗಮನ ಸೆಳೆದಿದ್ದರು.

ಸದ್ಯ ಪ್ರಖ್ಯಾತ್ ಪರಮೇಶ್ ಎಂಬ ಹೊಸ ಹುಡುಗ ನಾಯಕನಾಗಿರುವ ‘ನಡುವೆ ಅಂತರವಿರಲಿ’ ಚಿತ್ರದಲ್ಲಿ ಐಶಾನಿ ಶೆಟ್ಟಿ ನಾಯಕನಟಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಹೆಸರಿಗೆ ನಡುವೆ ಅಂತರವಿರಲಿ ಎಂದಿದ್ದರೂ ಈ ಚಿತ್ರದ ಫೋಟೋಗಳು ಸಖತ್ ಹಾಟ್ ಆಗಿವೆ. ಅಂತರವಿರದ ದೃಶ್ಯಗಳಲ್ಲಿ ಐಶಾನಿ ಸಿಕ್ಕಾಪಟ್ಟೆ ಬೋಲ್ಡ್ ಆಗಿ ಪರದೆ ಹಂಚಿಕೊಂಡಿದ್ದಾರೆ. ಈ ಚಿತ್ರ ಈಗಿನ ಜನರೇಷನ್ ನೈಜ ಘಟನೆಯ ಕಥಾವಸ್ತು, ಪ್ರೀಮೆಚ್ಯೂರ್ಡ್ ಲವ್ ಸ್ಟೋರಿಯಾಗಿರುತ್ತೆ ಅನ್ನೋದು ನಿರ್ದೇಶಕರ ವಿವರಣೆ. ಹಾಗಾದರೆ ಹದಿಹರೆಯದ ಹುಡುಗ ಹುಡುಗಿಯ ಹುಡುಗಾಟಿಕೆ ಸ್ವಲ್ಪ ಜಾಸ್ತೀನೇ ಇರಬಹುದು!

ಬೃಂದಾ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ರವೀನ್-ಜಿ.ಕೆ. ನಾಗರಾಜು ನಿರ್ಮಾಣದ, ‘ನಡುವೆ ಅಂತರವಿರಲಿ’ ಚಿತ್ರೀಕರಣ ಸದ್ದುಗದ್ದಲವಿಲ್ಲದೆ ಪೂರೈಸಿ ಮುಂದಿನ ತಿಂಗಳು ಬಿಡುಗಡೆಗೆ ಸಿದ್ಧಗೊಳ್ಳುತ್ತಿದೆ. ಚಿತ್ರದ ಚಿತ್ರ ಕಥೆ-ನಿರ್ದೇಶನ ರವೀನ್, ಸಂಭಾಷಣೆ – ಮಂಜು ಮಾಂಡವ್ಯ, ಛಾಯಾಗ್ರಹಣ-ಯೋಗಿ, ಸಂಗೀತ-ಕದ್ರಿ ಮಣಿಕಾಂತ್, ಸಂಕಲನ-ಗಣೇಶ್ ಮಲ್ಲಯ್ಯ, ಸಾಹಸ-ರವಿವರ್ಮ, ನೃತ್ಯ – ಮುರಳಿ, ಸಾಹಿತ್ಯ-ಡಾ.ವಿ. ನಾಗೇಂದ್ರ ಪ್ರಸಾದ್, ಯೋಗರಾಜ್ ಭಟ್, ಗೌಸ್‍ಫೀರ್. ಸಹನಿರ್ದೇಶನ-ರಾಮಕೃಷ್ಣ, ನಿರ್ವಹಣೆ- ಮೈಸೂರ್ ಕೃಷ್ಣ, ತಾರಾಗಣದಲ್ಲಿ – ಪ್ರಖ್ಯಾತ್ ಪರಮೇಶ್, ಐಶಾನಿ ಶೆಟ್ಟಿ, ಚಿಕ್ಕಣ್ಣ, ರಕ್ಷಿತ್ ಕುಮಾರ್, ತುಳಸಿ ಶಿವಮಣಿ, ಅರುಣಾ ಬಾಲರಾಜ್, ಶ್ರೀನಿವಾಸಪ್ರಭು, ಮಂಜು ಮಾಂಡವ್ಯ ಮುಂತಾದವರಿದ್ದಾರೆ.