ಬೆಂಗ್ಳೂರಲ್ಲಿ ಅಮ್ಮನ ಎದುರೇ ನಟನಿಂದ ರೇಪ್!

ಬೆಂಗಳೂರು: ಕಿರುಚಿತ್ರ ನಿರ್ದೇಶಕ, ನಟ ಮದುವೆಯಾಗುತ್ತೇನೆ ಎಂದು ನಂಬಿಸಿ ತನ್ನ ತಾಯಿಯ ಎದುರೇ 21 ವರ್ಷದ ಯುವತಿಯನ್ನು ಅತ್ಯಾಚಾರ ಮಾಡಿರುವ ಘಟನೆಯೊಂದು ಸಿಲಿಕಾನ್ ಸಿಟಿಯಲ್ಲಿ ನಡೆದಿದೆ.

ಪಿ. ಪ್ರಮೋದ್ ಕುಮಾರ್ ಎಂಬಾತನೇ ಯುವತಿಯ ಮೇಲೆ ಅತ್ಯಾಚಾರವೆಸಗಿದ ನಟ, ನಿರ್ದೇಶಕ. ಈತ ಬೆಂಗಳೂರು ವಿವೇಕನಗರದ ಅಶ್ವಿನಿ ಲೇಔಟ್ ನಿವಾಸಿಯಾಗಿದ್ದಾನೆ. ಸಂತ್ರಸ್ತ ಯುವತಿ ಖಾಸಗಿ ಸಂಸ್ಥೆಯೊಂದರ ಉದ್ಯೋಗಿಯಾಗಿದ್ದಾಳೆ.

ಪ್ರಮೋದ್ ಯುವತಿಯನ್ನು ಹುಟ್ಟುಹಬ್ಬದ ಪಾರ್ಟಿಗಾಗಿ ಮನೆಗೆ ಕರೆದು ಆಕೆಯ ಮೇಲೆ ಕೃತ್ಯ ಎಸಗಿದ್ದಾನೆ. ಮಗ ಯುವತಿಯನ್ನು ರೇಪ್ ಮಾಡುವುದನ್ನು ಸ್ವತಃ ಆತನ ಅಮ್ಮ ನೋಡಿದರೂ ಸುಮ್ಮನಾಗಿದ್ದು, ಇದೀಗ ಆಕೆಯೂ ಎರಡನೇ ಪ್ರಮುಖ ಆರೋಪಿಯಾಗಿದ್ದಾರೆ. ಸದ್ಯ ನಟನನ್ನು ವಿವೇಕ ನಗರ ಪೊಲೀಸರು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ.

ಯುವತಿ ನಟನ ತಾಯಿಯ ವಿರುದ್ಧವೂ ದೂರು ದಾಖಲಿಸಿದ್ದಾರೆ. ನಟ ತನ್ನನ್ನು ದುರುಪಯೋಗ ಪಡಿಸಿಕೊಂಡ ಬಳಿಕ ಆತನ ತಾಯಿ, ನಿಂದಿಸಿ ನನ್ನ ಮಗನನ್ನು ಭೇಟಿ ಮಾಡಬೇಡ ಎಂದು ಬೆದರಿಕೆ ಹಾಕಿದ್ದಾರೆ ಎಂದು ಯುವತಿ ದೂರಿನಲ್ಲಿ ತಿಳಿಸಿದ್ದಾರೆ.

ಸಂತ್ರಸ್ತೆ ಹಾಗೂ ಆರೋಪಿ ಅಕ್ಕಪಕ್ಕದ ಮನೆಯವರಾಗಿದ್ದು ಕಳೆದ ಎರಡು ವರ್ಷಗಳಿಂದ ಒಬ್ಬರನ್ನೊಬ್ಬರು ಪ್ರೀತಿಸುತ್ತಿದ್ದರು. ಹೀಗೆ ಇತ್ತೀಚೆಗೆ ನನ್ನ ಹುಟ್ಟುಹಬ್ಬದ ಪಾರ್ಟಿಯಿದೆ ಎಂದು ಮನೆಗೆ ಕರೆದಿದ್ದಾನೆ. ಹೀಗಾಗಿ ಯುವತಿ ಆತನ ಮನೆಗೆ ತೆರಳಿದ್ದು, ಈ ವೇಳೆ ಆತ ಯುವತಿಯ ಮೇಲೆ ರೇಪ್ ಮಾಡಿದ್ದಾನೆ. ಅಲ್ಲದೆ ತಾನು ನಿನ್ನನ್ನು ಮದುವೆಯಾಗುತ್ತೇನೆ ಎಂದು ನಂಬಿಸಿ ಪ್ರತಿ ನಿತ್ಯ ಆಕೆಯನ್ನು ತನ್ನ ಮನೆಗೆ ಕರೆದುಕೊಂಡು ಹೋಗುವ ಮೂಲಕ ಭೌತಿಕವಾಗಿ ಆಕೆಯೊಂದಿಗೆ ನಿಕಟ ಸಂಬಂಧ ಹೊಂದಲು ಯತ್ನಿಸುತ್ತಿದ್ದನು ಎಂದು ಪೊಲೀಸ್ ಅಧಿಕಾರಿ ಹೇಳಿದ್ದಾರೆ.

ಕೋರಮಂಗಲ 7ನೇ ಬ್ಲಾಕ್ ನಲ್ಲಿರುವ ತನ್ನ ಕಚೇರಿ ಆವರಣದಲ್ಲಿಯೇ ಕುಮಾರ್ ನನ್ನ ಮೇಲೆ ಅತ್ಯಾಚಾರವೆಸಗಿದ್ದಾನೆ. ಅಲ್ಲದೆ ನಮ್ಮಿಬ್ಬರ ಸಂಬಂಧ ಆತನ ತಾಯಿಗೂ ತಿಳಿದಿದೆ ಎಂದು ಸಂತ್ರಸ್ತೆ ಆರೋಪಿಸಿದ್ದಾಳೆ. ಇಬ್ಬರು ಪ್ರತಿನಿತ್ಯ ಭೇಟಿಯಾಗುವುದನ್ನು ಗಮನಿಸಿದ ನಟನ ತಾಯಿ, ನನ್ನ ಮಗನ ಭೇಟಿ ಮಾಡಬೇಡ ಎಂದು ಎಚ್ಚರಿಕೆ ನೀಡಿದ್ದಾರೆ.

ಮದುವೆ ಪ್ಲಾನ್:
ಕುಮಾರ್ ಮದುವೆ ಮಾಡಿಕೊಳ್ಳಲು ಹುಡುಗಿ ಹುಡುಕುತ್ತಿದ್ದಾನೆ ಎಂದು ಸಂತ್ರಸ್ತೆ ನಂಬಿದ್ದು, ನನ್ನನ್ನೇ ಮದುವೆಯಾಗುತ್ತಾನೆ ಎಂದು ಆಕೆ ಆತ ಕರೆದಲ್ಲಿಗೆ ಹೋಗುತ್ತಿದ್ದಳು. ಆದರೆ ಆತನ ತಾಯಿ ಮಾತ್ರ ಯುವತಿಯನ್ನು ತನ್ನ ಸೊಸೆಯಾಗಿ ಒಪ್ಪಿಕೊಳ್ಳಲು ತಯಾರಿರಲಿಲ್ಲ. ಇದರಿಂದಾಗಿ ಕುಮಾರ್ ಕೂಡ ಸಂತ್ರಸ್ತೆಯೊಂದಿಗಿನ ಮದುವೆ ವಿಚಾರ ಕೈಬಿಟ್ಟಿದ್ದನು. ಅಲ್ಲದೆ ಇನ್ನೊಂದು ಬಾರಿ ನನ್ನ ಮಗನ ಜೊತೆ ನಿನ್ನ ಕಂಡರೆ ಕೊಲೆ ಮಾಡುವುದಾಗಿಯೂ ಕುಮಾರ್ ತಾಯಿ ಸಂತ್ರಸ್ತೆಗೆ ಬೆದರಿಕೆ ಹಾಕಿದ್ದರು. ಈ ಹಿನ್ನೆಲೆಯಲ್ಲಿ ಕುಮಾರ್ ಸಂತ್ರಸ್ತೆಯನ್ನು ದೂರ ಮಾಡಲು ಯತ್ನಿಸುತ್ತಿದ್ದನು. ಆಕೆಯ ಫೋನ್ ಕಾಲ್ ಗಳನ್ನು ರಿಸೀವ್ ಮಾಡಲು ಕೂಡ ನಿರಾಕರಿಸುತ್ತಿದ್ದನು. ಮೇ 10ರಂದು ಆಕೆಯನ್ನು ತನ್ನ ಕಚೇರಿಗೆ ಕರೆಸಿಕೊಂಡು ಅಲ್ಲಿ ಸಂತ್ರಸ್ತೆಯ ಮೇಲೆ ಅತ್ಯಾಚಾರ ಮಾಡಿದ್ದಾನೆ ಎಂದು ಪೊಲೀಸ್ ಅಧಿಕಾರಿ ವಿವರಿಸಿದ್ದಾರೆ.

ಒಟ್ಟಿನಲ್ಲಿ ಕುಮಾರ್ ತನ್ನನ್ನು ದೂರ ಮಾಡುತ್ತಿರುವುದನ್ನು ಗಮನಿಸಿದ ಸಂತ್ರಸ್ತೆ ಈತ ತನ್ನನ್ನು ಮದುವೆ ಮಾಡಿಕೊಳ್ಳಲ್ಲವೆಂದು ನೊಂದು ಇದೀಗ ಪೊಲೀಸ್ ಠಾಣೆ ಮಟ್ಟಿಲೇರಿದ್ದಾಳೆ. ಸದ್ಯ ವಿವೇಕನಗರ ಪೊಲೀಸರು ಆರೋಪಿ ನಟ ಪ್ರಮೋದ್ ಕುಮಾರ್ ವಿರುದ್ಧ ಐಪಿಸಿ ಸೆಕ್ಷನ್ 376(ರೇಪ್), 417(ಮೋಸ) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.