ಮಂಡ್ಯ: ಏಕಕಾಲಕ್ಕೆ 3 ಮರಿಗಳಿಗೆ ಜನ್ಮ ನೀಡಿದ ಕುರಿ- ರೈತರಿಗೆ ಅಚ್ಚರಿ

ಮಂಡ್ಯ: ಕುರಿಗಳು ಒಮ್ಮೆಗೆ ಒಂದು ಮರಿ ಹಾಕೋದು ಸಾಮಾನ್ಯ. ಕೆಲವೊಮ್ಮೆ ಎರಡು ಮರಿಗೆ ಜನ್ಮ ನೀಡುತ್ತವೆ. ಆದರೆ ಮಂಡ್ಯದಲ್ಲಿ ಕುರಿಯೊಂದು ಏಕಕಾಲಕ್ಕೆ ಮೂರು ಮರಿಗಳಿಗೆ ಜನ್ಮ ನೀಡಿದ್ದು, ರೈತರ ಅಚ್ಚರಿಗೆ ಕಾರಣವಾಗಿದೆ.

ಮಂಡ್ಯ ಜಿಲ್ಲೆಯ ಪಾಂಡವಪುರ ತಾಲೂಕಿನ ಹೊಸಕನ್ನಂಬಾಡಿ ಗ್ರಾಮದ ರೈತ ಸ್ವಾಮೀಗೌಡ ಸುಮಾರು 30 ವರ್ಷಗಳಿಂದ ಕುರಿ ಸಾಕುತ್ತಿದ್ದಾರೆ. ಇವರ ಬಳಿ 60 ಕ್ಕೂ ಹೆಚ್ಚು ಕುರಿಗಳಿವೆ. ಕಳೆದ ಮೂವತ್ತು ವರ್ಷಗಳಲ್ಲಿ ಇವರ ಬಳಿಯಿದ್ದ ಕುರಿಗಳು ಒಮ್ಮೆಗೆ ಹೆಚ್ಚು ಅಂದರೆ ಎರಡು ಮರಿಗೆ ಜನ್ಮ ನೀಡಿವೆ.

ಎರಡು ದಿನಗಳ ಹಿಂದೆ ಕುರಿಯೊಂದು ಒಮ್ಮೆಗೆ ಬರೋಬ್ಬರಿ ಮೂರು ಹೆಣ್ಣು ಮರಿಗಳಿಗೆ ಜನ್ಮ ನೀಡಿದೆ. ಮೂರು ಮರಿಗಳೂ ಆರೋಗ್ಯವಾಗಿವೆ. ಕುರಿ ಮೂರು ಮರಿಗಳಿಗೆ ಜನ್ಮ ನೀಡಿರೋದು ರೈತರಿಗೆ ಅಚ್ಚರಿ ಜೊತೆಗೆ ಖುಷಿಗೆ ಕಾರಣವಾಗಿದೆ. ಗ್ರಾಮದ ರೈತರು ಸ್ವಾಮಿಗೌಡ ಅವರ ಮನೆಗೆ ಬಂದು ಕುರಿ ಹಾಗೂ ಮರಿಗಳನ್ನು ಕುತೂಹಲದಿಂದ ನೋಡಿಕೊಂಡು ಹೋಗುತ್ತಿರುವುದು ಸಾಮಾನ್ಯವಾಗಿದೆ.