ಚೆನ್ನೈ: ಬುದ್ಧಿವಂತ ಪ್ರಾಣಿ ಎಂದು ಹೆಸರು ಪಡೆದಿರುವ ನಾಯಿಯೊಂದು ಚೆನ್ನೈ ರೈಲ್ವೇ ನಿಲ್ದಾಣದಲ್ಲಿ ಪ್ರಯಾಣಿಕರ ಪಾಲಕನಂತೆ ಕೆಲಸ ಮಾಡುತ್ತಿದೆ. ಪ್ರಯಾಣಿಕರು ರೈಲಿನ ಹಳಿಗಳನ್ನು ದಾಟದಂತೆ, ರೈಲಿನ ಫುಟ್ ಬೋರ್ಡಿನಲ್ಲಿ ನಿಂತು ಪ್ರಯಾಣಿಸದಂತೆ ಎಚ್ಚರಿಕೆ ವಹಿಸುತ್ತಿದೆ.
ಈ ಶ್ವಾನಕ್ಕೆ ಅಲ್ಲಿನ ರೈಲ್ವೇ ಸಿಬ್ಬಂದಿ ಚಿನ್ನಪೋನು ಎಂದು ಹೆಸರಿಟ್ಟಿದ್ದಾರೆ. ಈ ನಾಯಿಯನ್ನು ಎರಡು ವರ್ಷದ ಹಿಂದೆ ಯಾರೋ ತಂದು ಚೆನ್ನೈನ ಪಾರ್ಕ್ ಟೌನ್ ರೈಲ್ವೇ ನಿಲ್ದಾಣದಲ್ಲಿ ಬಿಟ್ಟು ಹೋಗಿದ್ದಾರೆ. ಅಂದಿನಿಂದ ಇಲ್ಲಿಯವರೆಗೂ ಈ ನಾಯಿ ರೈಲ್ವೇ ನಿಲ್ದಾಣದಲ್ಲೇ ವಾಸವಾಗಿದೆ.
Chinnaponnu, a dog, who was abandoned at station two years ago is seriously offering her services in assisting RPF in warning passengers illegally crossing the track and travelling on footboard at Chennai Railway station. pic.twitter.com/ub2gMXNB2t
— Ministry of Railways (@RailMinIndia) November 17, 2019
ಪಾರ್ಕ್ ಟೌನ್ ರೈಲ್ವೇ ನಿಲ್ದಾಣದಲ್ಲಿ ದಿನ ಪ್ರಯಾಣ ಮಾಡುವವರಿಗೆ ಚಿನ್ನಪೋನು ಬಹಳ ಅಚ್ಚುಮೆಚ್ಚಾಗಿದ್ದು, ನಾಯಿ ಸೂಕ್ಷ್ಮತೆ ಮತ್ತು ಆದರ ಕಾರ್ಯವೈಖರಿ ಕಂಡು ಜನರು ಬೆರಗಾಗಿದ್ದಾರೆ. ಯಾರಾದರು ಈ ನಾಯಿಯ ಮುಂದೆ ರೈಲ್ವೇ ಹಳಿಯನ್ನು ದಾಟಿದರೆ ಅವರನ್ನು ಕಂಡು ಬೊಗಳುವ ನಾಯಿ ಅವರನ್ನು ಹಳಿ ದಾಟಲು ಬಿಡುವುದಿಲ್ಲ. ಹಾಗೆಯೇ ಯಾರದರೂ ಪ್ರಯಾಣಿಕರು ರೈಲಿನ ಫುಟ್ ಬೋರ್ಡ್ ಮೇಲೆ ನಿಂತುಕೊಂಡು ಪ್ರಯಾಣಿಸಿದರೆ ಅವರನ್ನು ನೊಡಿ ಬೊಗಳಿ ಅವರನ್ನು ಒಳಗೆ ಹೋಗುವಂತೆ ಸೂಚಿಸುತ್ತದೆ.
ಈ ವಿಚಾರದ ಬಗ್ಗೆ ಮಾತನಾಡಿರುವ ಸ್ಥಳೀಯರೊಬ್ಬರು, ಚಿನ್ನಪೋನು ಸುಮಾರು ಎರಡು ವರ್ಷದ ಹಿಂದಿನಿಂದಲೂ ಇಲ್ಲೇ ಇದೆ. ಇದನ್ನು ಯಾರೋ ತಂದು ಇಲ್ಲಿ ಬಿಟ್ಟು ಹೋಗಿದ್ದರು. ಅಂದಿನಿಂದ ಈ ನಾಯಿ ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್ (ಆರ್.ಪಿ.ಎಫ್) ಸಿಬ್ಬಂದಿಯೊಂದಿಗೆ ಇತ್ತು. ಹಾಗಾಗಿ ಅವರು ಮಾಡುವ ರೀತಿಯಲ್ಲೇ ಇದು ಕೂಡ ಕೆಲಸ ಮಾಡುತ್ತದೆ. ಪ್ರಯಾಣಿಕರನ್ನು ರೈಲ್ವೇ ಹಳಿ ದಾಟಲು ಬಿಡುವುದಿಲ್ಲ. ರೈಲು ಚಲಿಸುವಾಗ ಹತ್ತಿರಕ್ಕೆ ಹೋಗಲು ಬಿಡುವುದಿಲ್ಲ ಎಂದು ಹೇಳಿದ್ದಾರೆ.
ಈ ನಾಯಿ ಆರ್.ಪಿ.ಎಫ್ ಸಿಬ್ಬಂದಿಯ ರೀತಿಯಲ್ಲೇ ದಿನಲು ರೈಲ್ವೇ ನಿಲ್ದಾಣದಲ್ಲಿ ಕೆಲಸ ಮಾಡುತ್ತಿರುವುದನ್ನು ಸ್ಥಳಿಯರು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಡಿಯೋವನ್ನು ಭಾರತದ ರೈಲ್ವೇ ಇಲಾಖೆ ತನ್ನ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಶೇರ್ ಮಾಡಿದ್ದು, ಎರಡು ವರ್ಷದಿಂದ ರೈಲ್ವೇ ನಿಲ್ದಾಣದಲ್ಲಿ ಸೇವೆ ಸಲ್ಲಿಸುತ್ತಿರುವ ನಾಯಿಗೆ ಧನ್ಯವಾದಗಳು ಎಂದು ಬರೆದುಕೊಂಡಿದೆ.
