ರೀಲ್ಸ್‌ನಲ್ಲಿ ಮೋಡಿ ಮಾಡಿ 4 ಮದುವೆಯಾದ ಲೇಡಿ; ಪತ್ನಿ ಕಾಣೆಯಾಗಿದ್ದಾಳೆ ಎಂದುಕೊಂಡಿದ್ದ 3ನೇ ಪತಿಗೆ ಶಾಕ್‌!

ದಾವಣಗೆರೆ: ಪತ್ನಿ ಕಾಣೆಯಾಗಿದ್ದಾಳೆ ಎಂದು ಪೊಲೀಸ್‌ ಠಾಣೆಗೆ ದೂರು ಕೊಟ್ಟಿದ್ದ ವ್ಯಕ್ತಿಗೆ ಆಕೆಯ ಸಂಬಂಧಿಕರಿಂದಲೇ ಶಾಕಿಂಗ್‌ ನ್ಯೂಸ್‌ ಸಿಕ್ಕಿದೆ. ರೀಲ್ಸ್‌ನಲ್ಲಿ ಮೋಡಿ ಮಾಡಿ ನಾಲ್ಕು ಮದುವೆಯಾಗಿದ್ದ ಲೇಡಿ ಬಗ್ಗೆ ಕೇಳಿ ವ್ಯಕ್ತಿ ಶಾಕ್‌ ಆಗಿದ್ದಾನೆ.

ಇಸ್ಟಾಗ್ರಾಮ್‌ನಲ್ಲಿ ರೀಲ್ಸ್ ಮಾಡಿ ಮೋಡಿ ಮಾಡುತ್ತಿದ್ದ ಹೆಂಡತಿ ಮಿಸ್ಸಿಂಗ್ ಆಗಿದ್ದಾಳೆ ಎಂದು ದಾವಣಗೆರೆ ಕೆಟಿಜೆ ನಗರ ಠಾಣೆಗೆ ವ್ಯಕ್ತಿಯೊಬ್ಬ ದೂರು ನೀಡಿದ್ದ. ಆಕೆ ಎಷ್ಟು ಚಾಲಾಕಿ ಲೇಡಿ ಎಂದು ಆಕೆಯ ಸಂಬಂಧಿಕರಿಂದಲೇ ತಿಳಿದು ಶಾಕ್ ಆಗಿದ್ದಾನೆ. ಈಗ ಆಕೆಯ ವಿರುದ್ದ ಮತ್ತೆ 420 ಕೇಸ್ ನೀಡಲು ಮುಂದಾಗಿದ್ದಾನೆ. ಇದನ್ನೂ ಓದಿ: ಚುನಾವಣೆಯಲ್ಲಿ ಸೋತಿದ್ದಕ್ಕೆ ಕರ್ನಾಟಕ ವಿವಿ ನೌಕರ ಆತ್ಮಹತ್ಯೆ

ಮಂಡ್ಯ ಜಿಲ್ಲೆ ಪಾಂಡವಪುರ ತಾಲ್ಲೂಕಿನ ನರಹಳ್ಳಿ ಗ್ರಾಮದ‌ ಯುವತಿಯೊಬ್ಬಳನ್ನು 2022 ರಲ್ಲಿ ದಾವಣಗೆರೆ ವಾಸಿಯಾದ ಪ್ರಶಾಂತ್ ಮದುವೆಯಾಗಿದ್ದ. ಈ ಇಬ್ಬರು ಇನ್ಟಾಗ್ರಾಮ್‌ನಲ್ಲಿ ಪರಿಚಯವಾಗಿದ್ದರು. ಪರಿಚಯ ಲವ್ ಆಗಿ ಮಾರ್ಪಟ್ಟು‌, ಹಿರಿಯರ ಸಮ್ಮುಖದಲ್ಲೇ ಮದುವೆಯಾಗಿ 3 ತಿಂಗಳು ಸಂಸಾರ ಮಾಡಿದ್ದರು.‌ 3 ತಿಂಗಳ ಹಿಂದೆ ತವರು ಮನೆಗೆ ಹೋಗಿ ನಂತರ ಗರ್ಭಿಣಿ ಅಂತಾ ಹೇಳಿದವಳು ವಾಪಸ್‌ ಬಂದಿಲ್ಲ ಎಂದು ದೂರು ನೀಡಿದ್ದಾನೆ.

ಮಿಸ್ಸಿಂಗ್ ಕೇಸ್ ಕೊಟ್ಟ ನಂತರ ಪತ್ನಿ ಚರಿತ್ರೆ ತಿಳಿದಿದ್ದು‌, ನಿರ್ಮಲಾ ಆಲಿಯಾಸ್ ಸ್ನೇಹಾ, ಹೀಗೆಯೆ ನಾಲ್ವರನ್ನು ಮದುವೆಯಾಗಿ ವಂಚಿಸಿದ ವಿಷಯ ತಿಳಿದು ಬಂದಿದೆ. ಮೈಸೂರು ಹತ್ತಿರದ ಬೆಳಗೊಳ ಬಳಿ ಒಬ್ಬರ ಜೊತೆ ಮದುವೆಯಾಗಿದ್ದಳು. ನಂತರ ದಾವಣಗೆರೆ ಪ್ರಶಾಂತ್ ಹಾಗೂ ಬೆಂಗಳೂರು ರಘು ಎಂಬವರನ್ನು ಮದುವೆಯಾಗಿ ವಂಚಿಸಿದ್ದಾಳೆ. ಈಗ ಮತ್ತೆ ಮಂಡ್ಯದ ಇನ್ನೊಬ್ಬ ಯುವಕನ ಜೊತೆ ಲವ್ವಿಡವ್ವಿಯಲ್ಲಿದ್ದಾಳೆ ಎಂದು ಅರೋಪ ಮಾಡುತ್ತಾ ಅವರ ಜೊತೆ ಮದುವೆಯಾದ ಪೋಟೋ ಹಾಗೂ ರೀಲ್ಸ್‌ನ್ನು ಗಂಡ ಪ್ರಶಾಂತ್ ತೋರಿಸಿ ಆಕೆಯ ಮೇಲೆ ಆಕ್ರೋಶ ವ್ಯಕ್ತಪಡಿಸಿದ್ದಾನೆ. ಇದನ್ನೂ ಓದಿ: ಸೋಮಾರಿ ಸಿದ್ದ ಪದ ಬಳಸಿದ್ದು ಸಿದ್ದರಾಮಯ್ಯರಿಗೆ ಅಲ್ಲ: ಪ್ರತಾಪ್ ಸಿಂಹ ಸ್ಪಷ್ಟನೆ

ಮದುವೆಯಾಗಿ ವಂಚಿಸುವುದನ್ನು ಕಾಯಕ‌ ಮಾಡಿಕೊಂಡಿರುವ ಮಹಿಳೆ ಇಸ್ಟಾಗ್ರಾಮ್ ರೀಲ್ಸ್‌ನಲ್ಲಿ ಎಕ್ಸ್‌ಪರ್ಟ್‌ ಆಗಿ ಹುಡುಗರನ್ನು ಯಾಮಾರಿಸುವ ಕೆಲಸ ಮಾಡುತ್ತಿದ್ದಾಳೆ. ಈಕೆ ವಿರುದ್ಧ ಕ್ರಮ ಕೈಗೊಳ್ಳಿ ಎಂದು 3ನೇ ಪತಿ ಪ್ರಶಾಂತ್ ದೂರು ನೀಡಲು ಮುಂದಾಗಿದ್ದಾನೆ.