ನವದೆಹಲಿ: ಅಮೆರಿಕಾರದ ಮೆಂಫಿಸ್ ಉಪನಗರದ ಟೆನ್ನೆಸ್ಸಿಯಲ್ಲಿ ನಡೆದ ಬೆಂಕಿ ದುರುಂತದಲ್ಲಿ ತೆಲಂಗಾಣ ಮೂಲದ ಮೂವರು ಒಡಹುಟ್ಟಿದವರು ಸೇರಿದಂತೆ ಮತ್ತೋರ್ವ ಮಹಿಳೆ ಸಜೀವ ದಹನವಾಗಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ತೆಲಂಗಾಣ ಮೂಲದ ಆರನ್ ನಾಯಕ್ (17), ಶರೋನ್ ನಾಯಕ್ (14) ಹಾಗೂ ಜಾಯ್ ನಾಯಕ್ (15) ಒಡಹುಟ್ಟಿದವರಾಗಿದ್ದಾರೆ. 46 ವರ್ಷದ ಕ್ಯಾರಿ ಕಾಡ್ರಿಟ್ ಸಹ ಬೆಂಕಿ ದುರಂತದಲ್ಲಿ ಮೃತಪಟ್ಟ ದುರ್ದೈವಿಗಳಾಗಿದ್ದಾರೆ.
ಭಾನುವಾರ ರಾತ್ರಿ 11 ಸುಮಾರಿಗೆ ಕ್ಯಾರಿ ಕಾಡ್ರಿಟ್ ವಾಸಿಸುತ್ತಿದ್ದ ಮನೆಗೆ ಬೆಂಕಿ ಕಾಣಿಸಿಕೊಂಡಿತ್ತು. ಬೆಂಕಿಯ ಕೆನ್ನಾಲಿಗೆಗೆ ಕ್ಯಾರಿ ಕಾಡ್ರೀಟ್ ಸೇರಿದಂತೆ ಮೂವರು ಒಡಹುಟ್ಟಿದವರೂ ಸಹ ಮೃತಪಟ್ಟಿದ್ದರು. ತೆಲಂಗಾಣ ಮೂಲದ ಮೂವರು ಮಕ್ಕಳು ಅಮೆರಿಕಾದ ದಂಪತಿಗಳ ಜೊತೆ ವಾಸವಾಗಿದ್ದರು ಎನ್ನುವ ಮಾಹಿತಿಯನ್ನು ಸ್ಥಳೀಯ ಪತ್ರಿಕೆಗಳು ವರದಿ ಮಾಡಿವೆ.
ಘಟನೆ ಕುರಿತು ಫ್ರೆಂಚ್ ಕ್ಯಾಂಪ್ ಸಮುದಾಯ ತನ್ನ ಫೇಸ್ಬುಕ್ ಖಾತೆಯಲ್ಲಿ, ಪಾಸ್ಟರ್ ನಾಯ್ಕ್ ಮತ್ತು ಆಕೆಯ ಪತ್ನಿಗಾಗಿ ಪ್ರಾರ್ಥಿಸೋಣ. ದಂಪತಿ ತಮ್ಮ ಮೂರು ಅಮೂಲ್ಯ ಮಕ್ಕಳನ್ನು ಅಮೆರಿಕಾಕ್ಕೆ ಕಳುಹಿಸಿದ್ದರು. ಆದರೆ ಅವರು ಅಗ್ನಿಗೆ ಆಹುತಿಯಾಗಿದ್ದಾರೆ. ಈ ಮೂರು ಮಕ್ಕಳನ್ನು ಇಡೀ ಪಟ್ಟಣವೇ ಪ್ರೀತಿಸುತ್ತಿತ್ತು. ಆದರೆ ಅವರ ಅಕಾಲಿಕ ಮರಣದಿಂದಾಗಿ ಇಡೀ ಪಟ್ಟಣವೇ ದು:ಖದಲ್ಲಿ ಮುಳುಗಿದೆ. ನಮಗೆ ಗೊತ್ತು ಹೆತ್ತವರ ನೋವನ್ನು ಅಳೆಯಲು ಸಾಧ್ಯವಿಲ್ಲವೆಂದು ಬರೆದು ಪೋಸ್ಟ್ ಮಾಡಿದೆ.
ಮಾಹಿತಿಗಳ ಪ್ರಕಾರ ಮಕ್ಕಳು ಸ್ಥಳೀಯ ಚರ್ಚ್ ಮಿಷನರಿಯಲ್ಲಿದ್ದುಕೊಂಡು ವ್ಯಾಸಂಗ ಮಾಡುತ್ತಿದ್ದರು. ಇವರನ್ನು ಡ್ಯಾನಿಯಲ್ ಕಾಡ್ರಿಟ್ ದಂಪತಿ ನೋಡಿಕೊಳ್ಳುತ್ತಿದ್ದರು. ಆದರೆ ಬೆಂಕಿ ದುರಂತದಲ್ಲಿ ಡ್ಯಾನಿಯಲ್ ಹಾಗೂ ಅವರ 13 ವರ್ಷದ ಕೋಲ್ ಮಾತ್ರ ಬದುಕುಳಿದಿದ್ದಾರೆ. ಸದ್ಯ ಚರ್ಚ್ ಮಕ್ಕಳು ತೆಲಂಗಾಣ ಮೂಲದವರೆಂದು ಮಾತ್ರ ಹೇಳಿದೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್ಲೋಡ್ ಮಾಡಿ: play.google.com/publictv
