– ಗೋವಾದಲ್ಲಿ ರಜಾದಿನ ಕಳೆದು ತಂಡ ಸೇರಿದ್ದ ರಾಣಾ
ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಆರಂಭಕ್ಕೆ ಎಂಟು ದಿನ ಮುನ್ನ ಕೋಲ್ಕತ್ತಾ ತಂಡದ ಆಟಗಾರ ನಿತೀಶ್ ರಾಣಾ ಕೊರೊನಾ ಸೋಂಕಿತರಾಗಿದ್ದಾರೆ. ಎರಡು ದಿನದ ಹಿಂದೆಯೇ ಕೋವಿಡ್ ದೃಢವಾಗಿದ್ದು, ಆದ್ರೆ ಇದುವರೆಗೂ ಬಿಸಿಸಿಐ ಮತ್ತು ಕೆಕೆಆರ್ ಈ ಮಾಹಿತಿಯನ್ನ ಅಧಿಕೃತವಾಗಿಸಿಲ್ಲ.
ಸದ್ಯ ಮುಂಬೈನ ಹೋಟೆಲ್ ನಲ್ಲಿ ನಿತೀಶ್ ರಾಣಾ ಕ್ವಾರಂಟೈನ್ ನಲ್ಲಿದ್ದಾರೆ ಎಂದು ವರದಿಯಾಗಿದೆ. ವೈದ್ಯರ ತಂಡವೊಂದು ನಿತೀಶ್ ಆರೋಗ್ಯದ ಕಾಳಜಿ ತೆಗೆದುಕೊಂಡಿದೆ. 14ನೇ ಆವೃತ್ತಿಯ ಐಪಿಎಲ್ ಏಪ್ರಿಲ್ 9ರಿಂದ ಆರಂಭವಾಗಲಿದ್ದು, ಮೇ 30ರಂದು ಫೈನಲ್ ಮ್ಯಾಚ್ ನಡೆಯಲಿದೆ. ಮೊದಲ ಪಂದ್ಯವನ್ನ ಮುಂಬೈ ಇಂಡಿಯನ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳು ಆಡಲಿವೆ. ಏಪ್ರಿಲ್ 11ರಂದು ಕೆಕೆಆರ್ ಮೊದಲ ಪಂದ್ಯವನ್ನ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧ ಆಡಲಿದೆ.
254 ರನ್: ಕಳೆದ ಸೀಸನ್ ನಲ್ಲಿ ಕೆಕೆಆರ ಪರ ಆಡಿದ್ದ ನಿತೀಶ್ ರಾಣಾ, 14 ಪಂದ್ಯಗಳಲ್ಲಿ 254 ರನ್ ಕಲೆ ಹಾಕಿದ್ದರು. ಐಪಿಎಲ್ ನಲ್ಲಿ ಇದುವರೆಗೂ 60 ಪಂದ್ಯಗಳನ್ನಾಡಿರುವ ರಾಣಾ, 1,437 ರನ್ ಪೇರಿಸಿದ್ದಾರೆ. ಸರಾಸರಿ 28.17 ಮತ್ತು ಸ್ಟ್ರೈಕ್ ರೇಟ್ 135.56 ಇದೆ.
ವಿಜಯ್ ಹಜಾರೆ ಟ್ರೋಫಿಯಲ್ಲಿ ಟಾಪ್ 5 ಸ್ಕೋರರ್: ನಿತೀಶ್ ರಾಣಾ ವಿಜಯ್ ಹಜಾರೆ ಟ್ರೋಫಿಯಲ್ಲಿ 5ನೇ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರಾಗಿದ್ದಾರೆ. ದೆಹಲಿಯ ಪರವಾಗಿ ಆಡಿದ್ದ ರಾಣಾ, ಏಳು ಪಂದ್ಯಗಳಲ್ಲಿ 66.33ರ ಸರಾಸರಿಯಲ್ಲಿ 398 ರನ್ ಕಲೆ ಹಾಕಿದ್ದಾರೆ. ಒಂದು ಶತಕ, ಎರಡು ಅರ್ಧ ಶತಕ ದಾಖಲಿಸಿದ್ದಾರೆ. ಸ್ಟ್ರೈಕ್ ರೇಟ್ 97.78 ಇದೆ.
