ಚಂಢೀಗಡ್: ಆಲ್ಲೈನ್ ಮೂಲಕ ಎಣ್ಣೆ ಖರೀದಿಸಲು ಮುಂದಾದ ಯುವಕನೊಬ್ಬನಿಗೆ ಖತರ್ನಾಕ್ ಮಹಿಳೆಯೊಬ್ಬಳು ಬರೋಬ್ಬರಿ 5.95 ಲಕ್ಷ ರೂ. ಪಂಗನಾಮ ಹಾಕಿರುವ ಘಟನೆ ಹರಿಯಾಣದ ಕುರುಕ್ಷೇತ್ರ ಜಿಲ್ಲೆಯಲ್ಲಿ ನಡೆದಿದೆ.
ಕುರುಕ್ಷೇತ್ರ ಜಿಲ್ಲೆಯ ಸಲರ್ಪುರ ರೋಡ್ನ ಏಕ್ತಾ ವಿಹಾರ್ ಕಾಲೋನಿಯ ನಿವಾಸಿ ಪಂಕಜ್ ಕುಮಾರ್ ಮೋಸ ಹೋಗಿರುವ ಯುವಕ. ಮೋಸ ಮಾಡಿರುವ ಮಹಿಳೆಯನ್ನು ಸುನಿತಾ ಎಂದು ಗುರುತಿಸಲಾಗಿದೆ. ಪಂಕಜ್ ಕುಮಾರ್ ಫೇಸ್ಬುಕ್ ಲಿಂಕ್ವೊಂದರ ಮೂಲಕ ಸುನಿತಾಳನ್ನು ಸಂಪರ್ಕಿಸಿದ್ದನು. ಆಗ ಆಕೆ ನಾನು ಆನ್ಲೈನ್ನಲ್ಲಿ ನ್ಯಾಚುರಲ್ ಆಯಿಲ್ ಮಾರಾಟ ಮಾಡುತ್ತೇನೆ ಎಂದು ಹೇಳಿದ್ದಾಳೆ. ಅಲ್ಲದೆ ಆ ಎಣ್ಣೆಯ ಪ್ರಯೋಜನಗಳು, ಬಳಸುವ ಪದಾರ್ಥಗಳ ಬಗ್ಗೆ ಪಂಕಜ್ಗೆ ವಿವರಿಸಿದ್ದಾಳೆ. ಮಹಿಳೆಯು ಎಣ್ಣೆ ಬಗ್ಗೆ ವಿವರಿಸಿದ ಪರಿಗೆ ಮಾರುಹೋದ ಯುವಕ ಅದರ ಖರೀದಿಗೆ ಮುಂದಾಗಿದ್ದಾನೆ.
ಈ ವೇಳೆ ಮಹಿಳೆ ಬ್ಯಾಂಕ್ ಅಕೌಂಟ್ ವಿವರವನ್ನು ಯುವಕನಿಗೆ ನೀಡಿ ತನ್ನ ಖಾತೆಗೆ ಹಣ ಹಾಕುವಂತೆ ಹೇಳಿದ್ದಾಳೆ. ಮಹಿಳೆಯ ಮೋಡಿಗೆ ಮರುಳಾಗಿದ್ದ ಯುವಕ ತನ್ನ ಕೈಗೆ ಎಣ್ಣೆ ಸಿಗುತ್ತದೆ ಎಂಬ ಆಸೆಯಲ್ಲಿ 5 ಲಕ್ಷದ 95 ಸಾವಿರ ರೂಪಾಯಿಯನ್ನು ಆಕೆಯ ಖಾತೆಗೆ ಹಾಕಿದ್ದಾನೆ. ತನ್ನ ಖಾತೆಗೆ ಹಣ ಜಮೆಯಾದ ಕೂಡಲೇ ಆಯಿಲ್ ಪಾರ್ಸಲ್ ಮಾಡ್ತೇನೆಂದು ಮಹಿಳೆ ಹೇಳಿದ್ದಳು, ಆದ್ರೆ ಹಣ ಖಾತೆಗೆ ಬೀಳುತ್ತಿದ್ದಂತೆ ಮಹಿಳೆ ಕಾಲ್ಕಿತ್ತಿದ್ದು, ಯುವಕನಿಗೆ ಪಂಗನಾಮ ಹಾಕಿದ್ದಾಳೆ.
ಎಣ್ಣೆ ಪಾರ್ಸಲ್ ಇವತ್ತು ಬರುತ್ತೆ, ನಾಳೆ ಬರುತ್ತೆ ಎಂದು ಯುವಕ ಕಾದಿದ್ದಾನೆ. ಬಳಿಕ ಈ ಬಗ್ಗೆ ವಿಚಾರಿಸಲು ಮಹಿಳೆಗೆ ಫೋನ್ ಕೂಡ ಮಾಡಿದ್ದಾನೆ. ಆದ್ರೆ ಅತ್ತ ಮಹಿಳೆ ಫೋನ್ಗೆ ಸಿಗದೇ, ಇತ್ತ ಎಣ್ಣೆನೂ ಸಿಗದೇ, ಹಣವನ್ನೂ ಕಳೆದುಕೊಂಡು ಕಂಗಾಲಾಗಿದ್ದನು.
ಬಳಿಕ ಶನಿವಾರದಂದು ಈ ಬಗ್ಗೆ ಪೊಲೀಸರಿಗೆ ಯುವಕ ದೂರು ನೀಡಿದ್ದು, ವಂಚಕಿಯನ್ನು ಸೆರೆಹಿಡಿಯಲು ಪೊಲೀಸರು ಬಲೆ ಬೀಸಿದ್ದಾರೆ.
