ಬೆಂಗಳೂರು: ಒಂದು ನಾಯಿ ಮತ್ತು ಮನುಷ್ಯರ ನಡುವಿನ ಸಂಬಂಧವನ್ನು ಕಟ್ಟಿಕೊಡುವ ಸಿನಿಮಾ 777 ಚಾರ್ಲಿ. ಈ ಸಿನಿಮಾದ ಕಥೆ ರಕ್ಷಿತ್ ಶೆಟ್ಟಿ ಮತ್ತು ಒಂದು ನಾಯಿಯನ್ನು ಪ್ರಧಾನವಾಗಿರಿಸಿಕೊಂಡು ಕಟ್ಟಿಕೊಡಲಾಗಿದೆ. ಖಿನ್ನತೆಗೆ ಗುರಿಯಾಗಿ ಏಕಾಂಗಿಯಂತೆ ಓಡಾಡಿಕೊಂಡಿರುವ ಯುವಕನ ಬದುಕಿಗೆ ಒಂದು ಲ್ಯಾಬ್ರಡಾರ್ ನಾಯಿಯ ಪ್ರವೇಶವಾಗುತ್ತದೆ! ಆ ನಂತರ ಆತನ ಬದುಕು ಬೇರೆಯದ್ದೇ ದಿಕ್ಕಿಗೆ ಸಾಗುತ್ತದೆ. ಇದು ಚಾರ್ಲಿ ಕತೆಯ ಎಳೆ.
ಈ ಚಿತ್ರದಲ್ಲಿ ಅರವಿಂದ್ ಅಯ್ಯರ್ ಹೀರೋ ಆಗಿ ಕಾಣಿಸಿಕೊಳ್ಳಬೇಕಿತ್ತು. ಕಾರಣಾಂತರಗಳಿಂದ ಅರವಿಂದ್ ಆ ಪಾತ್ರದಿಂದ ಹೊರಗುಳಿದಿದ್ದಾರೆ ಮತ್ತು ಆ ಪಾತ್ರವನ್ನು ನಿರ್ಮಾಣ ಮಾಡಬೇಕಿದ್ದ ರಕ್ಷಿತ್ ಶೆಟ್ಟಿ ಅವರೇ ನಿಭಾಯಿಸುತ್ತಿದ್ದಾರೆ.
ಈ ಚಿತ್ರಕ್ಕಾಗಿ ಅರವಿಂದ್ ಮತ್ತು ನಾಯಿಮರಿಗೆ ಊಟಿಯಲ್ಲಿ ವಿಶೇಷ ತರಬೇತಿಯನ್ನೂ ನೀಡಲಾಗಿತ್ತು. ಈ ಚಿತ್ರದಲ್ಲಿ ನಟಿಸುತ್ತಿರುವ ಲ್ಯಾಬ್ರಡಾರ್ ನಾಯಿಮರಿ ಮನುಷ್ಯರನ್ನು ಹೋಲುವ ಹಾವಭಾವವನ್ನು ಪ್ರದರ್ಶಿಸಬೇಕಿದೆ. ಈವರೆಗೂ ಯಾವ ಸಿನಿಮಾದಲ್ಲೂ ನಾಯಿಯೊಂದು ಇಷ್ಟು ಸಹಜವಾಗಿ ನಟಿಸಿಲ್ಲವಂತೆ. ಆ ಮಟ್ಟಕ್ಕೆ ನಾಯಿಯನ್ನು ತರಬೇತಿಗೊಳಿಸಲಾಗುತ್ತಿದೆ. ಇದಕ್ಕೆಂದು ವಿದೇಶದಿಂದ ಟ್ರೈನರ್ ಒಬ್ಬರನ್ನು ಕರೆಸಿಕೊಳ್ಳಲಾಗಿದೆ.
ಹೀರೋ ಜೊತೆ ಅಪೂರ್ವ ಬಾಂಧವ್ಯವಿರಲೇಬೇಕಿದ್ದರಿಂದ ನಾಯಿ ಮರಿ ಸದ್ಯ ಇಪ್ಪತ್ನಾಲ್ಕು ಗಂಟೆಯೂ ರಕ್ಷಿತ್ ಅವರೊಟ್ಟಿಗೇ ವಾಸಿಸುವ ಯೋಗ ಪಡೆದಿದೆ!
