ಕಿಂಗ್ಸ್ಟನ್: ಬುಮ್ರಾ ಬೌಲಿಂಗ್ ಶೈಲಿಯ ಬಗ್ಗೆ ಸಂದೇಹ ವ್ಯಕ್ತಪಡಿಸಿದ ಇಯಾನ್ ಬಿಷಪ್ ಅವರಿಗೆ ಸುನಿಲ್ ಗವಾಸ್ಕರ್ ತಿರುಗೇಟು ನೀಡಿ ಬಾಯಿ ಬಂದ್ ಮಾಡಿದ ಪ್ರಸಂಗ ಕಾಮೆಂಟ್ರಿ ಬಾಕ್ಸ್ ನಲ್ಲಿ ನಡೆದಿದೆ.
ಎರಡನೇ ಟೆಸ್ಟ್ ಪಂದ್ಯದಲ್ಲಿ ಸುನಿಲ್ ಗವಾಸ್ಕರ್ ಮತ್ತು ವಿಂಡೀಸಿದ ಮಾಜಿ ಆಟಗಾರ ಇಯಾನ್ ಬಿಷಪ್ ವೀಕ್ಷಕ ವಿವರಣೆಗಾರರಾಗಿ ಕೆಲಸ ಮಾಡುತ್ತಿದ್ದರು. ಹ್ಯಾಟ್ರಿಕ್ ಸಾಧನೆಗೈದ ಬುಮ್ರಾ ಅವರ ಬೌಲಿಂಗ್ ಪ್ರದರ್ಶನದ ಬಗ್ಗೆ ಮಾತನಾಡುತ್ತಿದ್ದ ಬಿಷಪ್, ಬುಮ್ರಾ ಅವರ ಬೌಲಿಂಗ್ ಶೈಲಿಯ ಬಗ್ಗೆ ಕೆಲವರು ಸಂದೇಹ ವ್ಯಕ್ತಪಡಿಸಿ ಪ್ರಶ್ನೆ ಎತ್ತಿದ್ದರು ಎಂದು ಹೇಳಿದರು.
ಈ ಮಾತು ಬರುತ್ತಿದ್ದಂತೆ ಕೂಡಲೇ ಮಧ್ಯಪ್ರವೇಶ ಮಾಡಿದ ಗವಾಸ್ಕರ್, “ಪ್ರಶ್ನೆ ಮಾಡಿದ ವ್ಯಕ್ತಿಗಳು ಯಾರು? ಅವರ ಹೆಸರು ಹೇಳಬಹುದೇ?” ಎಂದು ಖಾರವಾದ ಪ್ರಶ್ನೆ ಹಾಕಿದರು. ಆದರೆ ಬಿಷಪ್ ಪ್ರಶ್ನೆ ಎತ್ತಿದವರ ಹೆಸರನ್ನು ಹೇಳದೇ ಈ ವಿಚಾರದಿಂದ ಜಾರಿಕೊಂಡರು.
ಬುಮ್ರಾ ಬೌಲಿಂಗ್ ಶೈಲಿ ವಿಭಿನ್ನವಾಗಿದೆ. ಕ್ರಿಕೆಟ್ ನಿಯಮದ ಪ್ರಕಾರ ಇದು ಸರಿಯೂ ಹೌದು. ಆದರೆ ಕೆಲವರು ಬೌಲಿಂಗ್ ಶೈಲಿಯ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದರು ಎಂದು ಬಿಷಪ್ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡರು.
ಕೂಡಲೇ ಗವಾಸ್ಕರ್ ಅವರು, ಈ ರೀತಿ ಸಂದೇಹ ವ್ಯಕ್ತಪಡಿಸಿದ ವ್ಯಕ್ತಿಗಳ ಹೆಸರನ್ನು ಹೇಳಿ ಎನ್ನುವ ಪ್ರಶ್ನೆಗೆ ಬಿಷಪ್ ಉತ್ತರ ನೀಡಲಿಲ್ಲ. ನಂತರ ಕಮೆಂಟ್ರಿ ಮುಂದುವರಿಸಿದ ಗವಾಸ್ಕರ್, ಬಹಳ ಹತ್ತಿರದಿಂದ ಬುಮ್ರಾ ಬೌಲಿಂಗ್ ಶೈಲಿಯನ್ನು ನೀವು ಗಮನಿಸಿ. ಓಡಿಕೊಂಡು ಬಂದು ಸ್ಟಂಪ್ ಹತ್ತಿರ ಬಂದು ಅಂತಿಮವಾಗಿ ಚೆಂಡನ್ನು ನೇರವಾಗಿ ತೋಳಿನಿಂದ ಬಿಡುತ್ತಾರೆ. ತೋಳು ಬಾಗಿರುವುದು ಎಲ್ಲಿ ಎನ್ನುವುದು ನೀವು ಈಗ ನನಗೆ ವಿವರಿಸಿ. ಬುಮ್ರಾ ಸರಿಯಾಗಿಯೇ ಬಾಲ್ ಹಾಕುತ್ತಿದ್ದಾರೆ. ಸರಿಯಾಗಿದ್ದರೂ ಈ ರೀತಿ ಪ್ರಶ್ನೆ ಮಾಡುವ ಜನರಿಗೆ ಬೇರೆ ಕೆಲಸ ಇಲ್ಲ ಎಂದು ಅಲ್ಲೇ ಖಡಕ್ ತಿರುಗೇಟು ನೀಡಿದರು.
ವಿಂಡೀಸ್ ವಿರುದ್ಧ ಬುಮ್ರಾ ಹ್ಯಾಟ್ರಿಕ್ ಸಾಧನೆ ಮಾಡಿದ್ದು ಅಲ್ಲದೇ 6 ವಿಕೆಟ್ ಕಿತ್ತಿದ್ದಾರೆ. ಒಟ್ಟು 9.1 ಓವರ್ ಬೌಲ್ ಮಾಡಿದ ಬುಮ್ರಾ 3 ಓವರ್ ಮೇಡನ್ ಮಾಡಿ 16 ರನ್ ನೀಡಿ 6 ವಿಕೆಟ್ ಕಿತ್ತಿದ್ದಾರೆ. ಬುಮ್ರಾ ತಮ್ಮ ನಾಲ್ಕನೇ ಓವರ್ ನಲ್ಲಿ ಡೈರೆನ್ ಬ್ರಾವೋ, ಶಮಾರಾ ಬ್ರೂಕ್ಸ್ ಮತ್ತು ರೋಸ್ಟನ್ ಚೆಸ್ ಅವರ ವಿಕೆಟ್ ಪಡೆದರು. ಈ ಮೊದಲು ಆಸ್ಟ್ರೇಲಿಯಾ ವಿರುದ್ಧ ಹರ್ಭಜನ್ ಸಿಂಗ್ ಮತ್ತು ಪಾಕಿಸ್ತಾನದ ವಿರುದ್ಧ ಇರ್ಫಾನ್ ಪಠಾಣ್ ಹ್ಯಾಟ್ರಿಕ್ ವಿಕೆಟ್ ಪಡೆದುಕೊಂಡಿದ್ದರು. ಭಾರತ 416 ರನ್ ಗಳಿಗೆ ಆಲೌಟ್ ಆಗಿದ್ದರೆ ವಿಂಡೀಸ್ 33 ಓವರ್ ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 87 ರನ್ ಗಳಿಸಿದೆ.
I owe my hat-trick to you – Bumrah tells @imVkohli @Jaspritbumrah93 became the third Indian to take a Test hat-trick. Hear it from the two men who made it possible ????️????️
Full video here ▶️????https://t.co/kZG6YOOepS – by @28anand #WIvIND pic.twitter.com/2PqCj57k8n
— BCCI (@BCCI) September 1, 2019
