ಮಾಸ್ಕೋ: ಇಷ್ಟು ದಿನ ಮೊಬೈಲ್, ಅಂಗಡಿ, ಮನೆ ಕಳ್ಳತನ ನಡೆದಿರೋದನ್ನು ಕೇಳಿರುತ್ತವೆ. ರಷ್ಯಾದಲ್ಲಿ ರಾತ್ರೋ ರಾತ್ರಿ ಬರೋಬ್ಬರಿ 23 ಮೀಟರ್ ಉದ್ದದ ಮತ್ತು 56 ಟನ್ ತೂಕದ ರೈಲ್ವೇ ಬ್ರಿಡ್ಜ್ ಕಾಣೆಯಾಗಿದೆ. ಸಾಮಾಜಿಕ ಜಾಲತಾಣದಲ್ಲಿ ರೈಲ್ವೇ ಬ್ರಿಡ್ಜ್ ಫೋಟೋಗಳು ವೈರಲ್ ಆಗಿದ್ದು, ನೆಟ್ಟಿಗರು ಆಶ್ವರ್ಯ ವ್ಯಕ್ತಪಡಿಸುತ್ತಿದ್ದಾರೆ.
ರಷ್ಯಾದ ಮುರಮ್ನೆಸಕ್ ಎಂಬಲ್ಲಿ ಈ ಕಳ್ಳತನ ನಡೆದಿದೆ. ಮುರಮ್ನೆಸಕ್ ಪಟ್ಟಣದ ಸಮೀಪ ಉಮಬಾ ನದಿಗೆ ಅಡ್ಡಲಾಗಿ ಲೋಹದ ಬ್ರಿಡ್ಜ್ ಕಟ್ಟಲಾಗಿತ್ತು. ಈ ಪ್ರದೇಶ ರಷ್ಯಾ ಮತ್ತು ಫಿನ್ ಲ್ಯಾಂಡ್ ನಡುವಿನ ಗಡಿಭಾಗವಾಗಿದೆ. ಮೇ 16ರಂದು ಬ್ರಿಡ್ಜ್ ಮಧ್ಯಭಾಗ ಕಳ್ಳತನವಾಗಿದ್ದು, ಅಧಿಕಾರಿಗಳು ಸ್ಥಳೀಯ ಕಿರೋವಸ್ಕ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ನದಿಯ ಮಧ್ಯಭಾಗದಲ್ಲಿ ಸೇತುವೆಯನ್ನು ಸಂಪೂರ್ಣ ಲೋಹದಿಂದ ನಿರ್ಮಿಸಲಾಗಿತ್ತು.
ಸೇತುವೆಯ ಮಧ್ಯಭಾಗದ ಸಂಪೂರ್ಣ ಲೋಹವನ್ನು ಕೆಳಗಡೆ ಎಳೆಯಲಾಗಿದೆ. ಎಲ್ಲ ಲೋಹ ನದಿಯಲ್ಲಿ ಬಿದ್ದ ಕೂಡಲೇ ಬಿಡಿ ಭಾಗಗಳನ್ನು ವಿಂಗಡಿಸಿ ಎಲ್ಲವನ್ನು ವಾಹನಗಳ ಮೂಲಕ ಕಳ್ಳರು ಸಾಗಣೆ ಮಾಡಿದ್ದಾರೆ ಎಂದು ವರದಿಯಾಗಿದೆ.
