ಕ್ರೇಜಿಸ್ಟಾರ್ ಮನೆಗೆ ಹೊಸ ಅತಿಥಿ ಎಂಟ್ರಿ

ಬೆಂಗಳೂರು: ಇತ್ತೀಚೆಗಷ್ಟೆ ನಟಿ ರಚಿತಾ ರಾಮ್ ಬರೋಬ್ಬರಿ 1.6 ಕೋಟಿ ರೂ. ಬೆಲೆಯ ಮರ್ಸಿಡಿಸ್ ಬೆಂಜ್ ಜಿಎಲ್‍ಎಸ್ 350 ಡಿ ಗ್ರ್ಯಾಂಡ್ ಎಡಿಶನ್ ಕಾರನ್ನು ಖರೀದಿಸಿದ್ದರು. ಇದೀಗ ನಟ ರವಿಚಂದ್ರನ್ ಮನೆಗೆ ಹೊಸದೊಂದು ಕಾರು ಬಂದಿದೆ.

ಈಗಾಗಲೇ ರವಿಚಂದ್ರನ್ ಮನೆಯಲ್ಲಿ ಮೂರ್ನಾಲ್ಕು ಕಾರುಗಳಿವೆ. ಇದೀಗ ಅವರ ಮಗ ಮನುರಂಜನ್ ಹೊಸ ಕಾರನ್ನು ಖರೀದಿಸಿದ್ದಾರೆ. ಈ ಮೂಲಕ ತಮ್ಮ ಮನೆಗೆ ಬಂದಿರುವ ಹೊಸ ಅತಿಥಿಯನ್ನು ಸ್ವಾಗತಿಸಿದ್ದಾರೆ. ತಾವು ಖರೀದಿಸಿರುವ ಕಾರಿನ ಮುಂದೆ ಮನುರಂಜನ್ ಸ್ಟೈಲ್ ಆಗಿ ನಿಂತುಕೊಂಡು ಫೋಟೋ ತೆಗೆಸಿಕೊಂಡಿದ್ದಾರೆ. ಆ ಫೋಟೋವನ್ನು ಇನ್‍ಸ್ಟಾಗ್ರಾಂನಲ್ಲಿ ಶೇರ್ ಮಾಡಿಕೊಳ್ಳುವ ಮೂಲಕ ಹೊಸ ಕಾರು ಖರೀದಿಸಿರುವ ವಿಚಾರವನ್ನು ತಿಳಿಸಿದ್ದಾರೆ.

https://www.instagram.com/p/B5MtDCUg3dF/

MG (Morris Garages) ಹೆಕ್ಟರ್ ಕಾರನ್ನು ಮನುರಂಜನ್ ಖರೀದಿಸಿದ್ದು, ಬರ್ಗಂಡಿ ಬಣ್ಣದ ಕಾರ್ ಇದಾಗಿದೆ. ಹೊಸ ಮಾಡೆಲ್ ಕಾರನ್ನು ಇಷ್ಟಪಟ್ಟು ಮನುರಂಜನ್ ಖರೀದಿಸಿದ್ದಾರೆ. ಆದರೆ ಈ ಕಾರಿನ ಬೆಲೆ ಅಧಿಕೃತವಾಗಿ ತಿಳಿದು ಬಂದಿಲ್ಲ.

ಇತ್ತೀಚೆಗಷ್ಟೆ ಮನೋರಂಜನ್ ತಮ್ಮ ಹೆಸರನ್ನು ಮನುರಂಜನ್ ಎಂದು ಬದಲಾಯಿಸಿಕೊಂಡಿದ್ದಾರೆ. ಸದ್ಯಕ್ಕೆ ಮನುರಂಜನ್ ಅಭಿನಯದ ‘ಪ್ರಾರಂಭ’ ಸಿನಿಮಾದ ಚಿತ್ರೀಕರಣ ಮುಗಿದಿದೆ. ಇನ್ನೂ ಕೆಲ ದಿನಗಳ ಹಿಂದೆಯಷ್ಟೆ ಮನುರಂಜನ್ ಅಭಿನಯದ ‘ಮುಗಿಲ್ ಪೇಟೆ’ ಸಿನಿಮಾದ ಮುಹೂರ್ತ ನಡೆದಿದೆ.