4 ಲಕ್ಷ ರೂ ಇದ್ದ ಬ್ಯಾಗ್‍ನೊಂದಿಗೆ ಮರವೇರಿ ಹಣ ಬಿಸಾಕಿದ ಕೋತಿ!

ಲಕ್ನೋ: ಕಪಿಯೊಂದು 4 ಲಕ್ಷ ರೂಪಾಯಿ ನಗದು ಹೊಂದಿರುವ ಬ್ಯಾಗ್ ಎತ್ತಿಕೊಂಡು ಮರವೇರಿದ ಘಟನೆ ಉತ್ತರ ಪ್ರದೇಶದ ಸೀತಾಪುರ್‍ನಲ್ಲಿ ನಡೆದಿದೆ.

ಒಂದು ದಿನ ಸೀತಾರ್‍ಪುರ್‍ನ ವಿಕಾಸ್ ಭವನದ ರಿಜಿಸ್ಟರ್( ನೋಂದಣಿ) ಕಚೇರಿಯ ಮುಂಭಾಗದಲ್ಲಿ ಹಿರಿಯ ವ್ಯಕ್ತಿಯೊಬ್ಬರು 4 ಲಕ್ಷ ರೂಪಾಯಿ ಹಣ ಇರುವ ಬ್ಯಾಗನ್ನು ಹಿಡಿದು ಕುಳಿತುಕೊಂಡಿದ್ದರು. ಆಗ ಏಕಾಏಕಿ ಅವರ ಹತ್ತಿರ ಬಂದ ಕೋತಿ ಹಣ ಇರುವ ಬ್ಯಾಗನ್ನು ಎತ್ತಿಕೊಂಡು ಮರವನ್ನು ಏರಿ ಕುಳಿತುಕೊಂಡಿತ್ತು.

ಹಣದ ಬ್ಯಾಗನ್ನು ಎತ್ತಿಕೊಂಡ ಕೋತಿ ರಿಜಿಸ್ಟರ್ ಕಚೇರಿಯ ಹೊರಗಿನ ಮರದ ಮೇಲೆ ಕುಳಿತು ಬ್ಯಾಗ್‍ನಲ್ಲಿರುವ ನೋಟುಗಳನ್ನು ಎಸೆಯಲು ಪ್ರಾರಂಭ ಮಾಡಿತ್ತು. ಕಚೇರಿಯ ಸುತ್ತಮುತ್ತ ನೋಟುಗಳು ಗಾಳಿಯಲ್ಲಿ ಹಾರಿಕೊಂಡು ಬಂದು ಬೀಳುತ್ತಿರುವುದನ್ನು ನೋಡಿದ ಜನರಿಗೆ ಆಶ್ಚರ್ಯ ಮತ್ತು ಅಚ್ಚರಿ ಉಂಟಾಗಿದೆ. ಏನಿದು ಎಂದು ಹತ್ತಿರ ಹೋಗಿ ನೋಡಿದ ಜನರಿಗೆ ಕಪಿಯ ಚೇಷ್ಟೆ ಕುರಿತಾಗಿ ತಿಳಿದಿದೆ.

ಕೊನೆಗೆ ಕೋತಿ ಹಣದ ಬ್ಯಾಗನ್ನು ಕೆಳಕ್ಕೆ ಎಸೆದಿತ್ತು. ನಂತರ ಬ್ಯಾಗನಲ್ಲಿದ್ದ ಹಣವನ್ನು ಪರಿಶೀಲನೆ ಮಾಡಿದಾಗ 10 ರಿಂದ 12 ಸಾವಿರ ರೂಪಾಯಿಗಳನ್ನು ಮಂಗ ಕೆಳಗೆ ಎಸೆದಿದೆ ಎಂದು ತಿಳಿದು ಬಂದಿದೆ.