ಕೊಚ್ಚಿ: 5 ಗಂಟೆಗಳ ಕಾಲ ಸತತವಾಗಿ ವೀಣೆಯಲ್ಲಿ 67 ಹಾಡುಗಳನ್ನ ನುಡಿಸುವ ಮೂಲಕ ದಕ್ಷಿಣದ ಪ್ರಸಿದ್ಧ ಗಾಯಕಿ ವೈಕೋಮ್ ವಿಜಯಲಕ್ಷ್ಮೀ ವಿಶ್ವ ದಾಖಲೆ ನಿರ್ಮಿಸಿದ್ದಾರೆ.
ಭಾನುವಾರದಂದು ಕೊಚ್ಚಿಯಲ್ಲಿ ನಡೆದ ಸಂಗೀತ ಗೋಷ್ಠಿಯಲ್ಲಿ ದೃಷ್ಟಿಹೀನರಾದ ವಿಜಯಲಕ್ಷ್ಮೀ, ಈ ಹಿಂದೆ ನಿರ್ಮಿಸಲಾಗಿದ್ದ 51 ಹಾಡಿನ ದಾಖಲೆಯನ್ನು ಮುರಿದಿದ್ದಾರೆ. ಮೊದಲಿಗೆ 52 ಹಾಡುಗಳನ್ನ ನುಡಿಸಬೇಕು ಎಂದುಕೊಂಡಿದ್ದ ವಿಜಯಲಕ್ಷ್ಮೀ ಮಲಯಾಳಂ, ತಮಿಳು ಹಾಗೂ ಹಿಂದಿಯ ಹಾಡುಗಳು, 12 ಕೀರ್ತನೆಗಳು ಸೇರಿದಂತೆ ನಿರಂತರವಾಗಿ 67 ಹಾಡುಗಳನ್ನ ನುಡಿಸಿದ್ರು.
ಒಟ್ಟು 67 ಹಾಡುಗಳನ್ನು ವಿಜಯಲಕ್ಷ್ಮೀ ಒಂದು ತಂತಿಯಿರುವ ಗಾಯತ್ರಿ ವೀಣೆ/ಏಕ ತಂತಿ ವೀಣೆಯಲ್ಲಿ ನುಡಿಸಿದ್ದು ಮತ್ತೊಂದು ವಿಶೇಷ. ಈ ಅಪರೂಪದ ಸಂಗೀತವಾದ್ಯವನ್ನು ನುಡಿಸುವಲ್ಲಿ ಪರಿಣಿತರಾಗಿರೋ ವಿಜಯಲಕ್ಷ್ಮೀ 5 ವರ್ಷಗಳ ಹಿಂದೆ ಗಾಯಕಿಯಾಗಿ ಮೊದಲ ಹಾಡನ್ನ ಹಾಡಿದ್ರು.
ಗಾಯತ್ರಿ ವೀಣೆ: ವಿಜಯಲಕ್ಷ್ಮೀ ಅವರ ಅಭಿಮಾನಿಯೊಬ್ಬರು ಅವರಿಗೆ ಗಾಯತ್ರಿ ತಂಬೂರಿಯನ್ನ ಉಡುಗೊರೆಯಾಗಿ ನೀಡಿದ್ದರು. ಅದನ್ನ ಅವರ ತಂದೆಯ ಜೊತೆ ಸೇರಿ ಮರುವಿನ್ಯಾಸಗೊಳಿಸಿ ಏಕ ತಂತಿ ವಾದ್ಯವನ್ನಾಗಿ ಮಾಡಿದ್ರು. ವಯೋಲಿನ್ ಪರಿಣತರಾದ ಕುನ್ನಕ್ಕುಡಿ ವೈದ್ಯನಾಥನ್ ಅವರು ಒಮ್ಮೆ ವಿಜಯಲಕ್ಷ್ಮೀ ಅವರ ಈ ಹೊಸ ವಾದ್ಯದಿಂದ ಸಂಗೀತ ಕೇಳಿ ಇದಕ್ಕೆ ಗಾಯತ್ರಿ ವೀಣೆ ಎಂಬ ಹೆಸರು ಕೊಟ್ಟರು.
ಮದುವೆ ರದ್ದು: ವಿಜಯಲಕ್ಷ್ಮೀ ಅವರ ಭಾವಿ ಪತಿ ಆಕೆಗೆ ಕಚೇರಿಗಳಲ್ಲಿ ಪ್ರದರ್ಶನ ನೀಡುವುದನ್ನು ನಿಲ್ಲಿಸಿ ಯಾವುದಾದ್ರೂ ಕಾಲೇಜಿನಲ್ಲಿ ಸಂಗೀತ ಶಿಕ್ಷಕಿಯಾಗು ಎಂದು ಹೇಳಿದ್ದರಿಂದ ಎರಡು ವಾರಗಳ ಹಿಂದೆ ವಿಜಯಲಕ್ಷ್ಮೀ ಸಂಗೀತಕ್ಕಾಗಿ ತಮ್ಮ ಮದುವೆಯನ್ನೇ ರದ್ದು ಮಾಡಿದ್ದಾರೆ. ಸಂಗೀತ ನನ್ನ ಬದುಕು. ನನ್ನ ವಿಕಲತೆಯನ್ನು ತೊಂದರೆ ಅಂತ ನಾನೆಂದೂ ಭಾವಿಸಿಲ್ಲ ಅಂತಾರೆ ವಿಜಯಲಕ್ಷ್ಮೀ.
ವಿಜಯಲಕ್ಷ್ಮೀ ಅವರು ಮಲಯಾಳಂ, ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ಹಾಡಿದ್ದಾರೆ.
