ಪುನೀತ್‌ರನ್ನು ನೋಡಲು ಅಂಗೈಯಲ್ಲಿ ಜೀವ ಹಿಡಿದುಕೊಂಡು ಕುಳಿತಿದ್ದಾನೆ ಬಾಲಕ

ಬಳ್ಳಾರಿ: ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅವರನ್ನು ನೋಡಲು 16 ವರ್ಷದ ಬಾಲಕನೊಬ್ಬ ಅಂಗೈಯಲ್ಲಿ ತನ್ನ ಜೀವ ಹಿಡಿದುಕೊಂಡು ಕಾದು ಕುಳಿತಿದ್ದಾನೆ.

16 ವರ್ಷದ ಬಾಲಕ ಆದರ್ಶ್, ಪುನೀತ್ ರಾಜ್‍ಕುಮಾರ್ ಅವರ ಅಭಿಮಾನಿಯಾಗಿದ್ದು, ವಿಚಿತ್ರ ಕಾಯಿಲೆಯಿಂದ ಬಳಲುತ್ತಿದ್ದಾನೆ. ಬಳ್ಳಾರಿ ಜಿಲ್ಲೆಯ ಹೊಸಪೇಟ್ ನಗರದ ಇಂದಿರ ನಗರ ನಿವಾಸಿಗಳಾದ ಹನಮಂತ್ ಮತ್ತು ರೇಖಾ ದಂಪತಿಯ ಹಿರಿಯ ಮಗನಾಗಿರುವ ಆದರ್ಶ್ ಹುಟ್ಟಿದ್ದಾಗಿನಿಂದ ವಿಚಿತ್ರ ಕಾಯಿಲೆಯಿಂದ ಬಳಲುತ್ತಿದ್ದಾನೆ.

ಆದರ್ಶ್‍ಗೆ ಈಗ 16 ವರ್ಷ ವಯಸ್ಸು, ಬೇರಯ ಮಕ್ಕಳ ಹಾಗೆ ಈತನಿಗೂ ಆಟ ಆಡಬೇಕು ಶಾಲೆಗೆ ಹೋಗಬೇಕು ಎನ್ನುವ ಆಸೆಯಿದೆ. ಆದರೆ ಆದರ್ಶ್ ದೇಹದ ಎಲ್ಲಾ ಮೂಳೆಗಳ ಬೆಳವನಿಗೆ ಆಗುತ್ತಿದೆ. ಹೊರತು ದೇಹದಲ್ಲಿ ಮಾಂಸ ಖಂಡಗಳ ಬೆಳವಣಿಗೆ ಆಗುತ್ತಿಲ್ಲ. ಹೀಗಾಗಿ ಈ ಪುಟ್ಟ ಬಾಲಕ ಸ್ವತಂತ್ರವಾಗಿ ಏನನ್ನು ಮಾಡಲು ಸಾಧ್ಯವೇ ಇಲ್ಲಾ. ಆದರೆ ಈತನ ಬುದ್ಧಿ ಮಾತ್ರ ಅತೀ ತೀಕ್ಷ್ಣವಾಗಿದೆ.

ಪುನೀತ್ ರಾಜ್‍ಕುಮಾರ್ ಎಂದರೆ ಆದರ್ಶ್‍ಗೆ ಪಂಚಪ್ರಾಣ. ಪುನೀತ್ ರಾಜಕುಮಾರ್ ಅವರ ಯಾವುದೇ ಹೊಸ ಚಿತ್ರ ಬಿಡುಗಡೆ ಆದರೆ ಸಾಕು ಆದರ್ಶ್ ಮೊದಲ ದಿನ ಮೊದಲ ಶೋ ನೋಡಲೇ ಬೇಕು. ಮನೆಯಲ್ಲಿ ಪ್ರತಿ ಗೋಡೆಯ ತುಂಬಾ ಪುನೀತ್ ಅವರ ಪೋಸ್ಟರ್ ಗಳಿವೆ. ಪುನೀತ್ ನೋಡುತ್ತಲೇ ಊಟ ಮಾಡುತ್ತಾನೆ ಹಾಗೂ ಕಾಲ ಕಳೆಯುತ್ತಾನೆ. ಅವನಂತೇ ತಾನೂ ನಟನೆ ಮಾಡಬೇಕು ಫೈಟ್ ಮಾಡಬೇಕು ಎನ್ನುವ ಕನಸು ಕಾಣುತ್ತಲೇ ಜೀವನ ಸಾಗಿಸುತ್ತಿದ್ದಾನೆ.

ಆದರ್ಶ್ ಅವರ ತಂದೆ ಕಡು ಬಡವರಾಗಿದ್ದು, ಜೀವನ ನಡೆಸಲು ಆಟೋ ಇದೆ. ಇದರ ಸಂಪಾದನೆಯಿಂದಲೇ ಕುಟುಂಬ ಸಾಗಿಸುತ್ತಿದ್ದಾರೆ. ಆದರೆ ಹುಟ್ಟಿದಾಗಿನಿಂದಲೇ ಮಗನ ಕಾಯಿಲೆ ಕಂಡು ರಾಜ್ಯದ ಹೆಸರಾಂತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿದ್ದಾರೆ. ಆದರೆ ಮಗನ ಕಾಯಿಲೆ ಮಾತ್ರ ವಾಸಿ ಆಗಿಲ್ಲ. ಹೀಗಾಗಿ ತಂದೆ-ತಾಯಿ ಸಹ ಕೈ ಚೆಲ್ಲಿದ್ದಾರೆ. ಇನ್ನು ಮಗನಿಗೆ ಪುನೀತ್ ಎಂದರೆ ಬಹಳ ಅಚ್ಚುಮೆಚ್ಚು. ಹೀಗಾಗಿ ಪುನೀತ್ ಸಿನಿಮಾ ಬಿಡುಗಡೆ ಆದರೆ ಸಾಕು ಈ ಬಾಲಕನನ್ನು ಕರೆದುಕೊಂಡು ಚಿತ್ರ ನೋಡಿಕೊಂಡು ಬರುತ್ತಾರೆ.

ಪುನೀತ್ ಅವರನ್ನು ಒಮ್ಮೆ ಆದರೂ ಆದರ್ಶ್ ಭೇಟಿ ಮಾಡಬೇಕು ಎಂದು ಆತನ ಪೋಷಕರು ಪ್ರಯತ್ನಿಸಿದ್ದಾರೆ. ಕಳೆದ ಎರಡು ಬಾರಿ ಪುನೀತ್ ಹೊಸಪೇಟೆಗೆ ಬಂದಾಗಲೂ ಪ್ರಯತ್ನಿಸಿದ್ದು, ಆದರೆ ನೂರಾರು ಅಭಿಮಾನಿಗಳ ಅಬ್ಬರದಲ್ಲಿ ಅದು ಸಾಧ್ಯವಾಗಲಿಲ್ಲ. ಹೀಗಾಗಿ ನನ್ನ ಮಗನ ಆಸೆಯನ್ನು ಪುನೀತ್ ಅವರು ಈಡೇರಿಸಿದರೆ ಅವರಿಗೆ ಕೋಟಿ ಕೋಟಿ ನಮನ ಎಂದು ಆದರ್ಶ್ ತಂದೆ- ತಾಯಿ ಹೇಳುತ್ತಾರೆ.