ಬೆಂಗಳೂರು: ಖ್ಯಾತ ಬಹುಭಾಷಾ ನಟಿ ಭಾವನಾರನ್ನು ಅಪಹರಿಸಿ ದುಷ್ಕರ್ಮಿಗಳು ಲೈಂಗಿಕ ದೌರ್ಜನ್ಯ ನಡೆಸಿದ್ದಾರೆ
ಕೇರಳದ ಎರ್ನಾಕುಲಂನಲ್ಲಿ ಶೂಟಿಂಗ್ ಮುಗಿಸಿ ರಾತ್ರಿ 1.30ರ ವೇಳೆ ಮನೆಗೆ ಮರಳುತ್ತಿದ್ದ ವೇಳೆ ಕಾರಿನಲ್ಲಿ ಬಂದ ಅಪರಿಚಿತರು ಭಾವನಾ ಅವರನ್ನ ಅಪಹರಿಸಿದ್ದಾರೆ. ಮಾಜಿ ಕಾರು ಡ್ರೈವರ್‍ನಿಂದಲೇ ಅಪಹರಣ ನಡೆದಿದೆ ಎಂದು ಹೇಳಲಾಗಿದೆ.
ನಡೆದಿದ್ದೇನು?: ಈ ಹಿಂದೆ ಭಾವನಾ ಕಾರಿನ ಚಾಲಕನಾಗಿದ್ದ ಮಾರ್ಟಿನ್ ಎಂಬಾತ ಐವರು ಸ್ನೇಹಿತರ ಜೊತೆ ಸೇರಿ ತನ್ನನ್ನು ಅಪಹರಿಸಿದ್ದಾಗಿ ಭಾವನಾ ಪೊಲೀಸರಿಗೆ ಕೊಟ್ಟ ದುರಿನಲ್ಲಿ ತಿಳಿಸಿದ್ದಾರೆ. ತ್ರಿಶೂರ್‍ನಿಂದ ಎರ್ನಾಕುಲಂಗೆ ಭಾವನಾ ಬರುತ್ತಿದ್ದ ವೇಳೆ ಅಂಗಮಾಲಿ ಎಂಬಲ್ಲಿ ಟೆಂಪೋ ಟ್ರಾವೆಲರ್‍ನಲ್ಲಿ ಬಂದ ಐವರು, ಭಾವನಾ ಕಾರಿಗೆ ಅಡ್ಡಹಾಕಿ ಕಾರು ನಿಲ್ಲಿಸಿದ್ದಾರೆ. ನಂತರ ಡ್ರೈವರ್‍ನನ್ನು ಹೊರಕ್ಕೆ ಎಳೆದು ಕಾರಿನಲ್ಲಿದ್ದ ಭಾವನಾರನ್ನು ನಗರದಲ್ಲಿ ಸುತ್ತಾಡಿಸಿದ್ದಾರೆ. 1 ಗಂಟೆಗಳ ಕಾಲ ಕಾರಿನಲ್ಲಿ ಲೈಂಗಿಕ ಕಿರುಕುಳ ನೀಡಿದ್ದಾಗಿ ಭಾವನಾ ಪೊಲೀಸರಿಗೆ ಹೇಳಿಕೆ ನೀಡಿದ್ದಾರೆ. ಕಾಕ್ಕನಾಡ್‍ನಲ್ಲಿ ಭಾವನಾರನ್ನು ಬಿಟ್ಟು ದುಷ್ಕರ್ಮಿಗಳು ಪರಾರಿಯಾಗಿದ್ದಾರೆ. ನಿರ್ದೇಶಕ ಲಾಲ್‍ಗೆ ಫೋನ್ ಮಾಡಿ ಅವರ ನೆರವಿನಿಂದ ಈಗ ಭಾವನಾ ದೂರು ದಾಖಲಿಸಿದ್ದಾರೆ.
ಪ್ರಕರಣಕ್ಕೆ ಸಂಬಂಧಿಸಿದಂತೆ ಓರ್ವನನ್ನು ವಶಕ್ಕೆ ಪಡೆದಿರುವ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ.
ಭಾವನಾ ಕನ್ನಡದ ಜಾಕಿ ಚಿತ್ರದಲ್ಲಿ ಪುನೀತ್ ರಾಜ್‍ಕುಮಾರ್ ಅವರೊಂದಿಗೆ ಅಭಿನಯಿಸಿದ್ದಾರೆ. ಅಲ್ಲದೆ ಯಾರೆ ಕೂಗಾಡಲಿ, ಬಚ್ಚನ್, ಮೈತ್ರಿ ಹೀಗೆ ಹಲವಾರು ಕನ್ನಡ ಸಿನಿಮಾದಲ್ಲಿ ಭಾವನಾ ನಟಿಸಿದ್ದಾರೆ.